Dinyeel 1

Dinyeel

gbɔŋku

ŊKILKAAMIN 1–11

Duulinya kíltam bɔti

1 Unimbɔti nín kíĺ ki náań kutagbɔŋu nì kitiŋee, 2 kitiŋ kaa nìn cáá dikíl ní tiba nì tiba kaa nìn bí ki-pu ní dibɔmbɔndi nìn bīī inyiŋfi pu. Kitiŋ nìn sá nnyim ŋma ní, ní Unimbɔti Fam nìn dàn̄ nnyimee pu. 3 Ní Unimbɔti bí yii: «Ŋwalifi ń nyā!» Ní ŋwalifi nyáń^a. 4 Ní Unimbɔti ká yii ŋwalifi ŋān̄, ní u cúú ŋwalifi nì dibɔmbɔndi ki yākatì tɔbin. 5 Ní Unimbɔti yíiń ŋwalifi yii ŋwiimpu ní ki yíiń dibɔmbɔndi yii kunyeeu. Ní kunyeeu mɔ́ ní kutaa dūu wúntì, ŋwimpeepeekaa dal dee^b.

6 Ní Unimbɔti bí yii: «Kugbɔŋu kubɔ ń nyā kí dàntī kí yàkatī inyiŋfi mili!» 7 Ní an ŋá míǹ. Míǹ ní Unimbɔti yāntì kugbɔŋuee nyáń ki dāntì ki cúú inyiŋfi in bí taapuee nì in bí yilpuee ki yākatì. 8 Ní Unimbɔti yíiń kugbɔŋuee yii kutagbɔŋu. Ní kunyeeu mɔ́ ní kutaa dūu wúntì, ŋwinliliiti dal dee.

9 Ní Unimbɔti bí yii: «Nnyim min dɔ̄ taapuee ń kóoǹ kí kpāfì dijandi diba, dijandi din kíǹee ń nīn sá ŋkulimmi!» Ní an ŋá míǹ. 10 Ní u yíiń dijandi din kūńee yii kitiŋ, ní ki yíiń nnyim min kóoǹ ki kpáfèe yii tiŋku. Ní u ká yii míǹ ŋān̄. 11 Unimbɔti bí yii: «Kumɔsɔŋu ń nyā kitiŋ pu, kumoou kamaa ń lòoǹ ku-boolii ní isufi mun ń nyā, busubu kamaa ń lòoǹ bu-boolii!» Ní an ŋá míǹ. 12 Ní kumɔsɔŋu nyáń kitiŋ pu, ní timool tin làá lòoǹ ibee lòon̄ tì nín sá dimɔcil diŋyee boolii, ní busubu kamaa mun lòon̄ bu nín sá disucil diŋyee boolii. Ní Unimbɔti ká yii míǹ ŋān̄. 13 Ní kunyeeu mɔ́ ní kutaa dūu wúntì, ŋwintataati dal dee.

14 Ní Unimbɔti bí yii: «Iwalfi ń nyā kí nīn bí kutagbɔŋu pu kí yàkatī ŋwiimpu nì kunyeeu, bí nīn cáa dāantí iyunti, kí nīn cáa kàaǹ iwiin nì abin nì iwiŋkpaan, 15 iwalfi gbantee ń nīn bí kutagbɔŋu pu ki ŋmíntí kitiŋ pu.» Ní an ŋá míǹ. 16 Míǹ ní Unimbɔti ŋá iwalfikpaan ili: ŋkpaŋkpaan di sá ŋwìiń, kutaa yaa wúntèe, ŋú nīn bí ki ŋmíntí. Kiwaai di sá uŋmal, kunyeeuee, ú nīn bí ki ŋmíntí, ní ki ŋá iŋmalbijaa mun. 17 Ní Unimbɔti dū i-kɔkɔ ki kāaǹ kutagbɔŋu pu í nīn ŋmíntí kitiŋ pu, 18 ŋubɔ ń nīn bí ki ŋmíntí ŋwiimpu, ŋun kíǹee ń nīn bí ki ŋmíntí kunyeeu. Unimbɔti ká yii míǹ ŋān̄. 19 Ní kunyeeu mɔ́ ní kutaa dūu wúntì, ŋwinnanaati dal dee.

20 Ní Unimbɔti bí yii: «Tiwan tin cáá kufoouee ń kpátí kí gbí nnyim poon dàaa, inoon mun ń nīn bí kutaa pu ki ŋàaǹ.» 21 Ní Unimbɔti náań tiwambilindi tin kóò nnyiminee nì tin kɔkɔ cáá kufoou ki kpátìi gbí nnyim poonee nì ti-buluku ti-buluku. U náań inoon kɔkɔ nì i-buluku i-buluku. Unimbɔti ká yii míǹ ŋān̄. 22 Ní Unimbɔti bīiǹ ti-boon ki bí-tì yii: «Ní bùtī kí gbí tiŋku, inoon mun ń bùtī kí gbí kitiŋ!» 23 Ní kunyeeu mɔ́ ní kutaa dūu wúntì, ŋwiŋŋmooŋmooti dal dee.

24 Ní Unimbɔti bí yii: «Tiwan tin fòotēe kɔkɔ kubuluu kubuluu ń nyā kí nīn bí kitiŋ pu, an dàkà yii tiwaŋkuti nì tin fù ti-biŋŋi puee nì ipeel ń nyā!» Ní an ŋá míǹ. 25 Ní Unimbɔti nyántì kumooun peelii kɔkɔ kubuluu kubuluu nì tiwaŋkuti kɔkɔ kubuluu kubuluu nì tin kɔkɔ fù ti-biŋŋi puee kubuluu kubuluu. Ní Unimbɔti ká yii míǹ ŋān̄.

Unimbɔti náań unil

26 Ní Unimbɔti bí yii: «Tí náań unil kí nántíǹ ti-ba, ú nīn náań nì ti, kí nīn cáá mpɔn ijɔm nì inoon pu, kí nīn cáá mpɔn tiwaŋkuti nì ipeel kɔkɔ nì tin kɔkɔ fù ti-biŋŋi pu ki bí kitiŋ puee pu!»

27 Ní Unimbɔti náań unil ki nántiǹ u-ba,

u náań-u ki nántiǹ úǹ Unimbɔti u-ba ní.

U nìn náań uninja nì unimpu ní^c.

28 Ní Unimbɔti bīiǹ bi-boon ki bí-bi yii: «Ní màal̀ kí bùtī, binib ń gbí kitiŋ. Ní nīn cáá mpɔn kitiŋ pu nì ijɔm nì inoon nì tin kɔkɔ pée fù ti-biŋŋi pu ki bí kitiŋ puee pu!» 29 Ní Unimbɔti kútì yii: «M dū tin kɔkɔ lòoǹ ibi ki yú kitiŋ jaŋŋi kɔkɔ puee nì isufi in lòoǹ asubilee ki tīī-ni, án nīn sá ni-jinti. 30 Míǹ mbaantiim, m dū timool ki tīī tiwaŋkuti tin bí kitiŋ puee kɔkɔ nì inoon kɔkɔ nì tin kɔkɔ pée fù ti-biŋŋi pu, ki bí kitiŋ pu ki cáá kufoouee án nīn sá tì-jinti.» Ní an ŋá míǹ. 31 Unimbɔti ká yii tin kɔkɔ u ŋée ŋān̄ tikpil. Ní kunyeeu mɔ́ ní kutaa dūu wúntì, ŋwinluluuti dal dee.