23
1 Balaam bí Balaaki yii: «Mā-mi laakin ti yú nee isaraafan iluli, kí cáań-mi doo inajaa iluli nì ipijaa iluli.» 2 Ní Balaaki ŋá min Balaam bālifì yii ú ŋée. Ní bi-liitil dū unaja ubɔ nì upìja ubɔ kí ŋá saraawɔkaa nsaraafan kamaa pu. 3 Ní Balaam bí Balaaki yii: «Nín̄ yú ki kɔ́ĺ a-saraabi bin a ŋée, man làá kàkatī ŋkpaanceeti. Án yaa yíì ti-Dindaan làá dāan̄ m-cee. Tin ní u yaa lēē ki dàkā-mee, m làá tùkù-si.» U lī mimmee ní ki nín jɔ́ḿ kigbantaŋ kiba pu. 4 Ní Unimbɔti dɔ́miń Balaam cee, ní Balaam bí-u yii: «M máń isaraafan iluli ki ŋá saraawɔkaa nsaraafan kamaa pu, unaja ubɔ nì upìja ubɔ.»5 Ní ti-Dindaan dū tibɔti tin u là Balaam ń sòoǹee ki ŋá u-nyɔkɔn, ní ki bí-u yii: «Nín̄ gítí, a yaa bàn̄ Balaaki ceeyee á sòoǹ míǹ.»
6 Ní Balaam nín gítí Balaaki cee. U bàn̄ee Balaaki yú ki kɔ́ĺ saraa un u ŋée, u nì Moowaab kpilib. 7 Ní Balaam bíi gà-u alaŋkpaŋkpaka yii:
«Balaaki yāntì m nyánní Aram tiŋkin ki dɔ́miń.
Moowaab bɔtiu yāntì m nyánní
ŋwìiń nyalaŋki pú jooŋŋin ki dɔ́miń.
Dāan̄ kí tɔ̄ Isirayeel yab,
Jaakɔb naantiibi mbusu!
8 Mana ní man ŋūǹ kí tɔ̄
un ní Unimbɔti kaa tɔ́ mbusuee mbusu?
Unimbɔti yaa kaa fōō binib nee pu diŋuul,
mana ní man ŋūǹ kí fōō bi-pu diŋuul?
9 M tɔ́kɔ́ ataŋkpee pu ní ki wāĺ-bi,
m tɔ́kɔ́ agbantan yilpu ní ki kpèé-bi.
Bi sá dinibul din kɔŋkooŋŋu bí ŋu-bee ní,
baa ŋmàl̄ atimbun kansikin.
10 Ŋma di ŋūǹ kí kàaǹ Jaakɔb nib?
Ŋma di ŋūǹ kí lì Isirayeel yab wíiŋŋu nyɔkɔm?
M là kí kpú deedeedambi kúm ní,
m-kúntitam ń nīn náań nì bi-kúntitam.»
11 Niinee Balaaki bí Balaam yii: «A ŋá-mi ba dee? Man yíiń-si yii á dāan̄ kí tɔ̄ m-nannanliibi mbusu ní sii dɔ́miń ki yú ki mèé ki bìintí bi-puɔɔ!» 12 Ní Balaam kíí-u yii: «M ŋūǹ kí sòoǹ tiba án yaa kaa sá tibɔti tin ní ti-Dindaan yaa dūu ŋá m-nyɔkɔn ḿ sòoǹeeee?»
Balaam mēē ki bīiǹ Isirayeel yab pu nliliitiim
13 Ní Balaaki bí Balaam yii: «Dāan̄ tí gíti cùú yūĺ mpaan ŋubɔ mun pu, niinee a làá ká Isirayeel yab kɔkɔ. Laakin ti yú nee, aa ŋūǹ kí wāl̀ bi-kɔkɔ. Ti yaa kpántì mpaanee, a làá wāl̀ bi-kɔkɔ ní kí tɔ̄-bi mbusu.» 14 Ní u yōoǹ Balaam ki cáa cūnnì doooo laakin bi sīlifí sintilee, Piisga jool caŋin. Niinee ní u tí máń isaraafan iluli, ki dū unaja ubɔ nì upìja ubɔ ki ŋá saraawɔkaa nsaraafan kamaa pu. 15 Ní Balaam bí Balaaki yii: «Nín̄ yú ki kɔ́ĺ a-saraabi bin a ŋée, man làá cù nyɔkɔpu doo kí cīití ti-Dindaan.»
16 Ti-Dindaan dɔ́miń Balaam cee, ní ki tīī-u tibɔti tin u làá sòoǹee, ní ki bí yii: «Nín̄ gíti Balaaki cee kí sòoǹ míǹ.» 17 Ní Balaam fātìi nín gítí Balaaki cee. U nìn yú ki kɔ́ĺ u-saraawɔkaabi u nì Moowaab kpilib. Ní Balaaki bālifì Balaam yii: «Ti-Dindaan lī yii ba?» 18 Ní Balaam gāā-u alaŋkpaŋkpaka nee yii:
«Yīkì kí pīlifì Balaaki!
Kpòon̄ a-tafal kí pīlifì, Siipɔɔr jipɔɔn!
19 Unimbɔti kaa sá unil ki mɔ́ntí,
waa sá nisaal ki kpántí ilandɔkɔ.
Waa lì tiba fám kaa ŋá míǹ.
U yaa pōoǹ puee, see ú ŋá míǹ.
20 U bí yii m bìin̄ bi-pu ní,
úǹ di bīiǹ ní ki bí yii ḿ bìin̄,
maa ŋūǹ kí kpántí tiba.
21 Ti-Dindaan kaa ká ikpiti iba Jaakɔb nibul pu,
waa ká mɔnaafiki Isirayeel yab pu.
Úǹ ti-Dindaan di sá bi-Nimbɔtiu, ní ki bí bi-cee.
Bíǹ di kpáafí abɔtibaal ki tìì-u.
22 Unimbɔti di nyántìń-bi Eejipiti tiŋkin.
U-pɔŋŋu sá-bi kii upɔɔnaa pɔŋŋuee ní.
23 Tikpaŋkpantiil tuuŋŋi kaa ŋūǹ kí ŋá Jaakɔb tiba.
Bibɔɔbi tuuŋŋi kaa ŋūǹ kí ŋá Isirayeel tiba.
Ŋyunti ŋubɔ bí ki dòoń bi làá dāá tùkù Jaakɔb naantiibi,
an dàkà yii Isirayeel yab
atuun ŋin ní Unimbɔti túń ki tīī-bee.
24 Kpèè, dinibul nee yíkì ki náká kii gbikintee.
See ú cúú upeel un u làá ŋmɔ́ee
kí cátí kí nyɔ̀ u-fatikuu
kí wàatī ní kí nín dòon̄.»
25 Niinee ní Balaaki bí Balaam yii: «A yaa kaa làá tɔ̄-bi mbusuee, taa ti mèè kí bìin̄ bi-puɔɔ!» 26 Ní Balaam kíí-u yii: «M pée tùkū-si dooooyee ki yóoǹ yii: <Tibɔti tin ní m-Dindaan yaa dūu ŋá m-nyɔkɔnee, tíǹ ní m làá sòoǹ.>»
Balaam mēē ki bīiǹ Isirayeel yab pu ntataatiim
27 Ní Balaaki bí Balaam yii: «Dāan̄ tí gíti nìkī mpaan ŋubɔ pu. Án yaa yíì mpaan gbanti pu ní Unimbɔti làá kíí á tɔ̄ dinibul gbanti mbusu kí tīī-mi.» 28 Niinee Balaaki yōoǹ Balaam ki cáa jɔ́ntiǹ Peewɔɔr jool din yú ki túliń kuteeuee pu. 29 Ní Balaam tí bí Balaaki yii: «Mā-mi isaraafan iluli doo kí cáań-mi inajaa iluli nì ipijaa iluli.» 30 Balaaki ŋá min kɔkɔ Balaam bālifèe, ní ki dū unaja ubɔ nì upìja ubɔ ki ŋá saraawɔkaa nsaraafan kamaa pu.