Akoobil 1

Isirayeel yab koobiliŋ

gbɔŋku

SARAABI NÍN BÍ TƆBIN PUEE BƆTI

(Ayil 1–10)

Saraawɔkaa

1 Ti-Dindaan yíiń Mooyiisi circir kɔŋkooŋŋun ní ki sòon̄ nì u ki bí-u yii: 2 «Sòoǹ nì Isirayeel yab kí tùkù-bi yii:

«Ni-kansikin ubɔ yaa là kí ŋá saraa kí tīī ti-Dindaanee, udaan ń dū unaa àá upii àá uŋoobu ní kí ŋá saraa gbanti.

3 «An yaa sá unaa ní udaan cáań kí ŋá saraawɔkaayee, ú nīn sá uja un laaba kaa wɔ̀b̄ee. Ú cáań-u dikpafindi tantiu punyɔkɔki nyɔkɔpu ní ti-Dindaan ń nín fōō u-saraau^a. 4 Ú dū u-ŋal kí páań kuwaŋkuluuee yil pu ní ti-Dindaan ń nín fōō u-saraau ní kí dū u-kpitii kí pɔ̄-u. 5 Ú làntì unaayee circir kɔŋkooŋŋu nyɔkɔpu ti-Dindaan nimbiin. Ní Aarɔn jipɔmbi bisaraaŋaliibi ń dū unaayee fatikuu kí yàaǹ kí màntīí tū nsaraafan ŋun bí circir kɔŋkooŋŋu punyɔkɔki caŋinee. 6 Ú lēē unaayee gbaŋŋu, kí càkà u-nanti. 7 Usaraaŋakpil^b Aarɔn jipɔmbi ń kpāā ŋŋmi nsaraafan pu ní kí dū idɔ kí páań. 8 Bí dū tinan tin bi càkēe nì diyil nì ŋkpam kí páań idɔ in bi dūu páaǹ ŋŋmi pu nsaraafan puee. 9 Un cáań kuwaŋkuluuee ń dū nnyim kí fíntí ina nì ayaka ní usaraaŋal ubɔ ń dū tinanee kɔkɔ kí wà ŋŋmi nsaraafan pu. An di sá saraawɔkaa, saraa un ní bi dù tinan kɔkɔ kí wà ŋŋmi, u-sɔnsɔfiŋu sɔ̀ŋkī ti-Dindaan pɔbilee.

10 «An yaa sá upii àá uŋoobu ní udaan cáań kí ŋá saraawɔkaayee, kuwaŋkuluuee laaba ń taa nīn wɔ̀b̄. 11 Ú làntì-ku circir kɔŋkooŋŋu nyɔkɔpu ti-Dindaan nimbiin, nsaraafan caŋin, ŋgan pú. Aarɔn jipɔmbi bisaraaŋaliibi ń dū fatiku kí yàaǹ nsaraafan jaŋŋi kɔkɔ pu kí màntīí tū. 12 Ú càkà tinanee ní kí dū diyil nì ŋkpam kí kūtì, ní usaraaŋal ubɔ ń dūú páań idɔ in bi dūu páaǹ ŋŋmi pu nsaraafan puee. 13 Un cáań kuwaŋkuluuee ń dū nnyim kí fíntí ina nì ayaka ní usaraaŋal ubɔ ń dū tinanee kɔkɔ kí wà ŋŋmi nsaraafan pu. An di sá saraawɔkaa, saraa un ní bi dù tinan kɔkɔ kí wà ŋŋmi, u-sɔnsɔfiŋu sɔ̀ŋkī ti-Dindaan pɔbilee.

14 «An yaa tí sá unoon ní udaan cáań kí ŋá saraawɔkaa kí tīī ti-Dindaanee, an nīn sá kinanjilii àá dibeenanjil. 15 Usaraaŋal ubɔ ń fōō unoonee kí cáá cùnnì nsaraafan caŋin, kí tùkutī diyil kí dūú wà ŋŋmi nsaraafan pu, ní kí dū u-fatikuu kí còol̀ nsaraafan kpiŋŋi pu. 16 Ú lēē kunyannyanciliu nì tin kā ku-poonee kí fá nsaraafan caŋin ŋwìiń nyalaŋki pú, laakin bi bīil̀ ŋkpam min bi wùn̄ee fantamee. 17 Ní ú cúú unoonee kí dáaĺ kí cátí mili ifeen kansikin án taa nàbitī, ní kí dūú páań idɔ in bi dūu páaǹ ŋŋmi pu nsaraafan puee án wà. An di sá saraawɔkaa, saraa un bi dù tinan kɔkɔ kí wà ŋŋmi u-sɔnsɔfiŋu sɔ̀ŋkī ti-Dindaan pɔbilee.»