Akoobil 5

ee. Tibɔŋmantikaal tiba

1 «Bi yaa bíi sòoǹ tibɔti ní ubɔ ká tibɔtee nín jítì puee ní bi yíiń udaan ú dāá sòoǹ tin u kée, ní u yaa yíì kaa cūtèe, udaan ŋá ikpiti ki fōō dibɔkpil^a.

2 «Ubɔ yaa kaa nyí ní ki gbēē tiwan tin kaa bí circiree kansikin kubɔ, an yaa sá upeel àá kuwaŋkuluu kun kaa bí circiree kubɔ di yaa kpíì àá tin fù ti-pool puee kubɔ di yaa kpíì ní u gbēēyee, u kɔ́ tijɔkɔndi ní ki fōō dibɔkpil.

3 «Ubɔ yaa tí gbēē unil jɔkɔnti, àá tin kamaa pée kɔ̄ntí unil tijɔkɔndee kaa kpáàa béèyee, bi yaa láa pée tùkū-u ní u béèyee, udaan fōō dibɔkpil.

4 «Àá ubɔ yaa bíi sòoǹ ní u-nyɔkɔ ŋmátì-u ní u pūtì kí ŋá tikpitil àá tiŋan ní boonee ki dāa béèyee, udaan fōō dibɔkpil^b.

5 «Ubɔ yaa ŋá ikpiti nee kansikin ibee, udaan máaǹ kí bìitī u-kpitii gbanti pu. 6 Míǹ boonee, u máaǹ kí cáań upisal àá uŋɔsal kí ŋá saraa kí tīī ti-Dindaan kí ŋāŋkì u-bɔkpil. Ní usaraaŋal ń ŋá udaan pu dikoobil din u máaǹ kí ŋá ní ú ká u-kpitii pɔ̄tamee.»

f. Biwɔfib saraau

7 «Ubɔ ŋaan yaa kaa nyìm̀ ú dā upii àá uŋoobuee, u ŋūǹ kí cáań nnanjilimu muli àá abeenanjil ali kí ŋāŋkì u-bɔkpil. Ú dū diba kí ŋá ikpiti pɔ̄tam saraau ní kí dū din kíǹee kí ŋá saraawɔkaa. 8 Ú cáań kí tīī usaraaŋal ní úǹ ń lēē unoon un sá bí dūú ŋá ikpiti pɔ̄tam saraauee, ní kí míkí kí gíí u-sil kí nákáǹ u-kpaŋkpantaapu, ama ní diyil ń taa tùkutī. 9 Usaraaŋal ń dū fatiku kí còol̀ nsaraafan kpiŋŋi pu ní kí dū un kíǹee kí kpáatí kí pɔ̀l̄ nsaraafan taapu. Ikpiti pɔ̄tam saraau dee. 10 Míǹ boonee, ú dū unoon un kíǹee kí ŋá saraawɔkaa kii mara nín sá puee. Ní usaraaŋal ń ŋá udaan pu dikoobil din u máaǹ kí ŋée ní ú ká u-kpitii pɔ̄tam.

11 «U yaa kaa tí cáá nnanjilimu muli àá abeenanjil alee, u ŋūǹ kí cáań ŋyim kiiloobi bita kí ŋá ikpiti pɔ̄tam saraau. Ama ú taa dū ŋkpam nì talaalutuukaa kí kūtì, kun puee an sá ikpiti pɔ̄tam saraau ní. 12 Ú cáań kí tīī usaraaŋal ní úǹ ń yáfí diŋaŋkul din sá kudaaŋŋu ti-Dindaan nimbiin yii úǹ di yì saraa gbantee, ní kí dūú wà nsaraafan pu kí kpáaǹ saraabi bin bi dùú wà ŋŋmi kí tīī ti-Dindaanee. Ikpiti pɔ̄tam saraau dee. 13 Ní usaraaŋal ń ŋá udaan pu dikoobil din u máaǹ kí ŋée ní ú ká u-kpitii pɔ̄tam.

«Usaraaŋal ń ŋá saraa nee kii bi nín ŋáań tijimpin saraau puee.»

g. Dibɔkpil saraau

14 Ti-Dindaan bí Mooyiisi yii:

15 «Ubɔ yaa kaa nyí ní ki dū saraabi bin sá ki tīī ti-Dindaanee ki ŋá min kaa kítèe ní ki kɔ́ diyìntilinee, udaan máaǹ kí cáań upìja un laaba kaa wɔ̀b̄ee. Ú lēē upìja gbanti u-picaŋkpuŋkun, u-daaku ń nīn nóó nì circir kɔŋkooŋŋu nimbiliŋ ŋmàntitam kí cáań kí ŋá saraa kí ŋāŋkì u nín yīntiǹ ti-Dindaan puee. 16 Udaan nín bàà máaǹ kí cáań tin circir kɔŋkooŋŋun ní kaa cáańee, ú téeǹ míǹ ní kí kūtì bi yaa yākatì tin u cáańee miŋmoo puee diba pu. Ní usaraaŋal ń fōō upìjee kí ŋá udaan pu dikoobil din u máaǹ kí ŋée ní ú ká u-kpitii pɔ̄tam.

17 «Ubɔ yaa kaa nyí ní ki yīntì ki ŋá tin ti-Dindaan marab nee kansikin ubɔ bí yii bí taa ŋée, udaan ŋá ikpiti ki fōō dibɔkpil. 18 Udaan máaǹ kí cáań upìja un laaba kaa wɔ̀b̄ee kí tīī usaraaŋal. Ú lēē upìja gbanti u-picaŋkpuŋkun, u-daaku ń nīn nóó nì kudaau kun bi síiǹ dibɔkpil saraauee. Usaraaŋal ń ŋá udaan pu dikoobil din u máaǹ kí ŋée ní ú ká u-kpitii in waa nyí ki ŋée pɔ̄tam. 19 An sá saraa un ŋáŋkí dibɔkpilee ní, di sá yii unilee nìn baasii fōō dibɔkpil ní ti-Dindaan nimbiin.»

20 Ti-Dindaan bí Mooyiisi yii:

21 «Ubɔ yaa kaa síl̀ nì ti-Dindaan deedee, ki yaa mɔ́ntì u-nabiki tiwan tin u dūu kpāaǹ-uee pu àá tiwan tin u pīnnèe àá tin u yùn̄ u-nabikee àá tin u fìkēe. 22 Tiwan tiba di yaa tí wáŋkì ní u píí ní ki bí ki néè yii waa ká kudɔŋu àá u yaa pūtì fám kí ŋmā kí bìin̄ ikpiti iba puee, 23 u ŋá ikpiti ki fōō dibɔkpil. U máaǹ kí téeǹ tin u yùn̄ee àá tin u fìkēe àá tin bi kpāaǹ-uee àá tin u pííyee, 24 àá tiwan tin pu ní u pée pūtì fám yii waa kée. U máaǹ kí téeǹ tiwan tin u yōoǹee kɔkɔ ní kí gíti nyàab̀ tiwan gbanti yaa yākatì miŋmoo puee diba pu kí kūtì kí tīī uwandaan ŋwiin ŋun u yaa béè yii u ŋá ikpitee. 25 Míǹ boonee ní ú cáań upìja un laaba kaa wɔ̀b̄ee kí nóó nì dibɔkpil saraau daaku kí tīī usaraaŋal ní úǹ ń dūú ŋá saraa kí tīī ti-Dindaan. 26 Usaraaŋal ń ŋá udaan pu dikoobil din u máaǹ kí ŋée ti-Dindaan nimbiin ní ú ká u-kpitii in ní u ŋá ki fōō dibɔkpilee pɔ̄tam^c.»