Dikàandi Gbɔŋku 14

Isirayeel yab yíì kaa kɔ́ Kanaan tiŋkin

1 Isirayeel yab kɔkɔ nìn gbáń ibiil ki súń míǹ kunyamɔŋu gbanti. 2 Samaayee kɔkɔ nìn bí ki wòoǹ Mooyiisi nì Aarɔn ní ki lì-bi yii: «Ti yaa bàà nìn kpíìń Eejipiti tiŋkin àá ti yaa tí kpíì kuteeun doo, an bàà sɔ́! 3 Ba pu ní ti-Dindaan cáǹ-ti kitiŋ nee poon bí tin kpɔ̀-ti ní? Bi làá tin kpɔ̀-ti ní kí cúú ti-nimpoobi nì ti-biyaamu kuyuŋu. Ti yaa fātìi nín gítí Eejipiti, an kaa sɔ́ɔɔ?» 4 Ní bi bí ki lì tɔb yii: «Tí kàam̄maan ukpil ubɔ kí nīn gítí Eejipiti!»

5 Ní Mooyiisi nì Aarɔn tātìi dōoǹ dicincibil Isirayeel yab samaau kɔkɔ nimbiin. 6 Ní Nuuni jipɔɔn Joosuwa nì Yeefunee jipɔɔn Kaaleeb bin nìn ŋmàl̄ bin cūtìi cɔ́ŋkì kitiŋee kansikinee, cúú bi-bɔkutiŋ ki cátì, 7 ní ki bí Isirayeel yab samaau kɔkɔ yii: «Kitiŋ kin ti cūtìi yìin̄ ki kpēēyee sá kitimmɔmmɔntii ní! 8 An sá kitiŋ kin poon nnaabiim nì tisiil còol̀ee ní. Ti-Dindaan yaa yú ti-boon, u làá kɔ́ǹ-ti ki-poon kí dū-kì kí tīī-ti. 9 Tin páb́ee di sá ní taa jáǹ ti-Dindaan, kí taa fàŋkì kitiŋ gbanti nib. Ti làá já kí pɔ̄ɔkiǹ-bi sɔ́kɔ sɔkɔ. Di sá bi-waaŋi ŋin cí-bee dū-bi ki fá, ama ní timbi Dindaan bí ti-cee. An puee taa fàŋkìmaan-bi.»

10 Ŋyunti ŋun samaa kɔkɔ bíi màkafī kí yāŋkì-bi ataŋkpee kí kpɔ̀ee ní ti-Dindaan nyooti dɔ́miń circir kɔŋkooŋŋun Isirayeel yab kɔkɔ nimbiin.

Mooyiisi gbāam̀ samaa pu

11 Ti-Dindaan bí Mooyiisi yii: «Kí tin sāā ŋyunti ŋulɔŋu ní dinibul nee làá gbèen̄ kí taa ti kpèè-mi fám ní? Kí tin sāā ŋyunti ŋulɔŋu ní bi làá yíí kí taa nín̄ cáá m-pu dimákal, nì min kɔkɔ m ŋá maamaacikpaambi bin bí nee bi-kansikinee? 12 M làá yàntī bìlbil kúm ń dāá kpɔ̀ kí céetí bi-kɔkɔ, ní bí lóó bi-fakal ní m dī sii pu kí náań ditimbuŋkpaandi din cáá mpɔn ki jítiǹ-bee.» 13 Ní Mooyiisi kíí ti-Dindaan yii: «Eejipiti yab nyí yii a dū a-pɔŋŋu ní ki nyántìń-bi bi-cee. 14 Ní bi tùkū binib bin di kóò kitiŋ nee puee, ní bi mun bi-ba gbìl̄ yii sii ti-Dindaan bí dinibul nee cee, ki nyāntí a-ba ki dàkà-bi, ki sá ditagbandi ki dàn̄ bi-pu ki còom̄ ki līī bi-nyɔkɔpu ŋwiimpu, ki sá-bi ŋŋmi tagbandi kunyeeu. 15 A yaa kúntì dinibul nee kɔkɔ míǹ kii unibaantee, atimbun ŋin gbìl̄ bi sòoǹ a-puee làá lì yii: 16 <Ti-Dindaan nín nìn pūtì ki pōoǹ yii u làá cáá u-nibul kí cùnnì kitiŋ kin poonee, waa ŋúń ki cáá-bi ki bàn̄, an pu ní u kūū ki céetì-bi kuteeun.> 17 Míǹ puee m gbàam̄-si, m-Dindaan, nyāntí a-pɔŋkpaaŋŋu kí dàkà, kii sii a-ba nín lī puee yii: 18 <M sá ni-Dindaan un kaa gífí diŋuul malaayee, ní m-ŋanti wīikí tikpil. M pūǹ ikpiti kɔkɔ nì i-bulifi. Ama maa tàantí unikpiti kaa dáaĺ u-tafal. M dátí unikpiti tafal kí tin kpáaǹ u-naantitɔntɔkɔŋ ata àá anaa^a.> 19 M-Dindaan, kii a-ŋanti nín wīikí puee, dū a-nibul nee kpitii kí pɔ̄-bi, kii doooo a nín nyántìń-bi Eejipiti tiŋkin bi pée ŋáań-si ikpiti a cáa pūǹ-bi puee^b.»

20 Ní ti-Dindaan bí yii: «Kii a nín gbāam̀ yii ḿ dū bi-kpitii kí pɔ̄-bee, m dūu pú-bi. 21 Ama tiŋman, m nín bí dimaŋfalin ní m-nyooti gbí kitiŋ kɔkɔ pu nee, 22 bin kɔkɔ ká m-nyooti nì tidaandi tin m ŋá Eejipiti tiŋkin nì kuteeun, ama ní ki cɔ́ŋkì-mi ŋfunyɔm saalaa pu kaa pílifì m-nyɔkɔee, 23 bi-kansikin ubɔ kpá kí kɔ́ kitiŋ kin m pōoǹ bi-baabi yii m làá tīī-bee. Bin kɔkɔ pée kpēē-mi fámee kpá kí kɔ́ ki-poon^c. 24 Ama kii ŋfam min kpòotī m-tɔntɔnliu Kaaleebee nín nyáń mi-ba u nóó-mi deedee puee, m làá yàntī ú kɔ́ kitiŋ kin u cūtìi kpēēyee poon, ní u-naantiibi ń dāá jī-kì^d. 25 Amaleeki yab nì Kanaan yab di dá láá kóò kitiŋ gbantin. Foolee ní fu fàtī ni-boon kí dūú dī kuteeun, Tikati mɔɔl watil.»

Ti-Dindaan dáaĺ u-nibul tafal

26 Ní ti-Dindaan bí Mooyiisi nì Aarɔn yii: 27 «M gbìl̄ Isirayeel yab nín bí ki kɔ́kɔĺ-mee. Kí tin sāā ŋyunti ŋulɔŋu ní m làá yàntī samaa un kaa bí diŋubil nee ḿ nīn gbùkum̄ m-pu ní? 28 Ní tùkù-bi yii: <Man ni-Dindaan bí dimaŋfalin. M pūtì ki lī yii, ni nín pée sòon̄-mi puee, míǹ ní m làá téeǹ-ni. 29 Kuteeun doo ní ni làá gbíntí kí kpú. Nimbi bin kɔkɔ bi nìn kàan̄ ni cáá abin mmuŋku kí nīn cée làá kpú ní, kun puee ni kɔ́kɔl̀-mi^e. 30 M pūtì yii naa làá kɔ́ kitiŋ kin m nìn pōoǹ yii m làá kàan̄-nee poon. See Yeefunee jipɔɔn Kaaleeb nì Nuuni jipɔɔn Joosuwa baba di làá kɔ́. 31 Ni-biyaamu mun pu ni lī yii bi làá kpɔ̀-ni kí yòon̄ee, múǹ ní m làá yàntī mú kɔ́ kí béé kitiŋ kin nimbi kpēē ki sīŋkiǹee. 32 Nimbee, ni làá gbíntí kuteeun doo ní kí kpú. 33 Ni-biyaamu làá nīn bí kuteeun ní ki kàal̀ ki póotí ikakaa ki kpàá bi-waŋkuti, kí túń ni nín nyáń m-boon puee gìŋ́ŋi áli abin imuŋku ili, kí nīn cí nimbi kɔkɔ ń dāá kpú kí céetí^f. 34 Ni dū iwiin imuŋku ili ní ki kpēē Kanaan tiŋki. Míǹ ní ni làá dū abin imuŋku ili kí túń ni-kpitii gìŋ́ŋi, ŋwiin ŋubɔee dibindi diba, ní ní béé yii baa kpèé man fám.> 35 Man ni-Dindaan nín pūtì ki sòon̄ puee dee. Míǹ ní m làá náatí m-samaau un kaa bí diŋubil ki kpáfì kí jáǹ-mee. Bi-kɔkɔ làá gbíntí kuteeun doo ní kí kpú kí céetí.»

36 Mooyiisi nìn tú binib bi cūtìi kpēē Kanaan tiŋki. Bi nìn gítìńee ní ki sòon̄ ki bíil̀-kì ki yāntì samaa bíi wòoǹ Mooyiisi. 37 An nibee nìn kpíì dicilpu dicilpu. An nìn fáá-bi ki kūū ti-Dindaan nimbiin, kun puee bi nìn sòon̄ ki bíil̀ kitiŋee. 38 Nuuni jipɔɔn Joosuwa nì Yeefunee jipɔɔn Kaaleeb baba di nìn kíǹ bin bi nìn tú bi cūtìi kpēē kitiŋee kansikin kaa kpíì.

Samaa tí yīntiǹ ti-Dindaan

39 Mooyiisi cáań tibɔti tin ti-Dindaan sòon̄ nì uee ki tùkū Isirayeel yab, ní kunimbaakpaaŋŋu kɔ́-bi. 40 Ku wúntì kutaafaau pɔ̀lpɔlee ní bi yíkì ki cūtìi jɔ́m̀ ajoon pu tiŋki, ní ki bí yii: «Ti lafun ŋá ikpiti, ama kɔŋkɔnnee ti làá cù kí jáǹ binib gbanti kii ti-Dindaan nín lī puee.» 41 Ní Mooyiisi bí-bi yii: «Ba pu ní ni bíi yìntī ti-Dindaan marau míǹ? Ni yaa cūtì naa làá ŋmā. 42 Taa cùmaan kun puee ti-Dindaan kaa bí ni-cee. Ní taa cáá ni-ba kí tīī ni-nannanliibi ń kpɔ̀. 43 Di sá Amaleeki yab nì Kanaan yab bí ni-nyɔkɔpu. Ni yaa cūtì bi làá kpɔ̀-ni. Ni nín fātì ni-boon ki tīī ti-Dindaanee, waa ti bí ni-cee.»

44 Nì míǹ kɔkɔee bi ŋá ŋyipɔn ki nín jɔ́ḿ ajoon pu tiŋkin, ama ti-Dindaan dakaau nì Mooyiisi nìn gbíntì dinaapaal pu kaa cūtì. 45 Ní Amaleeki yab nì Kanaan yab kpákatìń ajoon tiŋki pu, ki jáń ki pɔ́ɔkiǹ Isirayeel yab sɔ́kɔ sɔkɔ, ní ki jìn̄ bin kíǹee ki tin bàn̄ Ɔrima tiŋki.