Kooree nì u-naacimbi nì bi-sambiyaamu bɔti
17
1 Ti-Dindaana bí Mooyiisi yii: 2 «Á tùkù usaraaŋakpil Eeleeyasaar, Aarɔn jipɔɔn yii ú kɔ́ ŋŋmin kí tòò nsambiyaamu mun poon bi ŋá talaalutuukaayee, kí kpáatí amɔsiŋkoon ŋin kā poonee kí yàl̄ ndan. Nsambiyaamu gbanti sá circir wanti ní. 3 Nì min kɔkɔ bin yì nsambiyaamuee ŋá ikpiti ní ki kpíìyee, bi nìn cáań-mu man cee ní m ŋá-mu circir. Bí dùntī-mu kí gbá kí kpátí kí wàan̄ bí nīn cáa bìintí nsaraafan pub. Mu làá nīn sá kudaaŋŋu ki tīī Isirayeel yab ní.» 4 Ní usaraaŋakpil Eeleeyasaar yōoǹ tasa kúti sambiyaamu mun binib bin ŋŋmi wùn̄ee nìn ŋúb́ee ki dūntì ki gbáń ki kpátì ki wāaǹ ki dūu bīiǹ nsaraafan pu. 5 Tibiiŋkaal gbanti làá nīn téetí Isirayeel yab yii unil un kamaa di yaa kaa sá Aarɔn dicaŋkunee kaa cáá nsan kí tūū talaalu ti-Dindaan nimbiin. Un kamaa yaa mākaǹee, tin nìn jítì Kooree nì u-naacimbi puee di làá jītí udaan pu, kii ti-Dindaan nín nìn dī Mooyiisi pu ki lī puee.Samaa tí bíi kpākantí Mooyiisi nì Aarɔn
6 Kutaa wúntèe ní Isirayeel yab kɔkɔ tí bíi wòoǹ Mooyiisi nì Aarɔn yii: «Nimbi di yāntì ti-Dindaan nibul kpíì». 7 Niinee Isirayeel yab dɔ́miń ki māntìi tú Mooyiisi nì Aarɔn. Bi dāa fātìi kpēē circir kɔŋkooŋŋu watilee ní ki ká ditagbandi bīī ŋu-pu ní ti-Dindaan nyooti kpákatìńc. 8 Ní Mooyiisi nì Aarɔn sútìi pìl̄ circir kɔŋkooŋŋu punyɔkɔpu, 9 ní ti-Dindaan bí Mooyiisi yii: 10 «Sútímaan kí wàatī samaa nee, m làá kúntí-bi kɔŋkɔnnee.» Ní Mooyiisi nì Aarɔn tātìi dōoǹ dicincibil. 11 Ní Mooyiisi bí Aarɔn yii: «Yòon̄ a-talaalusambiki, kí mɔ́fí nsaraafan pu ŋŋmi kí dūú ŋá, kí lēē talaalutuukaa kí sìtī, kí nīn cá malaa samaa kansikin kí nīn fīintí fīintí kii bi yaa làá ŋá ikpiti pɔ̄tam saraau bi nín ŋáań puee. Di sá ti-Dindaan fōō diŋuul ní u-tafadaaldi kíĺ ki bíi kù binib.» 12 Ní Aarɔn ŋá kii Mooyiisi nín bí yii ú ŋá puee. U nìn sáǹ ki nín cá samaa kansikin. U bàn̄ee ditafadaaldi lafun kíĺ bi-kansikin, ní u tūū talaalu, ní ki ŋá Isirayeel yab pu bi nín dì min ki ŋáań ikpiti pɔ̄tam saraabee. 13 U yúl̀ bin kpíìyee nì bin dáá wāĺee kansikin, ní ditafadaaldi gbēeǹ. 14 Ditafadaaldee nín nìn kūū binib biŋyee nìn nyáń binib kutukub ubɔ kpá saalku nì alaataa aluli. Baa kàan̄ Kooree nì u-naacimbi bin nìn kpíìyee ki kútì poon. 15 Ŋyunti ŋun ní ditafadaaldi gbēeǹee ní Aarɔn fātìi nín gítí Mooyiisi cee circir kɔŋkooŋŋu punyɔkɔpu.
Aarɔn kpandɔŋu bɔti
16 Ti-Dindaand bí Mooyiisi yii: 17 «Tùkù Isirayeel yab yii kunaakoou kamaa kpiliu ń cáań ŋkpandɔ ŋubɔ kí tīī-si. Bi làá cáań-si ikpandɔ saalaa nì ili, ní á ŋmà kunaakoou kamaa niliu yindi u-kpandɔŋu pu. 18 Á ŋmà Aarɔn yindi Leefii yab naakooku kpiliu kpandɔŋu pu, di sá yii kunaakoou kamaa kpiliu máaǹ kí cáań ŋkpandɔ ŋubɔ ní. 19 Á cáá ikpandɔee kí bíĺ ti-Dindaan nimbiin dikpafindi tantiun, dipoondi taŋkpapilinti dakaau nyɔkɔpu laakin ní man nì ni kpáfée. 20 Kunaakoou kpiliu un kpandɔŋu yaa túkúee, unil un m lēēyee dee. Míǹ ní m làá ŋá ní Isirayeel yab ń taa ti nín̄ kpākantí-ni ki cá, ní igbukum ń gbèen̄.» 21 Ní Mooyiisi dū ti-Dindaan nín sòon̄-u puee ki tùkū Isirayeel yab, ní kunaakoou kamaa kpiliu cáań u-kpandɔŋu. Ikpandɔ kɔkɔ nìn nyáń saalaa nì ili, ní Aarɔn yɔŋu mun nìn bí i-kansikin. 22 Ní Mooyiisi cáá ikpandɔee ki bíl̀ ti-Dindaan nimbiin circir kɔŋkooŋŋun. 23 Kutaa wúntì Mooyiisi kɔ́ circir kɔŋkooŋŋunee, Aarɔn un sá Leefii naakookunee kpandɔŋu túkú ki púkuḿ, ní ki lòon̄ abil ŋin bi yíì amandee. 24 Ní Mooyiisi yōoǹní ikpandɔee kɔkɔ ti-Dindaan nimbiin ki cáa nyántì ki dàkā Isirayeel yab, ní báà ŋma fātìi yōoǹ u-kpandɔŋu. 25 Ní ti-Dindaan bí Mooyiisi yii: «Gíiǹ Aarɔn kpandɔŋu kí bíĺ m-dakaau nyɔkɔpu, kí kpāafì-ŋu niin, án nīn sá kudaaŋŋu kí dàkà Isirayeel yab yii bi-pɔbiliŋ gbìfì. An yaa ŋá mimmee bi làá gbèen̄ kí taa ti nín̄ gbùkum̄ m-pu ní bí ŋmátí kí taa ti kpúe.» 26 Ní Mooyiisi ŋá kii ti-Dindaan nín bí ú ŋá puee deedee.