Akoobil 2

Tijimpin saraau

1 «Ubɔ yaa là kí cáań tijimpin saraau kí tīī ti-Dindaanee, án nīn sá ŋyim. Ú bàtī ŋkpam kí sìtī, kí dū talaalutuukaa kí páań, 2 ní kí cáań kí tīī Aarɔn jipɔmbi bisaraaŋaliibi. Usaraaŋal un làá ŋá saraa gbantee ń yáfí ŋyim diŋaŋkul din sá kudaaŋŋu ti-Dindaan nimbiin yii úǹ di yì saraa gbantee kí dū ŋkpam kí búuń ní kí dū talaalutuukaa un bi cáańee kɔkɔ kí kūtì kí dūú wà ŋŋmi nsaraafan pu. An di sá saraa un sɔnsɔfiŋu sɔ̀ŋkī ti-Dindaan pɔbilee. 3 Saraayee jandi din kíǹee, Aarɔn nì u-jipɔmbi di yì. Dijandi gbanti sá circir páaa wanti ní, kun puee an sá saraa un bi lēē ki wùn̄ ŋŋmi ki tīī ti-Dindaanee ní.

4 «An yaa sá tijin tin bi púĺ dibubulinee ní ubɔ yaa cáań kí ŋá saraayee, án nīn sá kpɔnɔ un bi dū ŋyim ki búuń ŋkpamin ki púĺ an kaa cáá ŋkpɔnɔnyɔkɔee. 5 An yaa sá tijin tin bi pūul̀ titaŋkpapilindi puee saraauee, ú dū ŋkpam kí búuń ŋyim kí taa ŋá ŋkpɔnɔnyɔkɔ. 6 Ú càkà càkà-u ní kí bàtī ŋkpam kí sìtī an pu. Tijimpin saraau dee. 7 An yaa tí sá tijin tin bi tòó kikpasaŋ poonee saraauee, ú dū ŋkpam kí búuń ŋyim kí ŋá tijin gbanti. 8 Ú cáań saraa un u bɔ́ntì kí tīī ti-Dindaanee kí ŋúbiǹ usaraaŋal ní úǹ ń fōō kí cáá síiń nsaraafan caŋin. 9 Saraa gbanti poonee, usaraaŋal ń lēē dijandi din sá kudaaŋŋu ti-Dindaan nimbiin yii úǹ di yì saraa gbantee kí wà ŋŋmi nsaraafan pu. An di sá saraa un bi dùú wà ŋŋmi u-sɔnsɔfiŋu sɔ̀ŋkī ti-Dindaan pɔbilee. 10 Dijandi din kíǹee, Aarɔn nì u-jipɔmbi di yì. Dijandi gbanti sá circir páaa wanti ní, kun puee an sá saraa un bi lēē ki wùn̄ ŋŋmi ki tīī ti-Dindaanee ní.

11 «Tijimpin saraau un kamaa ni làá ŋá kí tīī ti-Dindaanee, ŋkpɔnɔnyɔkɔ ń taa nín̄ bí poon. Ubɔ kaa tí máaǹ kí dū ŋkpɔnɔnyɔkɔ àá tisiil kí ŋá saraa kí wà ŋŋmi kí tīī ti-Dindaan. 12 Ama u ŋūǹ kí cáań kí ŋá tijincɔ̀fikaal saraau kí tīī ti-Dindaan. Ú taa pée dū-tì kí wà ŋŋmi nsaraafan pu kii saraa un sɔnsɔfiŋu sɔ̀ŋkī ti-Dindaan pɔbilee.

13 «Tijimpin saraau kamaa poon máaǹ kí nīn cáá ŋyaam. Ú taa pée yàntī ŋyaam min sá ni-Nimbɔtiu poondi daaŋkuee ń lóó u-saraabi poon.

14 «Tijincɔ̀fikaal ní ubɔ yaa cáań kí ŋá saraa kí tīī ti-Dindaanee, ú púĺ ifin kí yìlifì abil ní kí cáań kí ŋá saraa. 15 Ú bàtī ŋkpam kí sìtī an pu ní kí dū talaalutuukaa kí páań. Tijimpin saraau dee. 16 Usaraaŋal ń dū saraayee, an dàkà yii abil ŋin bi yīlifèe dijandi nì ŋkpamee nì talaalutuukaayee kɔkɔ kí wà ŋŋmi. An di sá tijimpin saraau un bi dùú wà ŋŋmi kí tīī ti-Dindaanee.»