Dikàandi Gbɔŋku 10

Animbil kúti kantáŋŋi ali bɔti

1 Ti-Dindaan tùkū Mooyiisi yii: 2 «Á dū animbil kúti kí mɔ́ɔ́ akantán ali kí nīn cáa búǹ ki yíì Isirayeel samaau ki kpáfí. An yaa tí ŋmāntì bí yīkì dinaapaal puee, á búń bí yīkì. 3 Bi yaa búń akantán liitil dicilpuee, an sá Isirayeel yab kɔkɔ ní ń kpāfì a-cee circir kɔŋkooŋŋu nyɔkɔpu. 4 Dikantámbaantiil ní bi yaa búńee, mimmee an sá Isirayeel yab naakɔti kpilib ŋmaniŋma di làá kpāfì a-cee. 5 Bi yaa búń dikantándi ikuŋkuunti ŋmàl̄ee, bin bí dinaapaal ŋwìiń nyalaŋki púee ń yīkì. 6 Bi yaa búń nliliitiim nì ikuŋkuuntee, bin bí dinaapaal ŋgiil púee ń yīkì. 7 Ama bi yaa làá búń dikpafil kantándee, ikuŋkuunti ń taa nín̄ bí.

8 «Aarɔn naantiibi bisaraaŋaliibi baba di cáá nsan kí búń dikantándi. Án nīn sá mara un ní ni nì ni-naantiibi làá nīn ŋúb́ kí nīn cá jaanjaanee.

9 «Ni yaa làá yīkì ni-tiŋkin kí cùú jáǹ ni-nannanliibi bin táká-nee, ní búń akantán nì ijanjakuŋkuunti. An di làá yàntī ḿ téetí ni-pu, ní man ni-Dindaan ni-Nimbɔtiu ń dāá fīī-ni ni-nannanliibi gbanti ŋaan. 10 Ni-jiŋaalib wiiŋyi nì uŋmal kamaa wimpeepeekaaŋu nì jiŋaalib bin kíǹeeyee, ní nīn búǹ dikantándi ŋyunti ŋun ni bíi ŋáań saraawɔkaa nì mpèé saraau ki tìì-mee. Míǹ di làá yàntī ní m téetí ni-pu. Man di sá ni-Dindaan ni-Nimbɔtiu.»

ISIRAYEEL YAB YÍKÌ SIINAAYI KI BÚNTÌ MOOWAAB

10–21

Isirayeel yab yíkì Siinaayi teekun

11 Isirayeel yab nín nìn nyáń Eejipiti tiŋkin, dibinliliitiil ŋmaliliitiu poon, iwiin mmuŋku dalee ní ditagbandi din nìn dàn̄ tanti un poon Dipoondi dakaau bée yíkì. 12 Isirayeel yab nìn yíkì Siinaayi teekun ki nìkī bi-saŋkindi. Ní ditagbandee cūtìi yúl̀ Paaran teekun. 13 Mpeepeekaam dee Isirayeel yab ń nìn yīkì dinaapaal pu ki nóó nì ti-Dindaan marau un Mooyiisi nìn dūu tīī-bee^a.

14 Juuda naakooku janjakitil nì bi-falaŋkau di nìn péé ki yíkì ki līntì nsan. Bi-janjakpiliu di nìn sá Amiinadaab jipɔɔn Naakɔn. 15 Suwaar jipɔɔn Neetaneeyeel di nìn sá Isakaar naakookun yab janjakpiliu. 16 Eelɔn jipɔɔn Eeliyaab di nìn sá Sabulɔn naakookun yab janjakpiliu.

17 Bi nìn cúú circir kɔŋkooŋŋu ki cóotì ní Geersɔn nì Meerarii naantiibi yab yōoǹ ki túǹ.

18 Rubeen naakookun yab janjakitil nì bi-falaŋkau di nìn páaǹ bi-boon. Bíǹ janjakpiliu di nìn sá Seedeeyuur jipɔɔn Eelsuur 19 Suriisadaayi jipɔɔn Seelumiyeel di nìn sá Simeeyɔn naakookun yab janjakpiliu. 20 Deewuyeel jipɔɔn Eeliyasaafi di nìn sá Gaadi naakookun yab janjakpiliu.

21 Keeyaati naakookun yab Leefii yab bin tūntí circir wantee di nìn páaǹ bíǹ boon. Leefii yab bin kíǹee nìn līntì ki cūtìi bíi cōontí circir kɔŋkooŋŋu bi-yab ń nín bàń.

22 Míǹ boonee, Eefiraayiim naakookun yab janjakitil nì bi-falaŋkau di nìn páaǹ. Bi-janjakpiliu di nìn sá Amiiyuudi jipɔɔn Eeliisama. 23 Peedasuur jipɔɔn Gamaliyeel di nìn sá Manasee naakookun yab janjakpiliu. 24 Giideewoonii jipɔɔn Abidan di nìn sá Beenjameen naakookun yab janjakpiliu.

25 Daani naakookun yab janjakitil nì bi-falaŋkau di nìn lúŋkì. Bíǹ di nìn sá bin pá akiti kɔkɔ boon ki cí-bee. Bi-janjakpiliu di nìn sá Amiisadaayi jipɔɔn Ayeeseer. 26 Ookiran jipɔɔn Pagiyeel di nìn sá Aseer naakookun yab janjakpiliu. 27 Eeyinan jipɔɔn Ayiira di nìn sá Neefitalii naakookun yab janjakpiliu. 28 Isirayeel yab nì bi-janjakitiŋi nín nìn máaǹ kí dī tɔb pu kí yīkèe, míǹ ní bi nìn dī ki yíkì.

Mooyiisi bíi nyàab̀ un làá dàkà-bi nsanee

29 Mooyiisi bí u-coo Reewuyeel un sá Madiyan yab tiŋkinee jipɔɔn Oobaab yii: «Ti làá yīkì kí nīn cá kitiŋ kin poon ti-Dindaan pōoǹ yii u làá tīī-tee dee. Dāan̄ ti nì si ń cù, sii mun ń dāá ká tiŋan tin ti-Dindaan làá ŋá-tee poon tiba^b.» 30 Ní Oobaab kíí-u yii: «Aayee, maa làá cù. M làá gítí m-tiŋkin, m-dicaŋku poon.» 31 Ní Mooyiisi bí-u yii: «M gbāam̀-si, taa dū-ti kí fá. Di sá yii sii nyí kuteeun jaaŋŋi ki ŋūǹ kí dàkà-ti laakin ti máaǹ kí nīn kàal̀ee. Nín̄ bí ti-cee ki dàkà-ti nsan. 32 A yaa céeǹ-tee, ti-Dindaan yaa làá tin ŋá-ti tiŋan tiŋyee, a mun dāa cáá tiba poon.»

33 Ní bi yíkì ti-Dindaan jool taapu ki cōom̀ iwiin ita. Iwiin ita gbantee, ti-Dindaan dakaau nìn līī bi-nyɔkɔpu ki nyàab̀ mpaan ŋun ŋān̄ee bí kàl̄^c. 34 Bi yaa yíkì dinaapaal pu ŋwiimpuee, ti-Dindaan tagbandi dàn̄ bi-pu ní bi còom̄. 35 Ŋyunti ŋun bi yaa làá yòon̄ ti-Dindaan dakaauee ní Mooyiisi ń téeń yii: «Ti-Dindaan, lìntī nyɔkɔpu a-pulincɔntiibi ń yàl̄, a-nannanliibi ń wāŋkì a-nimbiin^d!» 36 Ní bi yaa làá tí dū u-dakaauee kí yóońee, ní ú tí téeń yii: «Ti-Dindaan, fàtīí gítiń kí nīn kóò Isirayeel yab dicaŋŋi cutimaanyi kansikin!»