Dikàandi Gbɔŋku 22

ISIRAYEEL YAB BÍ MOOWAAB TANTAKALIN

Balaaki nì ubɔɔ Balaam bɔti

1 Isirayeel yab yíkì niinee ní ki cūtìi kāl̀ Moowaab tantakalin, Jɔɔdan buŋgbandi lapu pu ki túĺ Jeeriikoo.

2 Siipɔɔr jipɔɔn Balaaki nín gbìl̄ Isirayeel yab nín ŋá Amɔɔr yab puee, 3 ní dinyoondi kɔ́ u nì u-samaau Isirayeel yab nín wīikí tikpilee pu. Bi nín ká Isirayeel yabee, tifaandi cúú-bi tikpil. 4 Ní u bí Madiyan kpilib yii: «Binib nee làá ŋàfì tin kɔkɔ māntìi tú-ti nee kii inaa nín ŋmóò dinaapaal mooti pu nyíki nyikee ní.» Ŋyunti gbantee Siipɔɔr jipɔɔn Balaaki di nìn sá ubɔti Moowaab tiŋkin.

5 An puee ní Balaaki dū binib ki tú Beewɔɔr jipɔɔn Balaam cee. U nìn kóò u-tiŋkin Peetɔɔr, dimɔɔl din bi yíì Eefiraatee caŋin. U nìn bí bí cùú tùkù-u yii: «Dinibul diba nyánní Eejipiti ki kpátì ki gbí kitiŋ kɔkɔ pu, ní ki kóò ki pìlīǹ man^a. 6 Míǹ puee m gbàam̄-si, dāan̄ kí tɔ̄-bi mbusu, kun puee bi pɔ̄ɔ̄ ki jítiǹ-mi. A yaa kíí ki dɔ́mińee, án yaa yíì m ŋūǹ kí já kí pɔ̄ɔkiǹ-bi ní kí jà-bi m-tiŋki pu. Di sá m nyí yii un pu ní a yaa bīiǹee kāntí dibiindi, ní un ní a yaa tɔ́ mbusuee, udaan kāntí mbusu.»

7 Ní Moowaab nì Madiyan kpilib yíkìi yōoǹ tiwampɔkaal tin bi làá tin pɔ̄ Balaamee ki bàn̄ ki ká-u, ní ki dū Balaaki nín lī puee ki kàan̄. 8 Ní Balaam bí-bi yii: «Ní gbíntí m-cee doo kí dòon̄, ku yaa fu wúntì ti-Dindaan yaa sòon̄ nì mi puee, m làá fu tùkù-ni an nín sá puee.»

Niinee ní Moowaab kpilibee gbíntì Balaam cee ki dōoǹ. 9 Ní Unimbɔti dɔ́miń Balaam cee ní ki bí yii: «Binib bilab di bí a-cee nan ní?» 10 Ní Balaam kíí Unimbɔti yii: «Siipɔɔr jipɔɔn Balaaki, Moowaab bɔtiu di túnní-bi, bí dāá tùkù-mi yii: 11 <Dinibul diba nyánní Eejipiti ki kpátìi gbí kitiŋ kɔkɔ pu. An puee dāá tūtuǹ-mi kí tɔ̄-bi mbusu. Án yaa yíì m ŋūǹ kí já kí pɔ̄ɔkiǹ-bi.>» 12 Ní Unimbɔti bí-u yii: «Á taa táá-bi kí cù, kí taa tɔ̄ dinibul gbanti mbusu kun puee m bīiǹ di-boon.»

13 Ku wúntì Balaam fīntèe ní ki bí bikpilib bin Balaaki túnnée yii: «Ní nīn gítímaan, ti-Dindaan kaa pú-mi nsan ḿ táá-ni kí cù.»

14 Ní Moowaab kpilib bin bi túee fātìi gítì ki tùkū Balaaki yii: «Balaam yíì yii waa làá táá-ti kí dāan̄.» 15 Ní Balaaki gíti lēē bikpilib bin sá bikpaambi bi-wíiŋŋu mun jítiǹ bipeepeekaabee ki tú. 16 Ní bi bàn̄ Balaam cee ki dū tin pu ní Balaaki túnní-bee ki bíl̀ u-nimbiin yii: «Man Balaaki, Siipɔɔr jipɔɔn, m gbàam̄-si, á taa yíí yii aa làá dāan̄ m-cee. 17 M làá tīī-si tinyool tikpil, ní tin kɔkɔ a yaa bālifèe, m làá ŋá míǹ! Míǹ puee m gbàam̄-si, dāan̄ kí tɔ̄ dinibul nee mbusu.» 18 Ní Balaam kíí bin Balaaki túnnée yii: «Báà Balaaki yaa dū animbil nì sindaariya bin gbí u-beediiŋŋinee kɔkɔ ki tīī-mi, maa ŋūǹ kí yìntīǹ m-Dindaan m-Nimbɔtiu marau kí ŋá tiba fiii gba kí tīī-u. 19 Ama ni mun ń gbíntímaan kunyeeu nee kí dòon̄ doo, m làá fu béé tin ní ti-Dindaan làá fu tùkù-mee.» 20 Ní Unimbɔti dɔ́miń Balaam cee kunyeeu ki tùkū-u yii: «Kii binib nee nín gíti dáá dɔ́miń ki yíiń-see, yīkìí táá-bi ní cù. Ama man yaa tùkū-si yii á ŋá puee, tíǹ ní á ŋá.» 21 Kutaa wúntèe ní Balaam kpàl̄ u-mansaliiki ki táá bikpilibee ní bi búntì.

Balaam maŋki bɔti

22 Balaam nóó-bi ki búntèe ní Unimbɔti fōō diŋuul. Ŋyunti ŋun Balaam kā u-mansaliiki pu u nì u-tɔntɔnliibi bili nóó ki cée, ní ti-Dindaan tuuŋŋu kíntì ki yú nsanni ú taa ŋmā kí jītí. 23 Ní kimansalii ká ntuun yú nsan kansikin ki ŋúb́ njicál ŋu-ŋaan, ní kì gɔ́ntì ki kɔ́ bukpaan. Ní Balaam bíi gbáà-kì kí kíntí nsan. 24 Ní ti-Dindaan tuuŋŋu nìkī nyɔkɔpu ki cūtìi yúl̀ nsan laakin kaa wāāyee fiinyi sufii kansikin digundi diba bí ŋŋaŋgan pú ní diba bí ŋŋaŋgiil pú. 25 Kimansalii ká ntuun mimmee ní kì còom̄ ki náká nì digundi. Balaam taal dūuǹ digundee, ní u kíĺ ki bíi gbáà-kì. 26 Ní ti-Dindaan tuuŋŋu nìkī nyɔkɔpu laakin nsan mɔ́ɔb́ unil kaa ŋūǹ kí fàtī ŋgiilaaa, kaa ŋūǹ kí fàtī ŋganee. 27 Kimaŋ ká-ŋu mimmee ní ki dōoǹ Balaam taapu ní Balaam dàn̄ ki-pu. Balaam fōō diŋuul tiŋan pu ní ki dū ndɔ ki gbáń-kì tikpil.

28 Ní ti-Dindaan pú kimansalii ŋŋmam kí sòoǹ tibɔti, ní kì bí Balaam yii: «M baasii ŋá-si ba ní a gbáń-mi mita kɔkɔ?» 29 Ní Balaam kíí-kì yii: «A kpēē-mi fám ní. M yaa bàà ŋúb́ kitàataajiki m-ŋaan doo, m bàà làá làntì-si!» 30 Ní kimansalii kíí-u yii: «Man di kaa sá a-maŋki kin a kàal̀ baabadaleeee? M ŋá-si míǹ dalba ki káaa?» Ní Balaam kíí-u yii: «Aayee.»

31 Niinee ní ti-Dindaan ŋúbitì Balaam nimbiliŋ ní u ká ntuun yú nsan kansikin ki ŋúb́ njicál ŋu-ŋaan. Dicilpu niinee ní u tātìi dōoǹ dicincibil. 32 Ní ntuun bālifì-u yii: «Ba pu ní a gbáń a-maŋki mita kɔkɔ? M nyáń kí pìin̄-si nsan á taa ŋmā kí cù laakin a cée ní, kun puee nsan ŋun a cá nee cáǹ-si mbusun ní. 33 Kimaŋ ká-mi ní ki gɔ́ntì-mi ŋfunyɔm mita, kì yaa kaa bàà gɔ́ntì-mi, naŋkɔnampu m bàà kūū-si ní kí yàntī kíǹ.» 34 Ní Balaam bí ti-Dindaan tuuŋŋu yii: «M yīntì, kun puee maa nyí yii an sá sii di kíntì ki yú nsanni m-nyɔkɔpu. An puee m-saŋŋu nee bɔti yaa kaa mɔ́ɔkiǹ-see, m kíí kí fàtī m-dumpu.» 35 Ní ti-Dindaan tuuŋŋu bí Balaam yii: «Sii nì binib nee ń nīn cá, ama anyɔɔbun ŋin ní m làá dūú ŋá a-nyɔkɔnee, ŋíǹ ní a làá sòoǹ.» Ní Balaam nì binibee nìkī bi-saŋŋu ki búntì.

Ubɔti Balaaki túŋkì Balaam nsanni

36 Ŋyunti ŋun Balaaki gbìl̄ yii Balaam dòońee ní u nyáń ki cūtì ki túŋkì-u áli Moowaab tiŋki kin bí ki pìlīǹ kikpaanyɔkɔ Arinɔn buŋŋu caŋinee. 37 Ní Balaaki bí Balaam yii: «Ba pu ní m nín tú binib mpeepeekaam a-cee bí yíiń-see, a yíì kaa dɔ́miń ní? A nyí yii maa ŋūǹ kí tīī-si tinyool níii?» 38 Ní Balaam bí Balaaki yii: «Nì min kɔkɔ m dɔ́miń nee, maa ŋūǹ kí gāā m-bindi kí lì tiba, see tibɔti tin Unimbɔti yaa dūu ŋá m-nyɔkɔnee, tíǹ ní m làá sòoǹ.» 39 Ní Balaam nóó Balaaki ní bi nín cá Kiiriyati-Usɔti. 40 Ní Balaaki dū inaa nì ipii kí ŋá saraabi, ní ki lēē tinan ki tīī Balaam nì bikpilib bin nóoń-uee, báà ŋma nì u-yati.

Balaam mēē ki bīiǹ Isirayeel yab pu mpeepeekaam

41 Kù wúntèe ní Balaaki yōoǹ Balaam bi nín jɔ́ḿ Bamooti-Baal. Niin ní bi kpēē ki wálìń Isirayeel yab biba.