Dikàandi Gbɔŋku 21

Isirayeel yab jáń ki pɔ́ɔkiǹ Kanaan yab

1 Araadi bɔtiu ukanaanja un nìn kóò Neegeebee nín gbìl̄ yii Isirayeel yab dīń Atariim saŋŋu ki dòońee, ní bi yíkìi túŋkì-bi ki jáń nì bi, ní ki cúú Isirayeel yab biba kuyuŋu. 2 Ní Isirayeel yab pōoǹ ti-Dindaan ipoon yii: «A yaa dū dinibul nee ki ŋá ti-ŋaan, ti làá nàan̄ bi-timmu kɔkɔ ní pílpil.» 3 Ti-Dindaan nìn pílifiǹ Isirayeel yab, ní ki dū Kanaan yab ki ŋá bi-ŋaan. Ní Isirayeel yab kūū ki céetì-bi, ki nāaǹ bi-timmu ní ki pú niin diyindi yii Ɔrima, taapu di sá <dicéetil>.

Ikoobu in looti pɔ̄ɔ̄yee bɔti

4 Isirayeel yab yíkì Ɔɔr jool puee ní ki dūu dī Tikati mɔɔl watil kí gɔ́ntí Eedoom tiŋki^a. Ama bi bí disaŋkindi puee ní samaa wunti yɔ̄tì. 5 Ní bi kíĺ ki bíi sòoǹ ki bíiĺ ti-Dindaan nì Mooyiisi yii: «Ba pu ní ni nyántìń-ti Eejipiti tiŋkin ki cáań-ti kuteeun kí kpɔ̀ ní? Nnyim kpá, tijin kpá, ní ti núutiǹ maana, falaa jinti tin ti jīǹ nee!» 6 Niinee ní ti-Dindaan dū ikoobu in looti pɔ̄ɔ̄yee ki tɔ́ bi-pu, ní i júntìi kūū Isirayeel yab tikpil^b.

7 Ní samaa un kíǹee sáǹ ki cūtìi ká Mooyiisi ki bí-u yii: «Ti nín sòon̄ ki bíil̀ ti-Dindaan nì siiyee, ti ŋá ikpiti. Míǹ puee gbàam̀ ti-Dindaan ú kàkatī ikoobu nee kí wàatī-ti.» Ní Mooyiisi mēē samaa pu. 8 Ní ti-Dindaan bí Mooyiisi yii: «Á dū tasa kúti kí mɔ́ɔ́ kukoonaŋu kí dūú lúntí ndɔ pu. Un ní ukoobu yaa ti júee, ú wáaǹ kí kpèè kukoonaŋuee kí ŋmátí.» 9 Ní Mooyiisi dū tasa kúti ki mɔ́ɔ́ kukoonaŋu ki dūu lúntì ndɔ pu. Kí yòon̄ ŋyunti gbantee, un ní ukoobu yaa ti jú ní u wáaǹ ki kpēē kukoonaŋuee kaa ti kúù^c.

Isirayeel yab nín cōom̀ pu ki tin bàn̄ Piisga joolee

10 Isirayeel yab yíkì Ɔɔr jool taapuee ní ki tin bàn̄ ki kāl̀ Oobooti tiŋkin. 11 Bi yíkì Oobootee ní ki cūtìi kāl̀ Yee-Abariim kuteeun, Moowaab tiŋkin ŋwìiń nyalaŋki pú. 12 Bi yíkì niinee ní ki cūtìi kāl̀ Seereedi buŋgbandi. 13 Bi yíkì Seereedee ní ki cūtìi kāl̀ Arinɔn buŋgbandi. Mbun gbanti nyēeń Amɔɔr tiŋkin ní kí dāá jītí kuteeun. Ŋúǹ di sá Moowaab nì Amɔɔr yab kpaanyɔkɔ. 14 An pu ní an lī ti-Dindaan jaaku gbɔŋkun yii: «Wayeeb bí Sufa nì u-buŋyin, ní Arinɔn 15 nì u-bùmbiyaamu nyim pùub̀ ki kpàkaǹ Aari tiŋki ki tin bàn̄ Moowaab kpaanyɔkɔ.» 16 Bi yíkì niinee ki nín cá Beeyeer, taapu di sá <lɔkɔ>. Lɔkɔ gbanti ní ti-Dindaan nìn bí Mooyiisi yii: «Kpāfì Isirayeel yab doo ḿ tīī-bi nnyim bí nyɔ̀.» 17 Niin ní Isirayeel yab nìn gāā nlan nee yii:

«Nnyim ń nīn tòó ki nyēeń lɔkɔn!

Nín̄ kpáafímaan abaal!

18 Lɔkɔ un bibɔtiibi gbìn̄ee dee,

lɔkɔ un kitiŋ pu nikpaambi lùkū

nì bi-kúti nì bi-kpandɔyee dee!»

Bi yíkì kuteeunee ní ki bàn̄ Matana. 19 Bi yíkì Matanayee ní ki cūtìi kāl̀ Nayaliyeel. 20 Bi yíkì Nayaliyeelee ní ki cūtìi kāl̀ Bamooti. Bi yíkì Bamootee ní ki cūtìi kāl̀ ditantakal din dɔ̄ ki jítì Moowaab tiŋkin ki cá Piisga jool yilpuee. A yaa tɔ́kɔ́ niinee, a wāĺ kuteeu kɔkɔ.

Isirayeel yab jáń ki pɔ́ɔkiǹ Siiwɔn nì Ɔɔgi

21 Isirayeel yab tú bí mèè Amɔɔr yab bɔtiu Siiwɔn yii: 22 «Ti là kí jītí a-tiŋkin. Taa làá jītí ubɔ kpaabun, kaa làá kɔ́ ubɔ fiinyi sufii saakun, kaa làá nyɔ̀ ni-lɔkɔb nyim. Ti làá nīn pée nóó mbɔtisanjaa ní cáaa kí jītí a-tiŋki pu.» 23 Ama ubɔti Siiwɔn yíì yii Isirayeel yab ń taa jītí. Ní u kpáfì u-janjakitil kɔkɔ bi nyáń ki túŋkì Isirayeel yab áli Yaasi, kuteeun ki jáń nì bi. 24 Ní Isirayeel yab jáń ki pɔ́ɔkiǹ-bi ki kūū-bi ní ki fōō bi-timmu kɔkɔ, kí yòon̄ Arinɔn buŋŋu kí cáá sāā Yaabɔki buŋŋu, kí yòon̄ niin kí nīn cá áli Amɔn yab tiŋki kpaanyɔkɔ, di sá Amɔn yab nìn máń digundi bi-kpaanyɔkɔ ní. 25 Bi nìn fōō Amɔɔr yab timmu kɔkɔ, ki kpáaǹ Eesbɔn nì ntimu mun māntìi tú-kèe. Bi fōō-muee ní ki kāl̀ mu-poon. 26 Eesbɔn nìn sá ditiŋyil laakin Amɔɔr yab bɔtiu nìn kóòyee. U nìn jáń nì Moowaab bɔtiu ukpiki ní ki fōō u-timmu kɔkɔ áli ki tin cáa bàn̄ Arinɔn buŋŋu. 27 An pu ní bilaŋkpaŋgaaliibi lī yii:

«Dāam̄maan tí fàtīí mā Eesbɔn tiŋki.

Tí fàtīí mā Siiwɔn tiŋki!

28 «Ŋŋmi ŋubɔ nyánní Eesbɔn,

ŋŋmi fōoń Siiwɔn tiŋkin ki wùn̄ Aari nì Moowaab timmu,

ki kpáaǹ bin sá bikpilib ki tɔ́kɔ́ Arinɔn buŋŋu yilpuee.

29 Mbusu kɔ́-si, Moowaab!

Nimbi bin jáaḿ diwaal Keemoosee, ni wáŋkì!

A-jipɔmbi sáǹ ki yàl̄

ní Amɔɔr bɔtiu Siiwɔn cúú a-bisalib kuyuŋu^d.

30 «Ti jàkā-bi butɔbu ki yōoǹ Eesbɔn

ki cáa sāā Diibɔn!

Ti kūū ki céetì-bi

ki yōoǹ Noofa ki cáa sāā Meedeeba!»

31 Ní Isirayeel yab jíń Amɔɔr yab tiŋki ki kāl̀. 32 Ní Mooyiisi tú binib bí cùú cɔ̄ŋkì Yaseer tiŋki, ní bi cūtìi jáń ki fōō ntimu mun māntìi tú-kèe, ní ki jìn̄ Amɔɔr yab bin nìn kóò mu-nee. 33 Niinee ní Isirayeel yab fātìi kpántì bi nín bàà túĺ ki cá puee ní ki dūu dī Baasan saŋŋu. Ní Baasan bɔtiu Ɔɔgi nì u-janjakitil kɔkɔ yíkìń ki túŋkì Isirayeel yab Eedreeyii tiŋki kí jáǹ-bi. 34 Ní ti-Dindaan bí Mooyiisi yii: «Taa fàŋkì-bi. M làá dū bi nì bi-janjaliibi nì bi-tiŋki kí ŋá a-ŋaan, ní á ŋá-bi kii a nín ŋá Amɔɔr bɔtiu Siiwɔn un nìn kóò Eesbɔn tiŋkinee puee.» 35 Ní Isirayeel yab jáń ki pɔ́ɔkiǹ u nì u-jipɔmbi nì u-janjakitil kɔkɔ, ki kūū bi-kɔkɔ ubɔ kaa kíǹ, ní ki fōō u-tiŋki.