Akoobil i

Isirayeel yab koobiliŋ

gbɔŋku

Tibɔkilkaal

Bisaraaŋaliibi di ŋmàn̄ kugbɔŋu nee. Bi nìn sá Leefii naakookun yab ní. An pu ní biba yíì kugbɔŋu gbanti yii Leefii yab gbɔŋku.

Isirayeel yab koobiliŋ gbɔŋku yakatikaabi upeepeekaa tùkù-ti yii Unimbɔti yíiń Mooyiisi u-circir kɔŋkooŋŋun ki sòon̄ nì u. Kugbɔŋu nee kɔkɔ poonee, ti kāntí yii Unimbɔti dū akoobil nì marab tikpil ki tīī Mooyiisi ú dūú nàatī Isirayeel yab, ní ki kútì-bi dipoondi yii: «Un yaa ŋáań min marab gbanti lēe di ŋmátí» (18.5, an gíti kā Room 10.5).

Kí kūlifì tibɔtee, Unimbɔti nìn bíi cántí ki tùkù Isirayeel yab bi nín máaǹ kí kàkatī bi-ba kí wàatī tin kɔkɔ làá yàkatī bi nì úǹ Unimbɔti kansikinee, nì bi nín máaǹ kí ŋá pu ní circir kɔŋkooŋŋu ń lafun nín̄ sá laakin ní bi nì Unimbɔti kpáfée. An sá yii bin ŋáań saraabee ń nóó saraabi ŋátam koobiliŋ (Ayil 1–7), bisaraaŋaliibi bimbim ń nīn kítì ní binib ń nīn tɔ́-bi (8–10), ní unil kamaa ń pɔ́ɔǹ u-ba kí fá ŋwuŋgban pu jɔkɔnti (ayil 11–16) ní kí nīn ŋúb́ kitiŋ pu marab nì dinimbɔtinool marab deedee (17–27).

Dimaŋfal Nimbɔtiu un bí circir ki sá dineendidaanee là yii u-nibul mun ń nīn bí circir kii úǹ u-ba nín bí circir puee ní (19.2), kí nīn cáá dimaŋfal nì dineendi. An pu ní u nìn tīī Isirayeel yab mara nee yii: «Ní nīn néeń ni-jutiibi kii nimbi ni-bee» (19.18). Ti-Dindaan Yeesu mun nìn nyīī mara gbanti pu ŋŋal ki dàkā yii u-bɔti páb́ (kpèè Maat 22.39).

Waanee nib yaa bíi kàaǹ akoobil nee bɔtee, an ŋáań-bi bitii. Ama ŋi téetí fookiidaan báà laakin ní u yaa bée nì ŋyunti ŋun kamaa poon ní u yaa bée, yii unil ń nīn cáá dikpafindi nì Unimbɔtee bɔti lafun páb́.