Marab bin bi síiǹ bisaraaŋaliibi ń nīn nóóyee: a. Saraawɔkaa marab
6
1 Ti-Dindaan bí Mooyiisi yii:2 «Dū saraawɔkaa marab nee kí tīī Aarɔn nì u-jipɔmbi.
«Saraawɔkaa marab sɔ̀. Saraawɔkaa pée máaǹ kí nīn pá nsaraafan pu ki wù míǹ kunyeeu kɔkɔ ní áli kutaa ń wúntí, ŋŋmi kaa máaǹ kí kpú. 3 Usaraaŋal ń dū iŋaapiin in bí fálfalee bɔkutikpaandi kí pèen̄, kí dū iŋaapiin in bí fálfalee cukutigiŋki mun kí lòon̄ ní kí wúkutí saraawɔkaa un bi wùn̄ nsaraafan puee kpam fantam kí bíĺ nsaraafan caŋin. 4 Míǹ boonee ú kpántí u-wampeeŋkaati ní kí nyāntí ŋfantamee dinaapaal kpaanceetiŋu kí cáá fá mpaan ŋun pu bi féeń saraa fantamee. 5 Ŋŋmi kaa pée máaǹ kí kpú nsaraafan pu, ŋu pée máaǹ kí nīn fòol̄ ní ŋyunti kamaa. Kutaafaau kamaayee, usaraaŋal ń nyàab̀ idɔ kí ŋá, kí dū saraawɔkaa nanti kí páań ní kí dū ŋkpam min bi lēē mpèé saraau nanti poonee kí kūtì kí wà ŋŋmi. 6 Ŋŋmi pée máaǹ kí nīn wù ŋyunti kamaa nsaraafan pu ní, ŋuaa máaǹ kí kpú.»
b. Tijimpin saraau
7 «Tijimpin saraau marab sɔ̀. Aarɔn jipɔmbi bisaraaŋaliibi di máaǹ kí sútí kí pìl̄ nsaraafan kí ŋá tijimpin saraau kí tīī ti-Dindaan. 8 Usaraaŋal ubɔ ń yáfí ŋyim diŋaŋkul, kí dū ŋkpam kí búuń ní kí dū talaalutuukaa un bi cáańee kɔkɔ kí kūtì kí dūú wà ŋŋmi nsaraafan pu án nīn sá <kudaaŋŋu> ti-Dindaan nimbiin yii u-saraau dee. An di sá saraa un sɔnsɔfiŋu sɔ̀ŋkī ti-Dindaan pɔbilee. 9 Bi nín yáfì ŋyim ki ŋá saraa min kíǹee, Aarɔn nì u-jipɔmbi ŋūǹ kí dūú ŋá tijin kí jī, ama bí taa ŋá ŋkpɔnɔnyɔkɔ tijinee poon. Bí jī-tì mpaan ŋun bí circiree pu, circir kɔŋkooŋŋu cindin. 10 Baa pée máaǹ kí dū ŋkpɔnɔnyɔkɔ kí ŋá tijin gbanti. Saraabi bin bi cáa wù ŋŋmi ki tìì-mee, dijandi din m dūu tīī-bee dee. Saraa gbantee sá circir páaa wanti ní, a lì kii ikpiti pɔ̄tam saraau nì dibɔkpil saraau nín bí circir puee. 11 Aarɔn maaliŋu poon bin sá bininjabee baba di ŋūǹ kí jī tijin gbanti, di sá yii saraabi bin bi cāabìń ki tìì ti-Dindaanee, dijandi din sá ki tīī-bi kí nīn pée cáa cá jaanjaanee dee. Unifantanti di yaa gbēē-tèe, udaan nì u-kpuulool dee.»
12 Ní ti-Dindaan gíti bí Mooyiisi yii:
13 «Daliŋkin bi yaa dū Aarɔn nì u-jipɔmbi ki sú ti-Dindaanee, saraa un bi máaǹ kí cáańee di sá ŋyim kiiloobi bita. Kutaafaauee bí dū dijandi kí ŋá saraa ní kujoouee bí púntí dijandi din kíǹee kí ŋá saraa. 14 Bí dū ŋkpam kí búuń ŋyim kí dūú tɔ̄ kalaa kitaŋkpapiliŋ pu. Míǹ boonee bí càkà kí cáań kí ŋá saraa kí tīī ti-Dindaan ní u-sɔnsɔfiŋu ń sɔ̀ŋkì ti-Dindaan pɔbil. 15 An nīn sá dibɔkpaal din làá nīn dɔ̄ ki cá jaanjaanee yii Aarɔn maaliŋunee, un yil pu bi làá sìtī ŋkpam ú kpántí usaraaŋakpilee ń ŋá saraa gbanti kí tīī ti-Dindaan. Bí dū saraa gbanti kɔkɔ kí wà ŋŋmi.
16 «Usaraaŋal di yaa cáań tijimpin saraau ki ŋá ki tīī ti-Dindaanee, bí dū saraayee kɔkɔ kí wà ŋŋmi, bí taa jī.»
c. Ikpiti pɔ̄tam saraau
17 Ní ti-Dindaan bí Mooyiisi yii:
18 «Sòoǹ nì Aarɔn nì u-jipɔmbi kí tùkù-bi bi nín máaǹ kí nīn ŋáań ikpiti pɔ̄tam saraau puee. Bi yaa cáań kuwaŋkuluu kí ŋá ikpiti pɔ̄tam saraauee, bí làntì-ku laakin bi làntī saraawɔkaa waŋkuti ti-Dindaan nimbiinee, kun puee an sá circir páaa wanti ní. 19 Usaraaŋal un di ŋá ikpiti pɔ̄tam saraauee ń ŋmɔ́ saraayee nanti mpaan ŋun bí circiree pu, circir kɔŋkooŋŋu cindin. 20 Un di yaa pée gbēē saraa gbanti nantee, udaan nì u-kpuulool dee. Fatiku yaa yāaǹ dibɔkutil din puee, bí fíntí laakin fatiku yāaǹee circir paaŋŋu pu. 21 Bi yaa tɔ́kɔǹ saraa gbanti nanti dikumbool din poonee, bí gbá kí wīī-dì. Ama an yaa sá tasa kumbool poon ní bi yaa tɔ́kɔǹ tinan gbantee, bí fíntí-dì tiŋan ní kí dū nnyim kí cántí-dì. 22 Bininjab bin sá bisaraaŋaliibee di ŋūǹ kí ŋmɔ́ tinan gbanti, tì sá circir páaa nanti ní. 23 Ama bi yaa ŋá ikpiti pɔ̄tam saraau ní ki dū u-fatikuu ki kɔ́ǹ dikpafindi tantiun ki ŋá dikoobil din bi máaǹ kí ŋá kí ká ikpiti pɔ̄tamee, bí taa ŋmɔ́ saraa gbanti nanti, bí cáá wà ŋŋmia.»