Ilan 11

Ti-Dindaan pu ní m máká

1 Daafiidi di ŋmàn̄ nlan nee ki tīī bilaŋgaaliibi kpiliu.

Ti-Dindaan ní m sáǹ ki kɔ́,

kin mana ní ni gíti ŋūǹ kí lì-mi yii:

«Sāǹ malaa malaa kii kinɔmbiki nín ŋàaǹ puee kí nīn cá ajoonni»?

2 - Kpèè unikpiti píĺ butɔbu

ki dū mpiin ki páaǹ

kí dáaĺ kí yā unil un bí deedeeyee dibɔmbɔndin.

3 Tiwan kɔkɔ nyeel yaa bíil̀ee,

deedeedaan gíti cáá tilati kí ŋá?

4 - Ti-Dindaan bí u-circir diikun,

ti-Dindaan kā u-beejal pu yilpu.

U-nimbiliŋ làaǹ binib kɔkɔ pu

ní ki nyí tin bi ŋáańee kɔkɔ.

5 Ti-Dindaan di sòoǹ deedeedaan nì unikpiti bɔti,

u ná un néeń tipɔmbɔtee tikpil.

6 U làá dū amɔsiŋkoon nì farwata ŋmiŋu

kí sìtī unikpiti pu kii utaa nín nì puee ní.

U làá dū ŋweel buŋku kun kōō tikɔkɔee

ní kí dáaĺ bi-tafal.

7 Ti-Dindaan sá deedeedaan

ní ki néeń deedee tuuŋŋi,

binib bin bí deedeeyee làá nīn bí u-nimbiin.