Ilan 9

M làá nyɔ̄ŋkì m-Dindaan nì m-pɔbil kɔkɔ

1 Daafiidi di ŋmàn̄ nlan nee ki tīī bilaŋgaaliibi kpiliu.

2 M làá nyɔ̄ŋkì sii m-Dindaan nì m-pɔbil kɔkɔ,

m làá sòoǹ a-maamaaci tuuŋŋi ŋin a ŋée kɔkɔ pu.

3 Kun ní a ŋée puee, m làá nīn gà

ifaal nì dipɔɔpindi laŋyi.

Yilpu fɔ́ŋŋŋ Nimbɔtiu,

m làá gāā ilan kí nyɔ̄ŋkì-si.

4 M-nannanliibi fātì bi-boon,

bi gbéetì ki lítì ki kpíì a-nimbiin.

5 Di sá yii a sòon̄ m-bɔti ki pɔ̀n̄-mi.

A kāl̀ a-beejal pu ki sòon̄ tibɔti nì ibaamɔn.

6 A sòon̄ ki kūū atimbun ŋin kaa nyí-see bɔti,

ní ki nāaǹ binikpitib.

A kúntì-bi múb kí nīn cá jaanjaan.

7 Taa ti wāĺ ti-nannanliibi,

kun puee baa ti pée bí ní.

A nāaǹ bi-timmu ní bi súntì bi-pu kpataaa.

8 Ama ti-Dindaan úǹ kā u-beejal pu ní jaanjaan,

u bɔ́ntì u-beejal kí sòoǹ duulinya bɔti.

9 Úǹ di kpòotī duulinya nì ibaamɔn,

ní ki sòoǹ binib bɔti deedee.

10 Ti-Dindaan sá kibalilaŋ ní ki tīī un bi wɔ́b́ee,

ní ki sá kutaŋkpanaakoou dinimbinaamandi yuntiŋu poon.

11 Bin nyí-si mbaamɔminee ń nīn máká a-pu!

Di sá yii sii ti-Dindaan kaa fàtī a-boon kí tīī bin nyàab̀-see!

12 Gāāmaan ilan kí nyɔ̄ŋkì ti-Dindaan

un sá ubɔti Siiyɔn tiŋkinee.

Sòom̀maan u-tunnyaaŋŋi pu

kí tùkù atimbun kɔkɔ nib.

13 Unimbɔti dátí binikpɔliibi tafal,

ní kaa súntí bin bi kūūyee pu.

Waa súntí bifalaadambi biilii pu.

14 M-Dindaan, sɔ̄ m-saai!

Kpèè m-nannanliibi nín bí ki sàantí-mi puee!

Fīī-mi kí nyāntí ditaŋkpiilin,

15 án nín làá ŋá pu ḿ sīĺ Jeerusaleem nib nimbiin

kí tùkù-bi tin ní a ŋá ki tīī-mi ní m bí ki nyɔ́ŋkí-see.

M làá nīn fàal̀ kun puee a fīī-mi.

16 Binib bin kaa nyí-see gbìn̄ mbòó ki bíl̀ bi-nannanliibi

ní bíǹ bi-ba jéetì ŋu-poon,

kutaliŋŋu kun bi píĺee sàl̄ bíǹ bi-ba^a.

17 Ti-Dindaan dàkā un ní u sée

ki sòon̄ binib bɔti nì ibaamɔn.

U dù unikpiti taliŋku ní kí fàtīí gíiǹ kí sàl̄-u.

18 Bikpitiŋaliibee kɔkɔ nì bin kɔkɔ súntí Unimbɔti pu

kaa jáaḿ-uee làá sìntī ditaŋkpiilin.

19 Ama Unimbɔti kpá kí súntí ufalaadaan pu,

unandaan mun mákal kpá kí jēetí nnyimin jaanjaan.

20 Ti-Dindaan, yīkìm̄! Taa yàntī nisaaleen ń pɔ̄ɔkiǹ-si.

Cáań binib bin kaa nyí-see a-nimbiin kí sòoǹ bi-bɔti.

21 Ti-Dindaan, yàntī dinyoondi ń kɔ́-bi,

yàntī bí béé yii bi sá nisaaleen ní ki kúù.