Unimbɔti, tūtuǹ a-nibul
12
1 Daafiidi di ŋmàn̄ nlan nee ki tīī bilaŋgaaliibi kpiliu. Bi gà-ŋu ki bɔ̀ɔ́ tibati tin cáá iŋmii iniiyee ní.2 Ti-Dindaan, jòoń-ti! Di sá yii deedeedambi kaa ti bí,
baa ti ŋūǹ ki ká bin pu bi ŋūǹ kí nīn mákée.
3 Bi bí ki mɔ́ntí tɔb,
bi cáá biibii nì nyɔɔmálmal ki ŋmàtíǹ tɔb.
4 Ti-Dindaan ń pìin̄ nnyɔmu mun sòoǹ biibiiyee
nì alimbil ŋin sòoǹ tilambibɔti
5 ki lì yii: «Nì ti-limbiliŋ nee,
kun ti yaa lèe, see tí ká,
ti nín cáá nnyɔmu nee,
ubɔ kaa ti ŋūǹ kí tùkù-ti kun ti máaǹ kí ŋée.»
6 Ama ní ti-Dindaan bí yii:
«Bi bí ki sàantí unandaan,
ní ufalaadaan tíminsí.
An puee m làá dāan̄ kí fīī bin baa dū ki yíiń binibee.»
7 Ti-Dindaan pooŋyi sá in pu ti ŋūǹ kí nīn mákée ní,
di sá yii i sá ibaamɔn kii tikúti tin bi tɔ́ kipaayin
ŋfunyɔm miluli tì nyáń kaa ti cáá tijɔkɔndee ní.
8 Ti-Dindaan, ŋúb́ unandaan,
ní kí cīití-ti binikpitib nee cee.
9 Di sá binikpitib bí an kɔkɔ pu,
ikpiti ní binib kíǹ ki cáa ŋmìtī kii ŋkpamee.