Dinyeel 3

Adam nì Awa yīntiǹ Unimbɔti

1 Ukoobu di nìn nyí diŋmatindi ipeel in ti-Dindaan Unimbɔti nìn náańee kɔkɔ kansikin. Dalbee ní u dɔ́miń ki bí unimpu yii: «Tiŋman ní Unimbɔti lafun lī yii ní taa ŋmɔ́ bukpaa nee poon subiliŋaaa?» 2 Ní unimpu kíí-u yii: «Ti ŋūǹ kí ŋmɔ́ isufi in yú bukpaa poonee biliŋ. 3 Ama busubu bun yú bukpaa kansikinee bil ní Unimbɔti bí yii tí taa ŋmɔ́ kí taa gbēē-bu, an yaa sá fám ti làá kpú.» 4 Niinee ní ukoobu bí unimpu yii: «Kaa sá míǹ, naa làá kpú. 5 Di sá Unimbɔti nyí yii daliŋkin ni yaa ŋmɔ́ busubu gbanti bilee, ni-nimbiliŋ làá ŋúbití ní ní nīn kíǹ ki nyí tiŋan nì tikpitil kii úǹ Unimbɔti nín nyí puee.»

6 Unimpu mun ká yii busubuee bil ŋān̄ ki mɔ̄ diŋmɔl, ki cáá nnimbitaataam, ki lafun máaǹ kí ŋúbití unil nimbiliŋ, ní u kītì ki ŋmɔ́. U-cal bí u-cee ní u tīī u mun ní u ŋmɔ́. 7 Niinee ní bi-liitil nimbiliŋ cúu ŋúbitì ní bi ká yii bi bí dicancaŋgbeel, ní bi tīfì busubu bun bi yíì fiigee faati ki ŋáĺ ki dūu lōoǹ.

8 Kujoou jóotì kubuŋu bíi jītí fílfilee ní bi gbìl̄ ti-Dindaan Unimbɔti pu u bí ki còom̄ bukpaan. Ní bi sáǹ ki bál̀-u bukpaayee sufii kansikin. 9 Ní ti-Dindaan Unimbɔti yíiń uninja yii: «A bí la ní?» 10 Ní u kíí-u yii: «M nín bí bukpaan ki gbìl̄ a-puee ní m fāŋkì, kun puee m bí dicancaŋgbeel, an pu ní m bál̀.» 11 Ní ti-Dindaan Unimbɔti bí-u yii: «Ŋma tùkū-si yii a bí dicancaŋgbeel? Àá a ŋmɔ́ busubu bun bil m kpáafì-si yii á taa ŋmɔ́ee ní?» 12 Ní uninja kíí-u yii: «Unimpu un a cáań ki ŋàl̄-mee di kītì disubil gbanti ki tīī-mi ní m ŋmɔ́.»

13 Ní ti-Dindaan Unimbɔti bí unimpu yii: «Ba di yì-tì ní a ŋá míǹ?» Ní unimpu kíí-u yii: «Ukoobu di kíil̀-mi ní m ŋmɔ́^a.»

14 Ní ti-Dindaan Unimbɔti bí ukoobu yii:

«An nín ŋá pu ní a ŋá mimmee,

m tɔ́-si mbusu tiwaŋkuti nì ipeel kɔkɔ kansikin.

A làá nīn kíǹ ki fù a-bindi pu ní.

A-jinti di làá nīn kíǹ ki sá ŋkpɔŋkpɔm

kí tin sāā a-kúm dal.

15 M làá náań kudɔ̀ŋu kí bíĺ sii nì unimpu kansikin,

kí bíĺ a-maaliŋu nì u-maaliŋu kansikin.

U-maaliŋu làá dāá tāā kí mátí a-yil,

ní sii ń dāá jú úǹ tagbíndi^b.»

16 Ní u bí unimpu yii:

«A nín ŋá miŋyee, m làá gbéeǹ-si timatíǹdi gìńdi.

Nì falaa ní a làá nīn màal̀ a-biyaamu.

A-cal neeliŋu làá nīn pée cáá-si,

ama úǹ di làá nīn cáá sii pu mpɔn.»

17 Ní ki bí uninja yii:

«A nín ŋá pu ki pílifì a-nimpuu nyɔkɔ

ní ki ŋmɔ́ busubu bun bil man kpáafì-si yii á taa ŋmɔ́ee,

a-puee m tɔ́ kitiŋ mbusu.

A làá nīn ŋáań falaa

ní kí nín ká tijin kí jī.

Míǹ ní án làá nīn bí-si

áli kí tin sāā a-kúm dal.

18 «Apɔn nì abɔjanaakun di làá nīn nyēē a-kpaabun,

a-kpaajinti ní a làá nīn jīǹ^c.

19 See á tɔ̄ ditundi kí káaĺ kutuntuŋu a-yigbeel pu

ní kí wàatī kí nín ká tijin kí jī.

Án làá nīn pée bí-si míǹ ní,

áli á dāá fàtīí gítí ntam min m lēē ki máń-see poon.

Kun puee a sá ŋkpɔŋkpɔm ní

ki làá fàtīí gítí ŋkpɔŋkpɔm.»

20 Ní uninja pú u-nimpuu diyindi yii Awa, taapu di sá yii un bí dimaŋfalinee, kun puee úǹ di sá binifoobi kɔkɔ na. 21 Ní ti-Dindaan Unimbɔti dū tigban ki lōoǹ Adam nì u-nimpuu. 22 U ŋá míǹ ki dóòyee ní ki bí yii: «Kɔŋkɔnnee, unil kpántì kii ti-kansikin ubɔ dee, ki kíǹ ki nyí tiŋan nì tikpitil. Tí taa yàntī ú ŋmɔ́ dimaŋfal subil kí nīn bí jaanjaan kaa kúù^d.» 23 Niinee ní ti-Dindaan Unimbɔti jìn̄-u Eedeen kpaabun ú cù kí nīn kù kitiŋ kin pu bi lēē ki máń-uee. 24 U jìn̄ unil mimmee ní ki cáań keerubimbi^e ki yóoǹ bukpaayee nyɔkɔpu ŋwìiń nyalaŋki pú, bi ŋúb́ kitàataajiki ki fīintí an ŋmóò làka laka, ki yú dimaŋfal subu saŋŋu pu ki cí-ŋu.