Nnyim min lèekī tijɔkɔndee bɔ́ntitam
19
1 Ti-Dindaan sòon̄ nì Mooyiisi nì Aarɔn 2 ki yóoǹ-bi mara yii: «Á tùkù Isirayeel yab yii bí cáań-si unasaman gàaa un ŋān̄ u-laaba kaa wɔ̀b̄ ní baa kpàl̄-u u túń ditundi ki kée. 3 Bi yaa cáań-uee, á dūú tīī usaraaŋakpil Eeleeyasaar ní úǹ ń cáá-u kí nyāntí dinaapaal kpaanceetiŋu, ní bí làntì-u u-nimbiin niin. 4 Ní usaraaŋakpil Eeleeyasaar ń lēē fatiku kí dū u-ŋambiki ki sēē fatikuee kí yàaǹ circir kɔŋkooŋŋu punyɔkɔki pú ŋfunyɔm miluli. 5 Boonee ní bí dū unaayee kí wà ŋŋmi u-nimbilin, an dàkà yii u-gbaŋŋu nì u-nanti nì u-fatikuu nì u-poon nanti. 6 Ní usaraaŋakpil ń dū busubu bun bi yíì seediree dɔŋu nì kifaapibiki kin bi yíì isɔpee bambil nì gulfaman kí dūú tɔ̄ ŋŋmi ŋun bíi wù unaayee poon. 7 Míǹ boonee ní usaraaŋakpil ń fíntí u-wampeeŋkaati ní kí fàl̀ kí wàatī ní kí nín gítiń dinaapaal pu, ama ki làá nīn bí tijɔkɔndin kí cáá sāā kujoou. 8 Un di yaa dū unaayee ki wùn̄ ŋŋmee mun ń fíntí u-wampeeŋkaati, kí fàl̀, ní ki làá nīn bí tijɔkɔndin kí cáá sāā kujoou. 9 Uninja un bí circiree ń yáfí unaayee fantam kí cáá yóoń laakin bí circiree dinaapaal kpaanceetiŋu laaba. Isirayeel yab ń dāá dū ŋfantamee kí kpāafì kí dāá dūú ŋá nnyim min bi cáa lèekī binib nì tiwan pu tijɔkɔndeea. An sá kii ikpiti pɔ̄tam saraauee ní. 10 Un di yaa fāā unaayee fantamee, udaan mun ń fíntí u-wampeeŋkaati, kí fàl̀, ní ki làá nīn bí tijɔkɔndin kí cáá sāā kujoou. An sá dibɔkpaal din làá nīn bí kí nīn cá jaanjaanee ní ki tīī Isirayeel yab nì binicambi bin kóò bi-kansikinee.Unil nín máaǹ kí ŋá min kí nyā tijɔkɔndinee
11 «Un yaa gbēē dinikpilee kɔ́ tijɔkɔndin kí tin sāā iwiin iluli. 12 Bí dū nnyim min lèekī tijɔkɔndee kí yɔ̄kɔfì u-pu winta dal nì winluli dal ní ú nín nyā tijɔkɔndin. Ama bi yaa kaa dū nnyimee ki yɔ́kɔfì u-pu winta dal u kpá kí nyā tijɔkɔndin winluli dal. 13 Un di yaa gbēē dinikpil ní baa dū nnyimee ki yɔ́kɔfì udaan puee kɔ́ǹ ti-Dindaan tantiu tijɔkɔndi. Bí nyāntí-u Isirayeel yab kansikin, kun puee bi nín kaa dū nnyim min lèekī tijɔkɔndee ki yɔ́kɔfì u-puee, u-jɔkɔnti pée gbíntìi bí u-pu ní.
14 «Mara ubɔ mun gíti sá yii ubɔ yaa kpíì tanti poonee, bin kɔkɔ kɔ́ utaŋkpiilee cee tanti poonee nì bin pée bí utaŋkpiilee ceeyee kɔ́ tijɔkɔndin áli iwiin iluli. 15 Tiwan tiba yaa yú ní tiba kā poon an kaa púkú ki pɔ̄ɔ̄yeeee, tin kā poonee kɔ́ tijɔkɔndi. 16 Ubɔ di yaa bí kusaau ní ki gbēē dinikpil din ubɔ kūūyee àá un wiiŋŋu di bàn̄ ní u kpíìyee, àá u gbēē anikpab àá dikaakulee, udaan kɔ́ tijɔkɔndin kí tin cáá sāā iwiin iluli. 17 Kí wàatī unil un kɔ́ tijɔkɔndinee ń nyā u-jɔkɔntinee, an sá bí dū unaa un bi dūu ŋá ikpiti pɔ̄tam saraauee fantam ki ŋá kusampeeu poon, ní kí dū nnyim min wāĺ kílkilee ki sìtī ŋfantamee pu. 18 Ní uninja un bí circiree ń lēē kifaapibiki kin bi yíì isɔpee kí nīn sèetī nnyimee poon ki cáa yàantí tanti nì asambil nì binib bin kɔkɔ bí niinee pu, nì un gbēē anikpab àá unil un bi kūūyee, àá un bàn̄ u-wiiŋŋu ki kpíìyee, àá un gbēē dikaakulee pu. 19 Un bí circiree di yɔ́kɔfí un kɔ́ tijɔkɔndinee pu nnyim winta dal nì winluli dal. Boonee ní ú fíntí u-wampeeŋkaati, ní kí dū nnyimee kí fàl̀, kujoou dāa jóotée u nyáń tijɔkɔndin.
20 «Unil un di kɔ́ tijɔkɔndin ní baa yɔ́kɔfì u-pu nnyim an lēē u-jɔkɔntee, bí nyāntí-u Isirayeel yab kansikin. Di sá yii u kɔ́ǹ ti-Dindaan kɔŋkooŋŋu tijɔkɔndi. Bi nín kaa dū nnyim min lèekī tijɔkɔndee ki yɔ́kɔfì u-puee, u-jɔkɔnti pée gbíntìi bí u-pu ní.
21 «Án nīn sá dibɔkpaal ki tīī-bi kí nīn cáa cá jaanjaan. Un di yaa kɔ́ tijɔkɔndin ní bi yɔ́kɔfì u-pu nnyim u nyáń tijɔkɔndinee ń fíntí u-wampeeŋkaati, ní un yaa gbēē nnyim gbantee kɔ́ tijɔkɔndi kí tin cáá sāā kujoou. 22 Kun ní un bí tijɔkɔndinee yaa gbēēyee, kudɔŋu mun kɔ́ tijɔkɔndin, ní unil un gbēē un bí tijɔkɔndinee mun kɔ́ tijɔkɔndin kí tin cáá sāā kujoou.»