Dikàandi Gbɔŋku 15

Tijimpin saraabi marab

1 Ti-Dindaan bí Mooyiisi 2 ń sòoǹ nì Isirayeel yab kí tùkù-bi yii: «Ni yaa láa bàn̄ kitiŋ kin m làá tīī-ni ní mā kí nīn kóòyee poonee, 3 ní dāá ŋá-mi saraabi. Ní dāá ŋá-mi saraawɔkaa àá mpèé saraabi kí pà ipoon àá an nīn sá nlammɔntiim saraau, àá ni-jiŋaalib yuntiŋuee. Ní dāá dū unaa àá upii àá uŋoobu kí ŋá an saraabi, ní u-sɔnsɔfiŋu ń sɔ̀ŋkì m-pɔbil. 4 Un cáań kuwaŋkuluu kí ŋá saraa kí tīī-mee ń dū ŋyim kiiloobi bita, kí dū ŋkpam liitiri ubɔ nì dijandi kí búuń ŋyimee kí kūtì kuwaŋkuluuee pu. 5 Bi yaa làá dū dipibil kí ŋá saraawɔkaa àá mpèé saraauee, bí dū ndamam liitiri ubɔ nì dijandi kí kūtì kí ŋá saraa. 6 An yaa sá upìjee, bí dū ŋyim kiiloobi biluu, kí dū ŋkpam liitirib bili ki dūú búuń ŋyimee kí kūtì kí ŋá saraa. 7 Ní dū ndamam liitirib bili kí kūtì, ní u-sɔnsɔfiŋu ń sɔ̀ŋkì m-pɔbil. 8 An yaa tí sá unaja ní bi làá dūú ŋá saraawɔkaa àá mpèé saraau kí pà ipoon àá án nīn sá nlammɔntiim saraau kí tīī-mee, 9 bí dū ŋyim kiiloobi biwa, kí dū ŋkpam liitirib bita kí búuń ní kí dūú kūtì kuwaŋkuluu pu kí ŋá saraa. 10 Ní dū ndamam liitirib bita kí kūtì, ní u-sɔnsɔfiŋu ń sɔ̀ŋkì m-pɔbil.

11 «Bi yaa làá dū unaja àá upìja àá dipibil àá diŋɔbil kí ŋá saraayee, bi nín máaǹ kí nīn ŋáań miŋyee dee. 12 Tiwaŋkuti tin bi dūu ŋá saraayee nyɔkɔm yaa sá puee, bí nyàab̀ ŋyim nì ŋkpam nì ndamam kí ŋàl̄ kuwaŋkuluu kamaa. 13 Míǹ ní Isirayeel yab kɔkɔ máaǹ kí nóó mara un m síiǹ nee kí ŋá saraabi bin nyiim sɔ́fèe kí tīī-mi. 14 Binicambi bin kɔ́ ni-puee nì bin naanjab nìn kɔ́ ni-puee mun yaa là kí ŋá saraabi bin nyiim sɔ́fèe kí tīī-mee, bi mun ń dī mara un m síiǹ-ni nee pu kí ŋá saraabi gbanti. 15 Maree làá nīn sá ubaanti ní ki tīī nimbi Isirayeel yab nì binicambi. U làá nīn pée sá ubaanti míǹ ní kí nīn cá jaanjaan man ni-Dindaan nimbiin ki tīī nimbi nì binicambi kɔkɔ. 16 Marabaanti nì dibɔkpaal dibaantiil ní án làá nīn sá ki tīī nimbi bin sá bitindambee nì binicambi bin kɔ́ ni-puee kɔkɔ^a.»

Bikpɔnɔpeepeekaabi saraau

17 Ti-Dindaan bí Mooyiisi 18 ń tùkù Isirayeel yab yii: «Ní yaa láa bàn̄ kitiŋ kin poon m cáǹ-ni nee, 19 ní ki kíǹ ki jīǹ kitiŋ gbanti jintee, ní dāá lēē tijinee poon kí ŋá saraa kí tīī-mi. 20 Ni yaa láa nùkū kpɔnɔ saabuee, ní dāá lēē dipál din ni péé péé ki nùkūee poon ki ŋá ŋkalaawaamu. Ní dāá lēē kii bi nín yaa gbáń tijimpin ki cāatì bi nín lèekī kí ŋá saraa kí tīī-mi puee. 21 Míǹ ní ni làá nín pée lèekī ŋkalaawaamu mun ni làá péé péé kí púĺee kí ŋá saraa kí tīī-mi. An sá mara ní m yóoǹ-ni kí nīn pée cáa cá jaanjaan.»

Ikpiti in unil kaa là ní ki ŋée saraau

22 Tí lì yii naa béè ní ki yīntì marab bin ní m tīī Mooyiisi ú dūú nàatī-ni nee kansikin ubɔ, 23 an dàkà yii tin kɔkɔ man ni-Dindaan dī Mooyiisi pu ki ŋmàn̄ ki kpáafì ni nì ni-naantitɔntɔkɔŋ ní nīn ŋúb́ kí yòon̄ ŋwiin ŋun ní u ŋmàn̄-tèe kí nīn pée cáa cá jaanjaanee. 24 An yaa sá yii udaan yīntì míǹ ní samaa kaa béèyee, samaayee di làá dū unaja kí ŋá saraawɔkaa, ní u-sɔnsɔfiŋu ń sɔ̀ŋkì m-pɔbil. Ú ŋá tijin nì ndaam saraau mun kii dikoobil nín sá puee, ní kí dū uŋɔja kí ŋá ikpiti pɔ̄tam saraau. 25 Usaraaŋal ń ŋá Isirayeel samaau pu dikoobil din u máaǹ kí ŋée ní bí ká bi-kpitii pɔ̄tam. Di sá yii baa nyí ní ki yīntì, an pu ní bi cáań saraabi bí dūú wà ŋŋmi kí tīī ti-Dindaan ní ki cáań saraa ki ŋá kí ká ikpiti in baa nyí ki ŋée pɔ̄tam. 26 Isirayeel samaau kɔkɔ nì binicambi bin kóò bi-kansikinee làá ká bi-kpitii pɔ̄tam, kun puee bi-kɔkɔ di ŋá ikpiti gbanti.

27 Unibaanti di yaa kaa nyí ní ki ŋá ikpitee, ú dū uŋɔsal un cáá dibindi dibee kí ŋá ikpiti pɔ̄tam saraau. 28 Usaraaŋal ń ŋá un kaa nyí ki yīntèe pu dikoobil din u máaǹ kí ŋée man nimbiin, ní udaan ń ká u-kpitii pɔ̄tam^b. 29 An yaa sá Isirayeel yabaaa, binicambi bin kóò bi-kansikineeyaaa, mara nee làá nīn pée sá ubaanti ní ki tīī bin kɔkɔ kaa nyí ní ki yīntèe.

30 Ama an yaa sá Isirayeel yabeeee, binicambi bin kóò bi-kansikineeyeeee, ni-kansikin un di yaa gāā u-bindi ní ki ŋá ikpitee, u kpēē man ni-Dindaan fám dee. Bí nyāntí-u Isirayeel nibul kansikin. 31 Udaan nín kpēē man ni-Dindaan nyɔɔbundi fám ki yīntì m-marabee puee, bí nyāntí-u. Udaan làá túń u-kpitii gìńdi.

Un yīntì ŋwiŋŋuŋfikaa marauee tafadaaldi

32 Isirayeel yab nín nìn dáá bí kuteeun puee, bi nìn ká uninja ubɔ bí ki píikí idɔ ŋwiŋŋuŋfikaa dal. 33 Bin nìn ká-u u bíi píikí idɔee cúú-u ki cáań Mooyiisi nì Aarɔn nì samaa kɔkɔ cee. 34 Bi nìn dá láá dū-u ki kāaǹ ki cí-u tiŋan, kun puee baa nìn dá láá nyí un yīntì ŋwiŋŋuŋfikaa marauee nín máaǹ ditafadaaldi diŋyee. 35 Ti-Dindaan nìn bí Mooyiisi yii: «An niliuee máaǹ ŋkúm ní. Bí nyāntí-u dinaapaal kpaanceetiŋu samaa kɔkɔ ń yāŋkì-u ataŋkpee kí kpɔ̀.» 36 Samaa kɔkɔ nìn nyántì-u dinaapaal kpaanceetiŋu ki yáŋkì-u ataŋkpee ki kūū, kii ti-Dindaan nín nìn tùkū Mooyiisi yii bí ŋá puee.

Abɔkuti gbeeŋgbeeŋyi bɔti

37 Ti-Dindaan nìn bí Mooyiisi 38 ń tùkù Isirayeel yab yii: «Kí yòon̄ nimbi nì ni-naantiibi bin bí ki dòońee, ni yaa làá ŋáĺ abɔkutee, ní dāá ŋá igbeeŋgbeen tibɔkutijúti pu kí dū gulfaman kí kúĺ^c. 39 Ni yaa pēē dibɔkutil ní ki wāĺ igbeeŋgbeenee, ni làá nīn téetí ni-Dindaan marab kɔkɔ pu, kí nīn ŋáań marabee nín bí ní ŋá puee. Mimmee naa làá yàntī ni-landɔkɔi nì ni-nimbikpeeŋu ń téé-ni kí kɔ́ǹ iwaatootin. 40 Án làá yàntī ní téetí m-marab kɔkɔ pu kí nīn tɔ́-bi, ní kí nīn sá man ni-Nimbɔtiu yab. 41 Man di sá ni-Dindaan ni-Nimbɔtiu un nyántìń-ni Eejipiti tiŋkin kí nīn sá ni-Nimbɔtiuee. Man di sá ni-Dindaan ni-Nimbɔtiu.»