Ikpiti pɔ̄tam saraau a. Usaraaŋakpil saraau
«Ubɔ yaa kaa nyí ní ki yīntì ki ŋá tin ti-Dindaan marab nee kansikin ubɔ bí yii bí taa ŋée,
3 «an yaa sá usaraaŋakpil di ŋá ikpiti ní u-kpitii gbanti yāntì samaa kɔkɔ kɔ́ ikpitinee, u máaǹ kí cáań dinabil din laaba kaa wɔ̀b̄ee kí ŋá ti-Dindaan saraa ní kí nín ká u-kpitii pɔ̄tam. 4 Ú cáań dinabilee circir kɔŋkooŋŋu punyɔkɔki nyɔkɔpu ti-Dindaan nimbiin, kí dū u-ŋal kí páań dinabilee yil pu ní kí làntì-dì ti-Dindaan nimbiin niin. 5 Usaraaŋakpil ń dū dinabilee fatikuu kí kɔ́ǹ circir kɔŋkooŋŋu poon, 6 ní ti-Dindaan nimbiin niinee ní ú dū u-ŋambiki kí sēē fatikuee kí dūú yàaǹ ŋŋaabu ŋun bi dūu pītì ki yākatì circir páaa nì circir laŋkee pu ŋfunyɔm miluli. 7 Usaraaŋakpil ń bàtī fatikuee kí ŋmìtī nsaraafan ŋun pu bi tùutī talaalub ŋu bí circir kɔŋkooŋŋun, ti-Dindaan nimbiinee yiŋyi pu. Ú dū fatiku un kíǹee kɔkɔ kí kpáatí kí pɔ̀l̄ saraawɔkaa faŋŋu ŋun bí circir kɔŋkooŋŋu punyɔkɔki nyɔkɔpuee taapu. 8 Ú lēē tinan tin pée cáá ŋkpam ikpiti pɔ̄tam saraau gbanti poonee, an dàkà yii ŋkpam min bīī ina puee nì ŋkpam min kɔkɔ pá i-puee, 9 nì aceebil liitil nì ŋkpam min pá ŋi nì ntikakal puee, ní kí lēē mpɔɔlam kɔkɔ kí nákatí kí kpáaǹ aceebilee dicilpu, 10 kii bi nín lèekī dijandi din mpèé saraau poonee. Ní usaraaŋakpil ń cáá wà ŋŋmi saraawɔkaa faŋŋu pu. 11 Ama dinabilee gbaŋŋu nì di-nanti kɔkɔ nì di-yil nì di-yakaŋ nì di-binti kɔkɔee, 12 an dàkà yii dinabilee nanti tin pée kíǹee kɔkɔee, ú cáá nyāntí dinaapaal kpaanceetiŋu mpaan ŋun pu bi féeń ŋkpam min bi wùn̄ee fantamee ní kí dūú wà ŋŋmi idɔ pu. Difantancundee pu ní bí dūú wà ŋŋmi.»
b. Samaa kɔkɔ saraau
13 «An yaa sá Isirayeel nikitil kɔkɔ di yaa kaa nyí ní ki yīntì ki ŋá tin ti-Dindaan marab nee kansikin ubɔ bí yii bí taa ŋée, bi fōō dibɔkpil. 14 Boonee bi yaa láa béè ikpiti in bi ŋée, samaa kɔkɔ ń cáań dinabil kí ŋá ikpiti pɔ̄tam saraau. Bí cáań-dì circir kɔŋkooŋŋu punyɔkɔki nyɔkɔpu, 15 ní bitindaŋkpilib ń dū bi-ŋalii kí páań dinabilee yil pu ní bi-kansikin ubɔ ń làntì-dì ti-Dindaan nimbiin niin. 16 Usaraaŋakpil ń yòon̄ dinabilee fatikuu kí cáá kɔ́ǹ circir kɔŋkooŋŋu poon. 17 Ú dū u-ŋambiki kí sēē fatiku kí dūú yàaǹ ŋŋaabu ŋun bi dūu pītì ki yākatì circir páaa nì circir laŋkee pu ŋfunyɔm miluli. 18 Ú bàtī fatikuee kí ŋmìtī nsaraafan ŋun pu bi tùutī talaalub ŋu bí circir kɔŋkooŋŋun, ti-Dindaan nimbiinee yiŋyi pu. Ú dū fatiku un kíǹee kɔkɔ kí kpáatí kí pɔ̀l̄ saraawɔkaa faŋŋu ŋun bí circir kɔŋkooŋŋu punyɔkɔki nyɔkɔpuee taapu. 19 Ú lēē dinabilee kpam kɔkɔ kí cáá wà nsaraafan pu. 20 Kii usaraaŋakpil nín ŋá úǹ u-ba kpitii pɔ̄tam saraau nabil puee, míǹ mbaantiim ní u máaǹ kí ŋá dinabil dinee mun. Ní usaraaŋakpil ń ŋá Isirayeel yab pu dikoobil din u máaǹ kí ŋée ní bí ká bi-kpitii pɔ̄tam. 21 Míǹ boonee ní ú yòon̄ dinabilee nanti tin kíǹee kɔkɔ kí cáá nyāntí dinaapaal kpaanceetiŋu ní kí dū-tì kí wà ŋŋmi kii u nín wùn̄ dinabipeepeekaalee puee. Samaa kɔkɔ kpitii pɔ̄tam saraau dee.»
c. Dibɔtibil saraau
22 «An yaa sá dibɔtibil diba di yaa kaa nyí ní ki yīntì ki ŋá tin ti-Dindaan u-Nimbɔtiu marab nee kansikin ubɔ bí yii bí taa ŋée, udaan fōō dibɔkpil. 23 U yaa láa béè ikpiti in u ŋée, ú cáań uŋɔja un laaba kaa wɔ̀b̄ee kí ŋá saraa. 24 Ú dū u-ŋal kí páań uŋɔjee yil pu ní kí làntì-u laakin bi làntī saraawɔkaa waŋkuti ti-Dindaan nimbiinee. Ikpiti pɔ̄tam saraau dee. 25 Usaraaŋal ń dū u-ŋambiki kí sēē uŋɔjee fatikuu kí dūú ŋmìtī saraawɔkaa faŋŋu yiŋyi pu. Ú dū fatiku un kíǹee kɔkɔ kí kpáatí kí pɔ̀l̄ saraawɔkaa faŋŋu taapu. 26 Ní ú wà ŋkpam kɔkɔ nsaraafan pu kii bi nín ŋáań mpèé saraau kpam puee. Ní usaraaŋal ń ŋá dibɔtibilee pu dikoobil din u máaǹ kí ŋée ní dí ká di-kpitii pɔ̄tam.
d. Unifantanti saraau
27 «An yaa sá unifantanti ubɔ di kaa nyí ní ki yīntì ki ŋá tin ti-Dindaan marab nee kansikin ubɔ bí yii bí taa ŋée, udaan fōō dibɔkpil. 28 U yaa láa béè ikpiti in u ŋée, ú cáań uŋɔsal un laaba kaa wɔ̀b̄ee kí ŋá saraa u-kpitii gbanti pu. 29 Ú dū u-ŋal kí páań uŋɔsal un u cáań kí ŋá ikpiti pɔ̄tam saraauee yil pu ní kí làntì-u laakin bi làntī saraawɔkaa waŋkutee. 30 Usaraaŋal ń dū u-ŋambiki kí sēē uŋɔsalee fatikuu kí dūú ŋmìtī saraawɔkaa faŋŋu yiŋyi pu. Ú dū fatiku un kíǹee kɔkɔ kí kpáatí kí pɔ̀l̄ saraawɔkaa faŋŋu taapu. 31 Ú lēē ŋkpam kɔkɔ kii bi nín lèekī mpèé saraau kpam puee kí cáá wà nsaraafan pu, ní u-sɔnsɔfiŋu ń sɔ̀ŋkì ti-Dindaan pɔbil. Míǹ ní usaraaŋal máaǹ kí ŋá ní kí fíntí udaan kpitii ní ú nín ká u-kpitii pɔ̄tama.
32 «An yaa sá upii ní udaan cáań kí ŋá u-kpitii pɔ̄tam saraauee, ú nīn sá upisal un laaba kaa wɔ̀b̄ee. 33 Ú dū u-ŋal kí páań upisalee yil pu ní kí làntì-u laakin bi làntī saraawɔkaa waŋkutee. 34 Usaraaŋal ń dū u-ŋambiki kí sēē upisalee fatikuu ní kí dūú ŋmìtī saraawɔkaa faŋŋu yiŋyi pu ní kí dū fatiku un kíǹee kɔkɔ kí kpáatí kí pɔ̀l̄ saraawɔkaa faŋŋu taapu. 35 Ú lēē upisalee kpam kɔkɔ kii bi nín lèekī mpèé saraau pibil kpam puee, ní usaraaŋal ń cáá wà ŋŋmi nsaraafan pu nì saraabi bin kɔkɔ sá bí dùú wà ŋŋmi kí tīī ti-Dindaanee. Usaraaŋal ń ŋá udaan pu dikoobil din u máaǹ kí ŋée ní ú ká u-kpitii pɔ̄tam.»