Akoobil 3

Mpèé saraau

1 «Ubɔ yaa lēē u-nacaŋkpuŋkun unaa kí ŋá mpèé saraauee, ú nīn sá uja àá usal un laaba kaa wɔ̀b̄ee. Ú cáań-u circir kɔŋkooŋŋu nyɔkɔpu ti-Dindaan nimbiin. 2 Ú dū u-ŋal kí páań kuwaŋkuluuee yil pu, kí làntì-ku circir kɔŋkooŋŋu punyɔkɔki nyɔkɔpu, ní Aarɔn jipɔmbi bisaraaŋaliibi ń dū fatiku kí yàaǹ nsaraafan jaŋŋi kɔkɔ pu kí màntīí tū. 3 Tin bi làá lēē mpèé saraau gbanti poon kí wà ŋŋmi kí tīī ti-Dindaanee di sá ŋkpam min bīī ina puee nì ŋkpam min pá i-puee, 4 nì aceebil liitil nì ŋkpam min pá ŋi nì ntikakal puee, ní kí lēē mpɔɔlam kɔkɔ kí nákatí kí kpáaǹ aceebil dicilpu. 5 Ní Aarɔn jipɔmbi ń dūú kūtì saraawɔkaa un pá idɔ in bi dūu páaǹ ŋŋmi pu nsaraafan puee. An di sá mpèé saraau un bi dùú wà ŋŋmi u-sɔnsɔfiŋu sɔ̀ŋkī ti-Dindaan pɔbilee.

6 «An yaa sá upii àá uŋoobu ní ubɔ cáań kí ŋá saraa kí dàkà u nì ti-Dindaan kansikin pèéŋuee, án nīn sá uja àá usal un laaba kaa wɔ̀b̄ee. 7 An yaa sá dipibil ní udaan cáań kí dūú ŋá saraayee, ú cáań-dì ti-Dindaan nimbiin. 8 Ú dū u-ŋal kí páań dipibilee yil pu ní kí làntì-dì circir kɔŋkooŋŋu punyɔkɔki nyɔkɔpu ní Aarɔn jipɔmbi ń dū di-fatikuu kí yàaǹ nsaraafan jaŋŋi kɔkɔ pu kí màntīí tū. 9 Tin bi làá lēē mpèé saraau gbanti poon kí wà ŋŋmi kí tīī ti-Dindaanee di sá ŋkpam: dijugbindi^a din bi lēēyee kɔkɔ nì ŋkpam min bīī ina puee nì ŋkpam min kɔkɔ pá i-puee, 10 nì aceebil liitil nì ŋkpam min pá ŋi nì ntikakal puee, ní kí lēē mpɔɔlam kɔkɔ kí nákatí kí kpáaǹ aceebilee dicilpu. 11 Niinee ní usaraaŋal ń cáá wà ŋŋmi nsaraafan pu. An di sá tijin saraau un bi dùú wà ŋŋmi kí tīī ti-Dindaanee.

12 «An yaa sá uŋoobu ní udaan cáań kí dùú ŋá saraayee, ú cáań-u ti-Dindaan nimbiin. 13 Ú dū u-ŋal kí páań uŋoobuee yil pu ní kí làntì-u circir kɔŋkooŋŋu punyɔkɔki nyɔkɔpu ní Aarɔn jipɔmbi ń dū u-fatikuu kí yàaǹ nsaraafan jaŋŋi kɔkɔ pu kí màntīí tū. 14 Tin bi làá lēē saraa gbanti poon kí wà ŋŋmi kí tīī ti-Dindaanee di sá ŋkpam min bīī ina puee nì ŋkpam min kɔkɔ pá i-puee, 15 nì aceebil liitil nì ŋkpam min pá ŋi nì ntikakal puee ní kí lēē mpɔɔlam kɔkɔ kí nákatí kí kpáaǹ aceebilee dicilpu. 16 Niinee ní usaraaŋal ń dūú wà ŋŋmi nsaraafan pu. An di sá tijin saraau un bi dùú wà ŋŋmi u-sɔnsɔfiŋu sɔ̀ŋkī ti-Dindaan pɔbilee.

«Tin kamaa pée sá ŋkpamee, ti-Dindaan di yì. 17 Án nīn sá dibɔkpaal din làá nīn bí ki cá jaanjaanee ki tīī ni nì ni-biyaamu yii báà laakin kamaa ní ni yaa bàn̄ ki kóòyee, ní nīn nyí yii naa máaǹ kí ŋmɔ́ kuwaŋkuluu fatikuu nì ku-kpam.»