Dikàandi Gbɔŋku 12

Miiriyam kpántì unyaŋgbanti

1 Mooyiisi nìn cáá unimpu ubɔ u sá Kuusi tiŋkin, ní Miiriyam nì Aarɔn nìn bíi kpākantí-u u-nimpucáatam gbanti pu. 2 Bi nìn bí ki lì yii: «Mooyiisi baba pu ní ti-Dindaan pée dī ki sòon̄aaa? Waa dī ti mun pu ki sòon̄aaa?» Ní ti-Dindaan gbìl̄ tin bi sòon̄ee. 3 Di sá Mooyiisi nìn sá unil un sīntì u-ba taapu tikpil ki jítiǹ kitiŋ pu nib kɔkɔee ní. 4 Kpalaayee ní ti-Dindaan yíiń Mooyiisi nì Aarɔn nì Miiriyam ki bí-bi yii: «Ni-taatil ń dāan̄ circir kɔŋkooŋŋu nyɔkɔpu.»

Ní bi nyáń ki búntì. 5 Ti-Dindaan nìn sīntìń ditagbancancaal poon ki yúl̀ tanti punyɔkɔpu. Ní ki yíiń Aarɔn nì Miiriyam, ní bi-liitil nyáń ki síl̀^a. 6 Ní ti-Dindaan bí-bi yii: «Ní pīlifì tin m cáá kí tùkù-ni nee tiŋan. Ni-kansikin m-bɔnaatiliu yaa bée, an sá nì dileedakal nì tidamintiil poon ní man ni-Dindaan lèekī m-ba ki dàkà-u, ní ki sòoǹ nì u. 7 Ama m-tɔntɔnliu Mooyiisi úǹ cee kaa sá míǹ. Úǹ kpèé m-nibul mmɔntiim ní ki bí deedee^b. 8 M yú u-nimbiin ní ki sòoǹ nì u, ní ki cántí-u tikɔkɔ ní u wāĺ man ni-Dindaan naŋku. Ba pu ní naa fāŋkì m-tɔntɔnliu Mooyiisi ní ki kpákáǹ-u míǹ?» 9 Ní ti-Dindaan fōō bi-pu diŋuul, ní ki fātìi nín jɔ́ḿ. 10 Ditagbandee tin lì yii dì yíkí tanti puee, Miiriyam wunti pu dinyaŋgbampindi píń ki pīiǹ kii ntaayimee. Aarɔn fātìi kpēēyee dinyaŋgbandi píń Miiriyam pu. 11 Ní Aarɔn bí Mooyiisi yii: «M-kpiliu, m gbàam̄-si, taa pà-ti ti-kpitii in ti-gbaandi yāntì ti ŋá-see paati. 12 Taa yàntī Miiriyam ń kpántí kii kibiki kin kpíì ki-na poon ki-wunti dijandi sūū ki wāatì bi nín màl̄-kèe.»

13 Niinee Mooyiisi mēē ti-Dindaan nì dinimbinaamandi yii: «Unimbɔti, m gbàam̄-si, cáaǹ Miiriyam!» 14 Ní ti-Dindaan kíí-u yii: «U-baa di yaa bàà tíil̀ ki làb̄ u-nimbiin nee, icoo kaa bàà cútí-u áli iwiin ilulaaa? Míǹ puee an sá ní nyāntí-u dinaapaalin ú nīn bí ŋkpaanceeti áli iwiin iluli, ní boonee ú fàtīí gítiń samaa kansikin.» 15 Niinee bi nyántì Miiriyam dinaapaal poon iwiin iluli. Samaa kaa nìn yíkì dinaapaal pu, see u nín dāa fātìi gítìńee. 16 Míǹ boonee ní samaa yíkì Aseerooti ní ki cūtìi ŋātì dinaapaal Paaran teekun ki kāl̀.