Un bi wɔ́b́ee wimmeem
10
1 Ti-Dindaan, ba pu ní a dátiǹ-ti míǹ?Ba pu ní dinimbinaamandi yuntiŋunee a bāal̀ ní?
2 Bikpitiŋaliibi cáá dilambil ní ki wɔ́b̀ unandaan.
Yàntī bi-talinti tin bi píĺee ń fàtīí sàtì-bi.
3 Ukpitiŋal bí ki gà u-bindi u-landɔkɔkpitii pu.
Unil un jīǹ u-jutiibi puee tòó ti-Dindaan mbusu ki bèel̄-u.
4 Ukpitiŋal nín yòontí u-ba yilpu puee,
waa dū Unimbɔti ki yíiń tiba.
U nín dàkafī puee di sá yii: «Unimbɔti kaa cáá mpɔn ŋubɔ.»
5 Tin kɔkɔ u yaa pée ŋáańee bútí-u ní.
Unimbɔti bɔsooŋyi kaa lì-u tiba.
U-nannanliibi kaa bí tiban u-cee.
6 U dàkafī u-pɔbilin ki lì yii:
«Tiba kaa làá ŋá-mi,
dinimbinaamandi diba kpá kí kɔ́-mi.»
7 U-nyɔkɔ poon gbí mbusu nì nnyimɔn
nì tipɔmbɔti ŋma nía,
u yáb̀ kí sòoǹ atuŋkpiti nì mbusu bɔti.
8 U nākantí ntiŋwaamu caŋin
ki kù maanyiiba dibalin.
U-nimbiliŋ pée cɔ́ uwɔfi pu ní.
9 U náká u-balilaŋki ki cí kii gbikintee.
U náká niin ki nyàab̀ unandaan kí cúú.
U yaa cúú unandaanee ní ú dū-u kí ŋá u-laaŋkun.
10 U-pɔŋŋu yaa nyāŋkì unandaanee puee,
ní úǹ ń lítí,
11 ní ú lì u-ban yii:
«Unimbɔti tafal kaa bí tin m ŋá nee pu,
u bīiǹ u-nimbiin, waa pée wāĺ tiba nì tiba.»
12 Ti-Dindaan, yīkìm̄,
Unimbɔti, yàntī falaa ń bà bikpitiŋaliibi gbanti.
Taa súntí binandambi pu.
13 Ba pu ní ukpitiŋal bèel̄ sii Unimbɔti
ki lì u-pɔbilin yii: «Aa làá yíiń-mi ibeeyiin» ní?
14 A wāĺ tin kɔkɔ bíi jītée,
ki nyí binib bin bí digìńdi nì falaa poonee
ní ki bɔ́ntì kí tɔ̀ bi-pɔntooŋyi.
Un kaa cáá ubɔ ń tūtuǹ-uee dù u-ba ní kí ŋá a-ŋaan.
Sii di sá ditaŋkpiibil jòońliu.
15 Nàan̄ unikpiti pɔŋŋu,
kí dáaĺ u-tafal u-kpitii pu,
ní ú wāŋkì a-nimbiin!
16 Ti-Dindaan sá ubɔti ní jaanjaan,
bin kaa jáaḿ-uee làá wāŋkì u-tiŋki pu.
17 Ti-Dindaan, a pílifí unandaan wimmeem
ní ki tìì-u kunyannyaau.
A kpòontí a-tafal
18 ki pílifí ditaŋkpiibil nì un bi sàantée biilii ki pɔ̀-bi,
án nín làá ŋá pu nisaaleen ń taa ti nín̄ sá
tuutuutuu ki tīī u-nijutee.