Dikàandi Gbɔŋku 11

Ti-Dindaan ŋmiŋu bɔti

1 Dalbee ní Isirayeel yab tí bíi tíminsí ki sūǹ ki kɔ́kɔĺ ti-Dindaan. Ti-Dindaan gbìl̄ee ní ki fōō diŋuul, ní ki yāntì u-ŋmiŋu dɔ́miń ki wùn̄ bi-naapaal kpaanceetii. 2 Ní samaa kɔkɔ gbáń ibiil ki yíiń Mooyiisi ní Mooyiisi gbāam̀ ti-Dindaan ní ŋŋmee kpíì. 3 Bi nìn pú niin diyindi yii Tabeera, taapu di sá yii <ŋŋmi wùn̄>, di sá yii niin ní ti-Dindaan nìn wùn̄ bi-naapaal kpaanceetii.

Isirayeel yab bíi bàlifī tinan pu

4 Nneel nìn cúú biniyaŋyambi bin nìn ŋmālim̀ Isirayeel yab kansikinee, ní Isirayeel yab bi-ba mun nìn kíĺ ki bíi sūǹ ki lì yii: «La ní ti làá nín ká tinan kí ŋmɔ́ dee? 5 Áà! Ti yaa téetì ti nín nìn bí Eejipiti ki ŋmóò ijɔm faalaa pu nì aputaajul nì akambil nì gaabub nì ayoob puee! 6 Doo nee tiba nì tiba kpá, ní ti bí ki dúntí, kun puee taa ti pée kāntí tiba kí jī ki kútì maana pu.» 7 Maana nìn bí mbilimu mbilimu, ki pīiǹ fàaa ní ki dàfì^a. 8 Isirayeel yab nìn yìiǹ ní ki tòó-u. Bi nìn nà-u kunaau pu, àá ki sáǹ-u kukuntuun. Bi nìn tɔ̄kɔntí-u ní kí dūú ŋá kalaa. Maana nìn mɔ̄ kii kalaa tɔ̄kaayee ní^b. 9 Kunyeeu ŋyunti ŋun dimalindi nìn tòó dinaapaal puee ní maana mun nìn nyēeń yilpu ki lítí.

10 Dalbee ní Mooyiisi gbìl̄ Isirayeel yab bíi sūǹ. Bi nìn kpáfì adican adican ki yú bi-tantib nyɔkɔpu. Ti-Dindaan nìn fōō bi-pu diŋuul ŋkpitim pu, ní an kaa mɔ́ɔkiǹ Mooyiisi. 11 Niinee ní Mooyiisi bí ti-Dindaan yii: «Ba pu ní a yòontí m-pɔbil míǹ? Ba pu ní a yíì kaa súń m-saai? Ba pu ní a dū samaa nee gìńdi ki nyīkiǹ m-pu yii ḿ kpòotī-bi ní? 12 Man di kaa cáá dinibul nee pool ki màl̄-bi, nì míǹ kɔkɔee, a bí yii ḿ fōō-bi kí ŋmàb̄ kii ubilool nín ŋmàb̀ kibipɔŋ puee, kí cáá-bi kí cùnnì kitiŋ kin poon a nìn pūtì ki pōoǹ yii a làá tīī bi-naanjabee. 13 La ní m làá ká tinan kí tīī samaa nee kɔkɔ? Di sá bi yú ki kɔ́ĺ-mi ki sūǹ ki bàlifī yii ḿ tīī-bi tinan. 14 Maa ŋūǹ kí túń samaa nee kɔkɔ gìńdi m-baba, dì nyìm̀ ki jítiǹ-mi. 15 A yaa là kí dàkā-mi yii a ŋá-mi tiŋanee, á kpɔ̀-mi sɔ́ǹ min ní a bíi ŋáań-mi nee. M yaa kpíìyee, maa làá ti ká m-falaau nee.»

16 Ní ti-Dindaan bí Mooyiisi yii: «Á kpāfì Isirayeel yab kpilib imuŋku ita nì saalaa, bin a nyí yii bi sá samaa yidambee, kí cáań-bi m-cee, sii nì bi ń dāá yūĺ circir kɔŋkooŋŋu nyɔkɔpu. 17 Man làá kpákatiń mpaan gbanti pu kí sòoǹ nì si, ní kí lēē a-pu ŋfam min m tīī-see fiii kí dūú ŋá bi-pu, án nín làá ŋá pu bí ŋmā kí tūtuǹ-si á túń dinibul nee gìŋ́ŋi án taa nín̄ gíti sá sii baba tundee. 18 Á tùkù dinibul nee yii: <Ŋámaan ni-ba circir kí cīití fool. Ni làá fu ŋmɔ́ tinan kun puee ti-Dindaan gbìl̄ ni-siim. Di sá u nyí nneel nín cúú-ni áli ni tin lī yii ni nín nìn bí Eejipiti tiŋkinee, an nìn ŋān̄ nì nee. An puee u làá fu tīī-ni tinan fool. 19 An kaa sá ŋwiin ŋubɔ ní u làá tīī-ni tinan, kaa tí sá iwiin ili àá iŋmoo àá saalaa àá iwiin mmuŋku. 20 Ama ni làá ŋmɔ́ tinan áli uŋmamɔn. Ni làá ŋmɔ́ míǹ an núutí-ni áli kí dāá nyānní ni-maŋfaliŋin. Kun puee ni kpēē ki sīŋkiǹ ti-Dindaan un bí ni-kansikinee, ki súń u-nimbiin ki bí yii ba pu ní bi nyántìń-ni Eejipiti tiŋkin.>»

21 Ní Mooyiisi bí yii: «Dinibul din māntìi tú-mi nee sá bininjab kutukub alaataa aluu ní, ní sii bí yii a làá tīī-bi tinan bí ŋmɔ́ áli uŋmal ubɔɔ! 22 Báà ti yaa kūū ti-piii nì ti-ŋoobui nì ti-naai kɔkɔ, an kaa làá bà-bi. Báà tí cùú kà dimɔɔlin jɔmii kɔkɔ, an kaa làá bà-bi!» 23 Ní ti-Dindaan kíí-u yii: «A nyí yii man ni-Dindaan ŋal kaa fɔ̀kɔ̀ níii? Án kaa làá yúntí, a làá ká nì a-nimbiliŋ yii tibɔti tin m lī nee làá ŋá míǹ kí tīī-saaa, an kaa làá ŋá?»

Unimbɔti dū u-Fam ki ŋá bikpilib imuŋku ita nì saalaa pu

24 Ti-Dindaan sòon̄ nì Mooyiisi míǹ ki dóòyee, ní u nín gítí samaa cee ki bàn̄ ki dū tin ti-Dindaan sòon̄ nì uee ki máafì-bi, ní ki kpáfì Isirayeel yab kpilib imuŋku ita nì saalaa, ní ki dū-bi ki yóoǹ ki māntìi tú tanti. 25 Ní ti-Dindaan kpákatìń ki kā ditagbandi poon ki bíi sòoǹ nì Mooyiisi, ní ki lēē u-Fam min u tīī Mooyiisee pu fiii ki dūu ŋá bikpilib imuŋku ita nì saalaayee pu. Ŋfamee nín kɔ́ bi-nee ní bi kíĺ ki bíi sòoǹ kii Unimbɔti bɔnaatiliibee. Ama baa nìkī ditundi gbanti ki cūtì ndan^c.

26 Binib bin bi nìn lēēyee kansikin bili, Eeldaadi nì Meedaadi nìn gbíntì dinaapaal pu kaa cūtì tanti cee. Ní Ŋfam dɔ́miń ki kɔ́ bi-ni ní bi kíĺ ki bíi sòoǹ kii Unimbɔti bɔnaatiliibee dinaapaal pu niin. 27 Ní unaacimpɔɔn ubɔ sáǹ ki cūtìi tùkū Mooyiisi yii: «Eeldaadi nì Meedaadi bí dinaapaal pu ki nàatī Unimbɔti bɔti!» 28 Ní Nuuni jipɔɔn Joosuwa un nìn pée bí ki tútúǹ Mooyiisi doooo u-biyatinee téeń yii: «M-kpiliu Mooyiisi, pìin̄-bi nsanaa!» 29 Ní Mooyiisi bí-u yii: «A bíi ŋáań m-pu ipoompoon níii? Ti-Dindaan yaa bàà kíikí kí dū u-Fam kí ŋá Isirayeel yab kɔkɔ pu, bi-kɔkɔ ń bàà kpántí u-bɔnaatiliibi, an bàà ŋān̄!» 30 Niinee ní Mooyiisi nì Isirayeel yab kpilibee fātìi nín gítí dinaapaal pu.

Inoon in bí kii njikpacimamuee bɔti

31 Míǹ boonee ní ti-Dindaan yāntì kubuŋu kubɔ nyánní tiŋku watil pú ki kpáaǹní inoon iba, i bí kii njikpacimamuee ki cáań ki bīiǹ dinaapaal pu bɔ̀mmm. Inoonee nín nìn dɔ̄ ki māntìi tú dinaapaal pu ki tin gbēeǹ laakiŋyee nìn sá ŋwiin ŋubɔ saŋkindi ní. Ní mu nín nìn kpúkú kitiŋ puee sá meeta ubɔ nyɔkɔm. 32 Bi nìn fāā inoonee yaadal wiiŋŋu nì kunyeeu áli kutaa dūu wúntì. Un kaa nìn fāā tikpilee di sá un nìn ká kiiloobi kutukub bili nì dijandee. Ní bi ŋáŋkì ki díntì ki māntìi tú dinaapaal. 33 Tinan nìn dáá kā bi-nyɔmmun baa láá ŋmɔ́ ki náĺ ní ti-Dindaan ŋuul yíkì bi-pu ní u dáaĺ bi-tafal ŋkpitim pu. 34 Bi nìn pú niin diyindi yii Kiibirooti-Taafa, an taapu di sá yii: <Nneel kaakuliŋ>, di sá niin ní bi nìn síb́ binib bin nìn gbí nneel tikpilee.

35 Isirayeel yab nìn yíkì Kiibirooti-Taafayee ní ki nín cá Aseerooti tiŋkin. Niin ní bi nìn ŋātì dinaapaal ki kāl̀.