Disaŋkindi i

Disaŋkindi

gbɔŋku

Tibɔkilkaal

«Man di sá a-Dindaan a-Nimbɔtiu. Man di nyántìń-si Eejipiti tiŋkin laakin a nìn bíń kuyuŋuee.» Disaŋkindi 20.2 nee di sá kugbɔŋu nee pɔ̀ti pu ní ki dàkà u-bɔyil taapu. Tin pu kugbɔŋu nee baasii tɔ́kɔ́ ki sòoǹee di sá yii Unimbɔti di sá u-nibul fiiliu. Biyakatikaabi nee di gíti sá <marab saalaayee> nyeel. Unimbɔti neendi pu ní u fīī Isirayeel yab ki líì ní ki bí-bi yii bi mun ń nīn tɔ́ u-marab kí dàkà dineendi din bi cáá u-puee.

Isirayeel yab nín nìn sáǹ ki kɔ́ Eejipiti tiŋkee (Dinyeel 45.17-20, 47.11), abin aba boonee bi dāa būtì tikpil, ama ní Eejipiti bɔtiu dū-bi ki kpántì iyumbu. Unimbɔti kaa nìn kpáá u-tafal ki ŋmí ki kpèé Isirayeel yab nín nìn bí ki jīǹ falaa puee. U nìn lēē bi-kansikin unil ubɔ, bi yíì-u yii Mooyiisi, ú nīn sá bi-kpootiliu. U nìn jòoń-bi ŋfunyɔm kupaau nì mpɔn, ki yāntì Eejipiti yab là baa là, bi tīī Isirayeel yab dibatɔl ki yāntì bi nyáń bi-tiŋkin (1.1–15.21). U nìn kpōotì-bi míǹ, ki wúń bi-pu ŋyunti ŋun bi cōom̀ ki jítì Siinaayi teeku puee (15.22–18.27). Unimbɔti nìn yóoǹ u nì u-nibul Isirayeel yab kansikin mpèé Siinaayi jool pu ní ki tīī-bi u-marab (19.1–24.18). Ŋyunti ŋun Mooyiisi bí dijool pu Unimbɔti bíi dàkà-u u nín làá dū tin kɔkɔ kí mā circir kɔŋkooŋŋuee (Ayil 25–31), Isirayeel yab bíǹ nìn yāntì bi dū sindaariya ki mɔ́ɔ́-bi dinabil di fōō Unimbɔti paaŋŋu. An nìn yāntì Unimbɔti tāā ki bíikì bi-pu ní ki dáaĺ bi-tafal ŋkpitim pu (Ayil 32–34). Tibɔti tin bi dūu kúntì kugbɔŋu nee di sá bi nín máń circir kɔŋkooŋŋu laakin Unimbɔti dòoń ki nyāntí u-ba ki dàkèe puee (Ayil 35–40).

Binib bin kāl̀ kuyuŋu nín pée bí pu ku-ba ku-ba ŋyunti kamaa poonee, kugbɔŋu nee dàkà kun di sá á tɔ̄ a-ba ibaamɔn pu batɔlee. An di sá din Unimbɔti baba tìì kí yàntī unil nì u-nijutiibi nì úǹ Unimbɔti ń ŋá ubaantee.