M làá nīn bí dimaŋfalin kí māafì tin ti-Dindaan ŋée
118
1 Nyɔ̄ŋkìmaan ti-Dindaan, di sá yii u ŋān̄,ní u-neeŋkpaandi bí kí nīn cá jaanjaan.
2 Isirayeel yab ń lì yii:
«U-neeŋkpaandi bí kí nīn cá jaanjaan!»
3 Aarɔn naantiibi ń lì yii:
«U-neeŋkpaandi bí kí nīn cá jaanjaan!»
4 Bin bin fàŋkí ti-Dindaanee ń lì yii:
«U-neeŋkpaandi bí kí nīn cá jaanjaan!»
5 M-nimbinaamandi poonee, m kúuǹ ki yíiń ti-Dindaan,
ti-Dindaan kíí-mi ní ki yāntì m tɔ́ m-ba.
6 Ti-Dindaan bí m-cee, an puee maa fàŋkí tiba,
ba ní unil làá ŋmā kí ŋá-mia?
7 Ti-Dindaan bí m-cee ní ki tútúǹ-mi,
m-nimbil làá ká bin ná-mee lítitam.
8 An ŋān̄ á sāǹ kí kɔ́ ti-Dindaan
ki jítiǹ á nīn máká unil pu!
9 An ŋān̄ á sāǹ kí kɔ́ ti-Dindaan
ki jítiǹ á nīn máká kitiŋ pu nikpaambi pu!
10 Atimbun kɔkɔ nib nìn māntìi tú-mi,
ama ti-Dindaan yindi puee, m nāaǹ-bi.
11 Ŋi nìn māntìi tú-mi an kɔkɔ pu,
ama ti-Dindaan yindi puee, m nāaǹ-bi.
12 Ŋi nìn māntìi tú-mi kii inaŋgbansiiyee.
Bi kpíì malaa kii ikuŋkum ŋmiŋuee,
ti-Dindaan yindi puee, m nāaǹ-bi.
13 Bi téé-mi mpɔn ḿ bàà lítí,
ama ní ti-Dindaan jòoń-mi.
14 Ti-Dindaan di sá m-pɔŋŋu nì m-nyɔŋkii laŋŋu,
úǹ di fīī-mib.
15 Ifaal nì dijajil laŋŋu
nyēeń deedeedambi tantib poon yii:
«Ti-Dindaan ŋaŋgiil tūǹ atuŋkpaan!
16 Ti-Dindaan yōoǹ u-ŋaŋgiil yilpu,
ti-Dindaan ŋaŋgiil tūǹ atuŋkpaan.»
17 Maa làá kpú, m làá nīn bí dimaŋfalin
kí māafì tin ti-Dindaan ŋée.
18 Tiŋman ti-Dindaan dáaĺ m-tafal,
ama waa dū-mi ki ŋá ŋkúm ŋaanc.
19 Pìitīmaan-mi deedee punyɔmmud,
ḿ dī kí kɔ́ kí nyɔ̄ŋkì ti-Dindaan.
20 Ti-Dindaan punyɔkɔki sèé:
deedeedambi ń dī kí kɔ́!
21 M làá nyɔ̄ŋkì-si, di sá yii a kíí-mi,
ní ki fīī-mi.
22 Ditaŋkpal din bidimaliibi nìn dūu fée
di kpántì ditaŋkpal din ŋúb́ kudii pɔŋŋueee.
23 An nyánní ti-Dindaan cee ní,
an gbí mmaam ti-ceef!
24 Ŋwiin ŋun ti-Dindaan ŋée sɔ̀.
Ŋu-puee, tí nīn fàal̀ kí nīn bí dipɔɔpindin.
25 Áù ti-Dindaan, fīī-ti!
Áù ti-Dindaan, tīī-ti dijajil!
26 - Ti-Dindaan ń bìin̄ un dòoń u-yindi puee boong.
Doooo ti-Dindaan diikun ní ti mèé ki bìintí ni-pu.
27 - Ti-Dindaan di sá Unimbɔti ní ki ŋmíntí-ti!
- Nín̄ ŋúb́maan asupan ki nóó tɔb
kí tin bà nsaraafan yiŋyi.
28 Sii di sá m-Nimbɔtiu, ní m làá nyɔ̄ŋkì-si.
M-Nimbɔtiu, m làá yòon̄ a-yindi yilpu.
29 Nyɔ̄ŋkìmaan ti-Dindaan, di sá yii u ŋān̄
ní u-neendi bí kí nīn cá jaanjaan.