Dinyeel 2

1 Míǹ ní Unimbɔti náań kutagbɔŋu nì tin kɔkɔ bí ku-puee, ní ki náań kitiŋ nì tin kɔkɔ bí ki-puee ki dóò. 2 Unimbɔti túń u-tuuŋŋi ki dóò, ní ŋwinluluútee, u kāl̀ ki ŋūŋfì atuun ŋin kɔkɔ u ŋée pu. 3 Míǹ puee Unimbɔti bīiǹ ŋwinluluútee pu ní ki gāntì-ŋu ki síiǹ u-ba, kun puee ŋwiin gbanti ní u kāl̀ ki ŋūŋfì atuun ŋin kɔkɔ u ŋáaǹee pu^a. 4 Kutagbɔŋu nì kitiŋ náantam nín kíĺ puee dee.

Eedeen kpaabun bɔti

Ŋyunti ŋun ti-Dindaan Unimbɔti nyántì kitiŋ nì kutagbɔŋuee, 5 kisubiki báà kiba kaa nìn dáá nyáń kitiŋ pu, ní kumoou báà kubɔ mun kaa nìn dáá nyáń, kun puee ti-Dindaan Unimbɔti kaa nìn dáá yāntì utaa nìn̄. Unil mun nìn kpá kí kpɔ̀ tikpaal kitiŋ pu. 6 Ama kitiŋ taapu ní nnyim nìn nyēeń ki sɔ̀ŋkī an kɔkɔ.

7 Ti-Dindaan Unimbɔti dū ntam ní ki máń unil, ní ki púfì ŋfam ki ŋá u-maŋfataabuŋyin, ní u kpántì unifoo^b. 8 Ní ti-Dindaan Unimbɔti náań isufi kpaabu Eedeen tiŋki poon, bu bí ŋwìiń nyalaŋki pú, ní ki dū unil un u máńee ki kāaǹ bukpaayee poon. 9 Ti-Dindaan Unimbɔti yāntì isufi in biliŋ ŋān̄ ŋkpèé nì diŋmɔlee nyáń ki bí i-ba i-ba, ní busubu bun tìì dimaŋfalee nì bun yàntī bi béetí tiŋan nì tikpitilee yú bukpaayee kansikin^c.

10 Ní mbun ŋubɔ nyēeń Eedeen tiŋkin ki sɔ̀ŋkī bukpaayee. Bukpaayee poon ní mbunee cúu yākatì abuntaa anaa. 11 Dibuntaapeekaal ní bi yíì Piisɔn. Díǹ di māntìi tú Afiila tiŋki kin poon ní sindaariya bée. 12 Kitiŋ gbanti sindaariyau sá umɔnti ní, ní talaalu un bi yíì bideeliyoomee nì ataŋkpamɔnti ŋin bi yíì soowamee bí niin. 13 Dibuntaaliliitiilee ní bi yíì Giiyɔn. Díǹ di māntìi tú Kusa tiŋki kɔkɔ. 14 Bi nìn yíì dibuntaatataatiilee yii Tiiga. Díǹ di pùubìń Asuur tiŋkin, ŋwìiń nyalaŋki pú. Dibuntaananaatiil ní bi yíì Eefiraati.

15 Ní ti-Dindaan Unimbɔti dū unil ki kāaǹ Eedeen kpaabun ú nīn kù-bu kí nīn kpèé-bu. 16 Ní ti-Dindaan Unimbɔti síiǹ unil mara nee yii: «A ŋūǹ kí ŋmɔ́ isufi in yú bukpaanee kɔkɔ biliŋ, 17 ama busubu bun bil a yaa ŋmɔ́ a làá béé tiŋan nì tikpitilee ní á taa ŋmɔ́. Daliŋkin a yaa ŋmɔ́ busubu gbanti bilee, a làá kpú ní.»

18 Ní ti-Dindaan Unimbɔti bí yii: «An kaa ŋān̄ unil ń nīn bí u-baba míǹ. M làá náań un làá nīn tútúǹ-uee kí ŋàl̄-u.» 19 Ní u dū ntam ki máń ipeel nì inoon kɔkɔ ní ki cáań-i unil cee kí kpèè u nín làá pɔ̄-i ayin puee, án nín làá ŋá pu ní ipeel kɔkɔ ń nīn cáá ayin ŋin unil pú-iee. 20 Míǹ ní unil pú tiwaŋkuti kɔkɔ nì inoon nì ipeel kɔkɔ ayin. Ama unil u-ba kaa ká un làá nīn bí ki kɔ́ĺ-u kí nīn tútúǹ-uee. 21 Ní ti-Dindaan Unimbɔti yāntì ŋgeembiim miba dɔ́miń ki cúú unil ní u gèen̄. Ŋyunti ŋun u bíi gèeǹee ní ti-Dindaan lēē u-takakalkpabil diba ní ki fātìi dūu bīiǹ. 22 Ti-Dindaan Unimbɔti dū ditakakalkpabil din u lēē unilinee ki máń unimpu ní ki cáań-u unil cee. 23 Ní unil bí yii:

«Kpèè min bí nee, m-kpabiŋ kpabil sèé,

m-wunnanti nanti sèé.

Un bí nee ní bi làá nīn yíì unimpu.

Kun puee uninjan ní bi lēeń-u.»

24 An pu ní uninja dāa nyēē u-ba kaa ti bí u-baa nì u-na cee ní u nì u-nimpuu ń kɔ́ tɔbin, ní kí kpántí ŋwuŋgbambaanti^d.

25 Uninja nì unimpu nìn pée bí dicancaŋgbeel ní kaa nìn cáá tɔb pu icoo.