Dikàandi Gbɔŋku 18

Bisaraaŋaliibi nì Leefii yab tuuŋŋi

1 Ní ti-Dindaan bí Aarɔn yii: «Sii nì a-jipɔmbi nì a-nabiyaamu mun sá Leefii naakookunee, nimbi di làá nīn kpèé circir kɔŋkooŋŋu. Ubɔ yaa yīntì tiba ŋu-poonee, nimbi di làá nīn yì dibɔkpil, ama ubɔ yaa yīntì saraabi jandi púee, sii nì a-jipɔmbi di dāa yì dibɔkpil. 2 Á dū a-nabiyaamu Leefii yab bin sá a-baa naakookun yabee kí ŋàl̄ a-ba bí nīn bí a-taapu ki tútúǹ-si atuun, ní si nì a-jipɔmbi ń nīn kpèé circir kɔŋkooŋŋu poon tuuŋŋi. 3 Bi làá nín bí a-taapu ní ki kpèé circir kɔŋkooŋŋu. Ama bí taa gbēē circir wanti nì nsaraafan pu wanti tiba, án nín làá ŋá pu si nì bi ń taa kpúee. 4 Bi làá nīn bí a-cee ní kí nīn tūǹ circir kɔŋkooŋŋu poon tuuŋŋi kɔkɔ. Un kaa sá Leefii naakookunee ń taa cèeǹ ni-kansikin. 5 Sii nì a-jipɔmbi di làá nīn tūǹ circir laŋki nì nsaraafan pu tuuŋŋi, mimmee m-ŋuul kaa làá yīkì Isirayeel yab pu. 6 Man di lēē a-nabiyaamu Leefii yab Isirayeel yab kansikin bí nīn sá man yab. Ní m dū-bi ki tīī-ni bí nín tūǹ dikpafindi tantiu poon tuuŋŋi. 7 Ama sii Aarɔn nì a-jipɔmbee, nimbi làá nīn tūǹ disaraaŋal tundi nsaraafan pu nì circir páaa laŋki ŋŋaapìtikaa boon. Disaraaŋal tundi gbantee, man di pú-ni-dì. Un kaa sá Leefii naakookunee yaa sútìi pìl̄-dèe, udaan làá kpú ní.»

Tin sá usaraaŋakpil yatee

8 Ti-Dindaan bí Aarɔn yii: «Kpèè, m dū saraabi bin Isirayeel yab lèekī tin kɔkɔ pée sá circiree pu ki tìì-mee ki ŋá a-ŋaan. Sii ní m dūu tīī, sii di làá nīn kíǹ ki yì ki tin kpáaǹ a-naantiibi. An sá mara ní m yóoǹ án nīn pée bí kí nīn cá jaanjaan. 9 Saraabi bin sá circir bi cáań-mi ki dū dijandi ki wùn̄ ŋŋmee, tin kíǹ baa wùn̄ ki sá nimbi yatee sèé. Tijin saraabi nì ikpiti pɔ̄tam saraabi nì dibɔkpil saraabi. Tiwan gbanti kɔkɔee sá circir ní. Ní yòon̄, sii nì a-jipɔmbi yati dee. 10 Ní jī saraabi gbanti jinti laakin bí circiree. Uninja kamaa ŋūǹ kí jī-tì, tiwan gbanti ń nīn sá circir a-cee. 11 Ní dū ti nee mun kí kūtì. Tiwampɔkaal tin kɔkɔ Isirayeel yab cāabìń-mee, sii di yì. M dūu tīī sii nì a-jipɔmbi nì a-bisalib kí nīn pée cáa cá jaanjaan. An sá mara ní m yóoǹ. A-dicaŋku poon bin kɔkɔ bí circiree ŋūǹ kí jī an jinti. 12 M dū tijincɔ̀fikaal tin bi làá cáań-mee, ŋkpam nì ndamam nì bilee ki tīī-si. 13 Isirayeel yab kpaajinti ticɔfikaal tin bi làá cáań-mee, a-dicaŋku poon un kamaa bí circiree ŋūǹ kí jī an jinti. 14 Tin kamaa ní Isirayeel yab cáań ki sú-mee, sii di yì^a. 15 Mbiseebiyaamu nninjabiyaamu mun bi cāabìń ki ŋáań-mi saraayee, an yaa sá binibeeee, tiwaŋkuteeee, sii di yì. Ama á yàntī bí pà mbininjabiyaamu yil pu, kí pà tiwaŋkuti tin kaa ŋān̄ bí dūú ŋá saraayee mun yil pu. 16 Bí pà kibininjabiki kin cáá uŋmal ubɔee yil pu jitɔmbi biŋmoo, kí nóó nì circir kɔŋkooŋŋu nimbiliŋ ŋmàntitam, nnyiŋfi ń nīn sá graambi saalaa. 17 Ama bí taa pà unaa nì upii nì uŋoobu biseemaliŋ pu. Tíǹ sá ki tīī man ní, bí làntì-tì ní kí dū fatiku kí yàaǹ nsaraafan pu, ní kí dū ti-kpam kí wà ŋŋmi, ní nsɔnsɔfi ń sɔ̀ŋkì m-pɔbil. 18 Tinanee sii di yì, kii a nín tí yì dibindi nì diŋaŋgiitaal din bi dūu ŋá-mi mpèé saraauee puee. 19 Circir wanti tin kɔkɔ pu ní Isirayeel yab làá lēē kí ŋá-mi saraayee, m dūu tīī sii nì a-jipɔmbi nì a-bisalib ní. An sá mpèé ŋun m dū ŋyaam ki ŋá ki tīī sii nì a-maaliŋuee ní, yii sii nì a-biyaamu nì a-naantitɔntɔkɔŋ di làá nīn pée yì an wanti kí nīn cá jaanjaan. Mara gbanti kpá kí kpìtī man a-Dindaan nimbiin^b.» 20 Ní ti-Dindaan bí Aarɔn yii: «Maa làá tīī-si ditinjandi, kii m nín làá tīī Isirayeel yab atinjan puee. Man di sá sii jandi nì a-gaajati Isirayeel yab kansikin.»

Leefii yab jandi din sá bí tīī-bee

21 «An yaa kíǹ Leefii yabee, difakal din m làá tīī-bee di sá Isirayeel yab nín tìì tisaalaatiil tin kɔkɔee. Án nīn sá bi-paati bi nín bí ki tūǹ ditundi din circir kɔŋkooŋŋunee pu^c. 22 Isirayeel yab bin kíǹee ń taa ti sútí kí pìl̄ circir kɔŋkooŋŋu, mimmee baa làá yìntī ní kaa nín kpíì. 23 Leefii yab baba di làá nīn bí circir kɔŋkooŋŋun ki tūǹ atuun. Bíǹ di dāa yì bi-yìntitam tafadaaldi. An sá mara ní m yóoǹ kí nīn pée cáa cá jaanjaan. Leefii yab kaa cáá kí fōō Isirayeel yab kansikin ditinjandi. 24 Ama m làá dū tisaalaatiil tin Isirayeel yab lèekī ki cāabìń-mee ní kí tīī-bi difakal. An pu ní m bí yii baa làá nīn cáá ditinjandi kii Isirayeel yab naakɔti tin kíǹee nín làá nīn cáá puee.»

25 Ní ti-Dindaan bí Mooyiisi 26 ń tùkù Leefii yab yii: «Isirayeel yab yaa láa lēeń bi-saalaatiiti ki tīī-nee, ni mun ń dāá fàtīí lēē poon tisaalaatiil kí ŋá man saraa. 27 Ni yaa lēē míǹ ki tīīyee, ni mun ŋá kii ni-jutiibi nín lèekī bi-kpaajinti nì bi-damam tisaalaatiil pu ki tììyee dee. 28 Míǹ mbaantiim ní an sá ní lēē tisaalaatiil tin kɔkɔ pu ni fòol̄ Isirayeel yab ceeyee kí cáań kí tīī usaraaŋal Aarɔn án nīn sá yii man ní ni ŋá saraa. 29 Tiwampɔkaal tin kɔkɔ bi làá cáań kí tīī-nee, ní lēē tin ŋān̄ee poon kí cáań kí ŋá man saraa.» 30 Á gíti tùkù-bi yii: «Ni yaa lēē tin kɔkɔ sá timɔntiilee ki tīīyee, mimmee ni mun Leefii yab ŋá kii bin béeyee nín lèekī bi-kpaajinti nì bi-damam pu ki tììyee dee. 31 Báà laakiŋyee, ni nì ni-dicaŋŋi ŋūǹ ki jī an jikaati, kun puee an sá atuun ŋin ni tūǹ dikpafindi tantiunee paati ní. 32 Ni yaa lēē dijammɔntiil ki tīī man ní ki yaa yōoǹ tin kíǹee, naa ŋá ikpiti, kaa kpēē ki sīŋkiǹ Isirayeel yab circir saraau, an puee án kaa làá cáań-ni ŋkúm.»