Dikàandi Gbɔŋku 13

Binib saalaa nì bili cūtìi cɔ́ŋkì Kanaan tiŋki

1 Ti-Dindaan bí Mooyiisi yii: 2 «Tɔ̄ binib bí cùú cɔ̄ŋkì Kanaan tiŋki kin m làá dūú tīī Isirayeel yabee. Lēē kunaakoou kamaa poon ukpil ubɔ kí tɔ̄.» 3 Mooyiisi nìn lēē-bi ki tú, kii ti-Dindaan nín nìn lī puee doooo Paaran teekun. Bi-kɔkɔ nìn sá Isirayeel yab kpilib ní. 4 Bin bi nìn túee yiŋŋi sɔ̀.

Sakuur jipɔɔn Samuwa, u sá Rubeen naakookun.

5 Koor jipɔɔn Saafati, u sá Simeeyɔn naakookun.

6 Yeefunee jipɔɔn Kaaleeb, u sá Juuda naakookun.

7 Jooseefi jipɔɔn Yigeeyal, u sá Isakaar naakookun.

8 Nuuni jipɔɔn Ooseeya, u sá Eefiraayiim naakookun.

9 Raafu jipɔɔn Paltii, u sá Beenjameen naakookun.

10 Soodi jipɔɔn Gadiyeel, u sá Sabulɔn naakookun.

11 Suusi jipɔɔn Gaadi, u sá Jooseefi jipɔɔn Manasee naakookun.

12 Geemalii jipɔɔn Amiyeel, u sá Daani naakookun.

13 Miisayeel jipɔɔn Seetuur, u sá Aseer naakookun.

14 Fɔfisii jipɔɔn Naabi, u sá Neefitalii naakookun.

15 Maaki jipɔɔn Geewuyeel, u sá Gaadi naakookun.

16 Binib bin Mooyiisi nìn tú bí cùú cɔ̄ŋkì kí kpèè Kanaan tiŋkee yiŋŋi dee. Mooyiisi nìn páaǹ Nuuni jipɔɔn Ooseeya diyindi yii Joosuwa^a.

17 Ŋyunti ŋun Mooyiisi làá nìn tɔ̄-bi bí nīn cée ní u bí-bi yii: «Ní dī doo ki jɔ̄m̀ Neegeeb, an dàkà yii ŋgiil pú, ní kí tin dàb̄ ajoon kí nyā Kanaan. 18 Ní cɔ̄ŋkì kí kpèè yii kitiŋ gbanti bí mana, kí kpèè yii ki-nib pɔ̄ɔ̄yaaa, baa pɔ̄ɔ̄, kí kpèè yii ki-nib wīikáaa, baa wīikí. 19 Ní kpèè yii kitiŋ gbanti ŋān̄aaa, kaa ŋān̄, kí kpèè yii bi máń agun ki māntìi tú ntimu mun poon bi kóòyeeyaaa, baa máń. 20 Ní kpèè yii kitiŋ gbanti cáá ntiŋkpamaaa, kaa cáá, kí kpèè yii isufi nyēē tiŋanaaa, iaa nyēē. Kámaan dipɔbil kí nīn cá, ni yaa gítińee ní lēeń niin subiliŋ kí cáań.» An nìn sá ŋyunti ŋun ní fiinyi lòoǹ abipeepeekaayee ní.

21 Ní bi búntì ki cūtìi cɔ́ŋkì Kanaan tiŋki ki kíĺ Siini teekun áli ki tin bàn̄ Leeyoob-Amati caŋin. 22 Bi nìn dī ki jɔ́m̀ Neegeeb pú, ki tin bàn̄ Eebrɔn, laakin Anaaki nibul nì Ayiiman yab nì Seesayi yab nì Talimayi yab nìn kóòyee. - Bi nìn máń Eebrɔn tiŋki abin aluli boon ní bi dāa nín náań Soowan tiŋki Eejipiti tiŋkin. - 23 Ní bi dī kí nīn cá Eeskool tantakalin ní ki gāań fiinyi biliŋ disakal ki dūu lúntì ndɔ pu ní binib bili bùkū. Bi nìn lēeń greenaadi nì fiigi subiliŋ mun. 24 Isirayeel yab nín nìn gāań fiinyi biliŋ disakalee pu ní bi pú niin diyindi yii Eeskool, taapu di sá yii: <Disakal tantakal>.

Bin Mooyiisi túee gítìń ki cáań tin bi kée

25 Bi nìn dū iwiin imuŋku ili ní ki cōom̀ ki cɔ́ŋkì Kanaan tiŋki ní ki fātìi gítìń. 26 Bi bāańee ní ki cūtìi ká Mooyiisi nì Aarɔn nì Isirayeel samaau kɔkɔ Kaadeesi, Paaran teekun, ní ki máafì-bi tin kɔkɔ bi kée, ní ki dū kitiŋee poon subiliŋ ki dàkā-bi. 27 Tin bi nìn dɔ́miń ki máafì Mooyiisee sèé: «Ti nín bàn̄ kitiŋ kin poon a tú-tee, tiŋman nnaabiim nì tisiil còol̀ ní. Kpèè abil ŋin kì lòoǹee^b. 28 Ama binib bin kóò kitiŋ gbantinee cáá mpɔn tikpil, ní bi máń aguŋkpaan ki māntìi tú bi-timmu. Ti ká gba kujawɔkɔu Anaaki naantiibi niin. 29 Amaleeki yab kóò Neegeeb, ní Eeti yab nì Jeebusi yab nì Amɔɔr yab kóò dijool pu, ní Kanaan yab kóò dimɔɔl caŋin nì Jɔɔdan buŋgbandi.»

30 Ní Kaaleeb céefì samaa un bíi kpākantí Mooyiisee ń ŋmīĺ, ní u bí-bi yii: «Tí cùmaan, ti làá já kí fōō kitiŋ gbanti, kun puee ti làá ŋmā kí já kí pɔ̄ɔkiǹ ki-nib!» 31 Ama bin nì Kaaleeb nìn cūtì ki cɔ́ŋkì kitiŋee bí yii: «Taa ŋūǹ kí cùú já nì binib nee, bi pɔ̄ɔǹ-ti sɔ́kɔ sɔkɔ ní.» 32 Niinee ní bi kíĺ ki bíi sòoǹ ki bíiĺ kitiŋ kin bi cūtìi cɔ́ŋkèe Isirayeel yab nimbiin. Bi nìn lī yii: «Kitiŋ kin ti cūtìi cōom̀ ki cɔ́ŋkèe nátí ki-nib bin kóò ki-puee, ní binib bin ti ká niinee sá tinikpaandi. 33 Ti ká Anaaki naantiibi tijawɔkɔl niin, ní ti yaa kpēē ti-bee, timbi sá kii inaakitoonee ní bi-cee. Míǹ ní bi mun wāĺ-ti yii ti sá^c.»