Dinyeel i

Dinyeel

gbɔŋku

Tibɔkilkaal

Unimbɔti bɔti gbɔmpeepeekaaku ní bi yíì yii «Dinyeel gbɔŋku», an dàkà yii tiwan kɔkɔ nyeel. Kugbɔŋu gbanti sòoǹ duulinya nyeel nì inifunaan nì Unimbɔti nibul Isirayeel yab bɔti nín kíĺ puee ní.

Diyil 1-11 dàkà-ti tí béé duulinya un poon ti bí nee taapu, tí béé unil nín sá uŋyee, u-paaŋŋu nín sá ŋun duulinya poonee. Ba pu ní binib kansikin pèéŋu kpántí tilool múlmul ní? An cáá nnyɔkɔ bi cāantáaa? An bɔti tin dáá gbíntìi bí áli nì díǹ nee pu ní Dinyeel gbɔŋku dijampeepeekaal nee sòoǹ. Diyil 1–2 dàkà yii uninja nì unimpu bí tiwannáaŋkaal poon, ní ayil 3 sòoǹ bi nì Unimbɔti kansikin nín bíil̀ puee, ní ayil 4 sòoǹ Kaayeen nì Abeel bɔti. Ayil 6–9 sòoǹ Noowa nì nnyiŋgbeen bɔti, ní ayil 11 sòoǹ Babeel difɔkɔku bɔti. Taa baasii ŋūǹ kí béé abin nì iyunti in ní an bɔtee nìn jítì inifunaan puee deedee.

Ayil 12–50 sòoǹ nì ti min ní Unimbɔti yíiń Isirayeel yab naanjab bipeepeekaabi bí tɔ̄ úǹ Unimbɔti tundee, nì u nín dī bi-pu ki fīī inifunaanee. Upeepeekaa di sá Abraam (ayil 12.1–25.18). U nìn nyántì u-fookiiu nì u nín tɔ́ Unimbɔti puee ki dàkā. U làá nīn pée sá ŋabika ní kí nīn pée cáa cá jaanjaan. U nì u-jipɔɔn Isaaki, nì u-naantiiu Jaakɔb (ayil 25.19–36.43) un bi nìn gíti yíì yii Isirayeelee, nì Jooseefi (ayil 37.2–50.26), Jaakɔb jipɔɔn ubɔ. Úǹ di sá tinaakɔti tili naanja un pu ní Jaakɔb nì u-jipɔmbi bin kíǹee nì bi-dicaŋŋi dī ki cūtì Eejipiti tiŋkinee.

Mpeekaaminee, Dinyeel gbɔŋku sá kí baasii dàkà tin Unimbɔti ŋée ní. Kugbɔŋu gbanti kíĺ ki dàkā ibaamɔn yii Unimbɔti di náań duulinya, an dàkà yii Unimbɔti sá ukpaŋkpaan, ní tin kɔkɔ u náańee bí u-taapu. Kí kúntée, Dinyeel gbɔŋku sòoǹ yii Unimbɔti làá nīn gbíntìi kpèé u-nibul kii u nín pōoǹ-bi puee. Kí yòon̄ Dinyeel gbɔŋku kílilaŋki kí cáá sāā u-kúntilaŋkee, Unimbɔti di sá mbaa. U yàntī bi béetí-u, ki sòoǹ binib bɔti nì ibaamɔn, ki kpòotī u-nibul, ki tútúǹ-bi, ní ki bɔ́ntí bi-bɔti ki tìì-bi.

Kun Unimbɔti bàlifī yii tí ŋée di sá tí fōō-u, u nì ipoon in u pōoǹee kí kíí, kí nīn tɔ́ u-bɔkpaaŋi nì u-marab.

Isirayeel yab yaajatuuŋŋi bɔti ní bi ŋmàn̄ ki ŋá kugbɔŋu nee poon, báà ŋma ń béé dinibul gbanti nín nìn cáá fookii Unimbɔti pu miŋyee, án nín làá ŋá pu ti mun ń nīn ŋúb́ ti-fookiiu Unimbɔti pu an nīn pɔ̄ɔ̄yee.