Dikàandi Gbɔŋku 16

Kooree nì Daatan nì Abiiram jáń nì Mooyiisi

1 Uleefiija un bi yíì Kooree u sá Isaar jipɔɔn ki sá Keeyaati maaliŋunee nìn dáaĺ Rubeen naakookun binib bita ki kútì u-ba pu. Bíǹ di nìn sá Eeliyaab jipɔmbi Datan nì Abiiram nì Peeleeti jipɔɔn Ooni^a. 2 Bi nìn bóob́ kí jáǹ Mooyiisi, ní bi ká Isirayeel yab kansikin bin sá abɔtibil nì binikpaambi bin samaa nìn lēē bi kpáfí ki sòoǹ tibɔtee binib alaataa ali nì imuŋku ili nì saalaa ki kútì bi-ba pu. 3 Ní bi dɔ́miń ki kpáfì ki māntìi tú Mooyiisi nì Aarɔn, ní ki bí-bi yii: «Ni nín ŋáań puee gíti lákatì tikpil! Isirayeel yab kɔkɔ bí circir ní ti-Dindaan bí ti-kɔkɔ kansikin. Ba pu ní nimbi dàkafī yii ni jítiǹ ti-Dindaan nibul kɔkɔ ní?»

4 Mooyiisi nín gbìl̄ bi bíi wòoǹ-u mimmee ní u tātìi dōoǹ dicincibil, 5 ní ki bí Kooree nì u-yabee yii: «Fool kutaafaauee, ti-Dindaan làá fu yàntī tí béé un sá u-yɔuee, un u dūu sú u-ba ú nīn sútí ki pìl̀-uee. U làá fu yàntī un u lēēyee ń sútí kí pìl̄-u. 6 Míǹ puee sii Kooree nì a-naacimbi, foolee ní fu nín̄ ŋúbiń nsambiyaamu mun poon bi tùutī talaaluee. 7 Ní fu mɔ́fí ŋŋmi kí ŋá poon, kí dū talaalutuukaa kí páań ŋŋmi pu kí yóoń ti-Dindaan nimbiin. Niin ní ti làá fu béé un ti-Dindaan lēē ú nīn sá u-yɔuee. Nimbi Leefii yabee, m gīiǹ ni-bɔti!»

8 Ní Mooyiisi gíti bí Kooree yii: «Nimbi Leefii yabee, pīlifìmaan! 9 Ti-Dindaan Isirayeel Nimbɔtiu nín lēē-ni ni-nabiyaamu kansikin ní nīn sútí ki pìl̀-u, kí nīn tūǹ atuun ni-nabiyaamu yil pu circir kɔŋkooŋŋun ti-Dindaan nimbiinee, an kaa yá kí kɔ́-naaa? 10 U yāntì sii Kooree nì a-nabiyaamu Leefii yab sútí ki pìl̀-u ní ni gíti bí ki nyàab̀ disaraaŋal tundaa! 11 An pu ní sii nì a-naacimbi bóob́ kí jáǹ ti-Dindaanaa! Di sá yii, ŋma di sá Aarɔn ní ni kpākantí-u?»

12 Ní Mooyiisi tú bí yíiń Eeliyaab jipɔmbi Daatan nì Abiiram, ní bíǹ kíí yii: «Taa làá dāan̄! 13 A yōoǹní-ti kitiŋ kin poon nnaabiim nì tisiil còol̀ee ki cáań-ti kí kpɔ̀ kuteeun doo, míǹ kaa yá ki kɔ́-si, ní a gíti là kí dàkà mpɔn kí nīn sá ti-bɔtiuaa! 14 An kaa sá kitiŋ kin poon nnaabiim nì tisiil còol̀ee ní a cáǹ-ti. An kaa sá tisati nì fiinyib ní a tīī-ti difakal! A dàkafī yii ti sá bijɔfub níii? Ti yíì taa làá dāan̄!» 15 Mooyiisi nín gbìl̄ mimmee ní u fōō diŋuul tikpil ní ki bí ti-Dindaan yii: «Á taa fōō bi-saraau. Man kaa fōō bi-kansikin ubɔ maŋki kpaŋkpan. Maa tí ŋá bi-kansikin báà ubɔ ikpiti.»

Kooree nì u-naacimbi tafadaaldi

16 Ní Mooyiisi bí Kooree yii: «Sii nì a-naacimbi ń fu dāan̄ kí yūĺ ti-Dindaan nimbiin, Aarɔn mun làá fu nín̄ bí. 17 Sii nì a-naacimbi binib alaataa ali nì imuŋku ili nì saalaayee, báà ŋma ń fu nín̄ ŋúb́ u-sambiki kin poon u ŋáań talaalutuukaayee nì talaalu kí cáań ti-Dindaan nimbiin. Sii nì Aarɔn mun ń nīn ŋúb́ ni-yɔmu.» 18 Ní Kooree nì u-naacimbi lafun ŋúbiń bi-sambiyaamu mun poon bi ŋáań talaalutuukaayee, ki ŋá ŋŋmi poon, ní ki dū talaalutuukaa ki sītì poon, ní ki cūtìi yúl̀ circir kɔŋkooŋŋu punyɔkɔpu, bi nì Mooyiisi nì Aarɔn. 19 Ní Kooree kpáfì Isirayeel samaau bi yú ki túĺ Mooyiisi nì Aarɔn circir kɔŋkooŋŋu punyɔkɔpu.

Ní ti-Dindaan lēē u-nyooti ki dàkā samaa kɔkɔ. 20 Ní ti-Dindaan bí Mooyiisi nì Aarɔn yii: 21 «Ní kàkatī ni-ba kí wàatī binib nee, di sá m làá kúntí-bi dibɔbil pu doo!» 22 Ní Mooyiisi nì Aarɔn tātìi dōoǹ dicincibil ní ki bíi kūuntí yii: «Óo Unimbɔti, sii un tìì tiwannáaŋkaal kɔkɔ dimaŋfalee, unibaanti kpitii puee, a làá fōō samaa nee kɔkɔ pu diŋuulaaa?» 23 Ní ti-Dindaan bí Mooyiisi yii: 24 «Á tùkù samaa un kóò ki pìl̄ Kooree nì Daatan nì Abiiramee yii bí kàkatī kí wàatī-bi.»

25 Ní Mooyiisi yíkì, ní Isirayeel yab kpilib páaǹ u-boon ní bi nín cá Daatan nì Abiiram cee. 26 Ní u bí samaa yii: «Ní kàkatīmaan kí wàatī binikpitib nee tantib, kí taa gbēē bi-wanti báà tiba, án nín làá ŋá pu bi-kpitii puee, ní taa kpúee.» 27 Ní bin kóò ki pìl̄ Kooree nì Daatan nì Abiiramee yíkìi wāatì-bi.

Ní Daatan nì Abiiram nyáń ki yú bi-tantib nyɔkɔpu, bi nì bi-nimpoobi nì bi-biyaamu nì bi-naantiibi. 28 Ní Mooyiisi bí yii: «Tin làá ŋá nee di làá yàntī ní béé yii ti-Dindaan di túnní-mi ḿ nīn tūǹ atuun ŋin bí nee kɔkɔ. An kaa sá man m-ba pɔŋŋu pu. 29 Binib nee yaa kpíì kii báà ŋma wiiŋŋu nín bà ú kpú puee, mimmee ti-Dindaan di kaa túnní-mi. 30 Ama ti-Dindaan yaa ŋá maamaaci tundi, kitiŋ dū bi nì tin bi cááyee kɔkɔ ki náĺ, bi yaa sīntì ditaŋkpiilin nì bi-nimbiliŋee, míǹ di làá dàkà-ni yii bi bēel̀ ti-Dindaan.» 31 Mooyiisi tin pée lì yii u sòoǹ ki ŋmīlifée, laakin bi yúee, kitiŋ cúu látì bi-taaŋi taapu, 32 ki wāaǹ ki-nyɔkɔ ní ki dū bi nì bi-dicaŋŋi ki náĺ ki kpáaǹ Kooree yab nì tin kɔkɔ bi cááyee. 33 Bi pée wāĺ ní ki sīntì ditaŋkpiilin bi nì bi-wanti kɔkɔ, kitiŋ bīiǹ bi-pu ní baa ti ká-bi Isirayeel yab kansikin. 34 Isirayeel yab bin nìn yú ki pìl̄-bee nín gbìl̄ bi bí ki gbáà ibiilee ní bi sáǹ ki lì yii: «Tí sām̀maan kitiŋ ń taa kpáaǹ ti mun kí náĺ!»

35 Ní ŋŋmi ŋubɔ nyánní ti-Dindaan cee ki wùn̄ bin nìn bíi tùutī talaalub ti-Dindaan nimbiinee binib alaataa ali nì imuŋku ili nì saalaa.