Dikàandi Gbɔŋku i

Dikàandi

gbɔŋku

Tibɔkilkaal

Dikàandi gbɔŋku sòoǹ bi nín nìn kàan̄ Isirayeel yab ŋfunyɔm kupaau puee bɔti ní, kii kugbɔŋu ku-ba yindi nín sá puee. Ama ku-yindi gbanti kaa sòon̄ tikɔkɔ, áli gba dàa sòon̄ tibɔti tin baasii páb́ kugbɔŋu nee poonee.

Isirayeel yab nín fōō Mooyiisi cee marab bin kɔkɔ Unimbɔti nìn tīī-u Siinaayi jool pu ú dūú nàatī-bee, boonee ní bi bɔ́ntì kí kíĺ nsan kí nīn cá kitimpooŋkaayin (1.1–10.10). Bi dūu túĺ Kadeesi Barneeya tiŋki watil pú ní ki bàn̄ ki gūū kitimpooŋkaayee. Ama ní ki fāŋkì kí kɔ́ ki-ni. An nín nìn sá yii bi làaa, baa làaa, bí kàl̄ kuteeun abin imuŋku ilee, ní bi fātìi yíkìi túĺ ŋgiil pú ki cōom̀ ki póotì ntimu tikpil pu ní ki tin nín bàn̄ Moowaab tiŋkin, Tikati mɔɔl ŋwìiń nyalaŋki pú (10.11–21.35). Ayil ŋin lúŋkèe sòoǹ tibɔti tin bí ti-ba ti-ba ki jítì Isirayeel yab pu Moowaab tiŋkinee. Tíǹ jítì boonee ní Isirayeel yab dāa nín ŋúń ki kɔ́ Kanaan tiŋkin (22.1–36.13).

Kugbɔŋu nee di pá Disaŋkindi nì Akoobil gbɔnti pu ní ki dàkà Isirayeel yab nín dàkafī nniyaamin pu, bi nín máká Unimbɔti pu nì bi nín dàkafī ki gùgufī u-pu puee, nì bi nín cáá mpɔn nì bi-wunti nín yɔ̀tī puee, nì bi nín sá bikpaambi nì bi nín kaa bí tiban Unimbɔti nimbiin puee. Dijandi diba poonee, ku dàkà Unimbɔti nín yú deedee nì u-nibul miŋyee. Unimbɔti nín bí deedee puee kaa dàkà yii u dū u nín ŋúb́ an píkí miŋyee nì u-baamɔŋyi ki fá.

Mooyiisi nín yú mpaan ŋun pu ti-Dindaan nì u-nibul kansikinee pɔ̄ɔ̄. Úǹ di cáá Unimbɔti bɔti tin páb́ee ki nàatī u-nibul ní u nì Unimbɔti nìn kɔ́ tɔbin tiŋan. Úǹ di sá un mɔ́tí Isirayeel yab bin kaa bí deedeeyee pu kaa gì.