Dikàandi Gbɔŋku 20

Ditaŋkpal din Mooyiisi fáá nnyim nyánnée bɔti

(Kpèè Disa 17.1-7 mun)

1 Isirayeel yab kɔkɔ nìn bàn̄ Siini teekun dibindi ŋmapeepeekaau poon ní ki kāl̀ Kadeesi. Niin ní Mooyiisi nì Aarɔn niisal Miiriyam kpíì, ní bi síb́-u^a. 2 Bi bí niinee ní nnyiŋkum nyáń Isirayeel yab pu, ní bi kpáfì ki múkuǹ Mooyiisi nì Aarɔn pu. 3 Ní bi kíĺ ki bíi nyàab̀ Mooyiisi tibɔti ki lì yii: «Ti yaa bàà nìn kpíì ŋyunti ŋun ti-Dindaan nìn dáaĺ ti-nabiyaamu tafal bi kpíìyee, an bàà sɔ́! 4 Ba pu ní ni yōoǹní timbi ti-Dindaan samaau ki cáań kuteeu pu doo ti nì ti-waŋkuti ń kpú ní? 5 Ba pu ní ni yōoǹní-ti Eejipiti tiŋkin ki cáań-ti ki tɔ́ falaa nee poon? Baa ŋūǹ kí bɔ̄l̀ doo tiba, kaa ŋūǹ kí cóoń isufi in bi yíì fiinyi nì fiigi nì Greenaadee, ní nnyim kpáàa kpá tí nyɔ̀.»

6 Ní Mooyiisi nì Aarɔn nyáń samaa kansikin ki búntì circir kɔŋkooŋŋu nyɔkɔpu. Bi bàn̄ee ní ki tātìi dōoǹ dicincibil, ní ti-Dindaan nyooti kpákatìń bi-cee. 7 Ní ti-Dindaan bí Mooyiisi yii: 8 «Yòon̄ ŋkpandɔ si nì a-maan Aarɔn, kí kpāfì Isirayeel yab, kí sòoǹ nì ditaŋkpal nee bi-nimbiin dí tīī-ni nnyim. Ditaŋkpal nee ni ní a làá nyāntí nnyim Isirayeel yab nì bi-waŋkuti ń nyɔ̀.» 9 Ní Mooyiisi yōoǹ ŋkpandɔ ti-Dindaan nimbiin kii u nín lī yii ú ŋá puee. 10 Ní Mooyiisi nì Aarɔn yíiń samaa kɔkɔ ki kpáfì ditaŋkpalee cee, ní ki bí-bi yii: «Ní pīlifì, nimbi pɔɔgaatibee. Ti ŋūǹ kí nyāntí nnyim ditaŋkpal nee poon kí tīī-naaa?»

11 Mooyiisi lī míǹ ki dóòyee ní ki dúkutì ŋkpandɔ ki fáá ditaŋkpalee mili. Dicilpuee ní nnyim púnní, ní Isirayeel yab nyùn̄ ní bi-waŋkuti mun nyùn̄. 12 Ama ní Ti-Dindaan bí Mooyiisi nì Aarɔn yii: «Kii ni nín kaa máká m-pu kaa dàkā m nín bí circir puee Isirayeel yab nimbiinee, maa làá yàntī ní cáá samaa nee kí cùnnì kitiŋ kin m làá tīī-bee poon.» 13 Di sá ní bi pú niin diyindi yii Meeriiba nyim, an taapu sá yii <Kujaau> nyim. Di sá niin ní Isirayeel yab nìn nyàab̄ ti-Dindaan tibɔti, ní u dàkā-bi u nín bí circir puee.

Eedoom bɔtiu kaa pú Isirayeel yab nsan bí jītí

14 Bi bí Kadeesi tiŋkin niinee, ní Mooyiisi tú binib Eedoom bɔtiu cee bí tùkù-u yii: «Pīlifì tin a-nabiyaamu Isirayeel yab làá sòoǹee! A nyí falaa un ti jíńee bɔti kɔkɔ. 15 Ti-naanjab nìn yíkìi cūtì Eejipiti tiŋkin ki kāl̀ niin ki yúntì tikpil. Ní Eejipiti yab sāaǹ ti nì ti-naanjab. 16 Ti kúuǹ ki yíiń ti-Dindaan ú jòoń-ti ní u gbìl̄ ti-kuŋkuuntii pu, ní ki túnní u-tuuŋŋu dɔ́miń ki nyántì-ti Eejipiti tiŋkin. Di sá kɔŋkɔnnee ti dūu bāań Kadeesi, a-tiŋki kpaanyɔkɔ. 17 Míǹ puee, á pɔ̄-ti nsan tí jītí a-tiŋki poon. Taa làá jītí ubɔ kpaabun, kaa làá kɔ́ ubɔ fiinyi sufii saakun, kaa làá nyɔ̀ ni-lɔkɔb nyim. Ti làá nīn pée nóó mbɔtisanjaa, ní kaa làá pàatī ŋgiil, kaa làá pàatī ŋgan áli kí tin jītí a-tiŋki pu.» 18 Ní Eedoom bɔtiu kíí-u yii: «Maa làá kíí ní jītí m-tiŋkin. Ni yaa mākaǹ m làá yàntī m-yab ń kíntí-ni kí jáǹ-ni.» 19 Ní Isirayeel yab gbíntìi cɔ́ tin bi bàà pée sòon̄ee pu yii: «Ti làá nīn pée nóó mbɔtisanjaa ní. Ti yaa nyùn̄ a-nyim àá ti-waŋkuti di yaa tí nyùn̄ a-nyim, ti làá pà. Tin baba ti pée mèé-see di sá á yàntī tí jītí a-tiŋkin.» 20 Ní Eedoom bɔtiu kíí yii: «M bí yii ni kpá kí jītí m-tiŋkin!» Ní Eedoom yab nyáń nì dijanjakitikpaandi din pɔ̄ɔ̄yee ki túŋkì Isirayeel yab. 21 Míǹ ní Eedoom yab kaa yāntì Isirayeel yab jítì bi-tiŋki poon, ní bíǹ dūu dī laaba pú ki búntì.

Aarɔn kúm

22 Isirayeel yab kɔkɔ yíkì Kadeesee ní ki búntì Ɔɔr jool pu. 23 Ɔɔr jool pu, Eedoom tiŋki kpaanyɔkɔ ní ti-Dindaan sòon̄ nì Mooyiisi nì Aarɔn yii: 24 «Aarɔn làá kpú kɔŋkɔnnee kí cù kí ŋàl̄ u-naanjab. Waa làá kɔ́ kitiŋ kin m làá tīī Isirayeel yabee poon, kun puee ni yīntì m-marau Meeriiba nyim laŋki. 25 An puee sii Mooyiisi, á yòon̄ Aarɔn nì u-jipɔɔn Eeleeyasaar kí jɔ̄ntiǹ Ɔɔr jool yilpu. 26 Á pèetī Aarɔn saraaŋabɔkutiŋ kí dūú pèen̄ u-jipɔɔn Eeleeyasaar, kun puee Aarɔn làá kpú niin ní kí cù kí ŋàl̄ u-naanjab.» 27 Ní Mooyiisi ŋá kii ti-Dindaan nín bí ú ŋá puee. Bíǹ binib bitee yíkì ki nín jɔ́ḿ Ɔɔr jool yilpu Isirayeel samaau kɔkɔ nimbilin. 28 Bi bàn̄ee ní Mooyiisi pēetì Aarɔn saraaŋabɔkutiŋ ki dūu pēeǹ u-jipɔɔn Eeleeyasaar. Dijool yilpu niin ní Aarɔn kpíì. Ní Mooyiisi nì Eeleeyasaar fātìi nín kpákatiń^b. 29 Isirayeel samaau kɔkɔ nín béè yii Aarɔn kpíìyee ní bi súń u-kpool iwiin mmuŋku nì saalaa.