Dikàandi Gbɔŋku 1

Dikàandi

gbɔŋku

ISIRAYEEL YAB BÍ SIINAAYI TEEKUN

Bi kàan̄ Isirayeel yab mpeepeekaam

1 Ti-Dindaan sòon̄ nì Mooyiisi circir kɔŋkooŋŋu poon Siinaayi teekun. An nìn sá Isirayeel yab nín nìn nyáń Eejipiti tiŋkinee binliliitiil uŋmaliliiti wimpeekaaŋu dal. Ti-Dindaan nìn bí Mooyiisi yii: 2 «Ní kàaǹ Isirayeel yab kɔkɔ kí nóó nì bi nín pēē pēē mmaal nì adican puee. Ní ŋmà uninja kamaa yindi 3 kí yòon̄ bininjab bin cáá abin mmuŋku kí nīn cáa cá, ki bàn̄ kí cù kujaau Isirayeel yab kansikinee. Sii nì Aarɔn, ní kàaǹ-bi kí nóó nì bi-janjakitiŋi nín bí pu a-ba a-bee. 4 Ní lēē kunaakoou kamaa poonee kudicaŋu kubɔ kpiliu kí ŋàl̄ ni-ba. 5 Bikpilib bin ni làá dūú ŋàl̄ ni-bee yiŋŋi sɔ̀.

Rubeen naakookunee, Seedeeyuur jipɔɔn Eelsuur.

6 Simeeyɔn naakookunee, Suriisadaayi jipɔɔn Seelumiyeel.

7 Juuda naakookunee, Amiinadaab jipɔɔn Naasɔn.

8 Isakaar naakookunee, Suwaar jipɔɔn Neetaneeyeel.

9 Sabulɔn naakookunee, Eelɔn jipɔɔn Eeliyaab.

10 Eefiraayiim, Jooseefi jipɔɔn naakookunee, Amiiyuudi jipɔɔn Eeliisama.

Manasee, Jooseefi jipɔɔn naakookunee, Peedasuur jipɔɔn Gamaliyeel.

11 Beenjameen naakookunee, Giideewoonii jipɔɔn Abidan.

12 Daani naakookunee, Amiisadaayi jipɔɔn Ayeeseer.

13 Aseer naakookunee, Ookiran jipɔɔn Pagiyeel.

14 Gaadi naakookunee, Eeliyasaafi jipɔɔn Deewuyeel.

15 Neefitalii naakookunee, Eenan jipɔɔn Akiira.»

16 Binib bin bi nìn lēē bí nīn sá samaa kpilibee dee. Bi nìn sá bi-naakɔtin bikpilib, ní ki nìn sá bin kpòotī bi-janjakitiŋee. 17 Ní Mooyiisi nì Aarɔn dū bininjab bin bi nìn lēē gbantee ki ŋàl̄ bi-ba. 18 Bi nìn yíiń samaa kɔkɔ ki kpáfì uŋmaliliiti wimpeekaaŋu dal, ní ki ŋmàn̄ Isirayeel yab bin kɔkɔ cáá abin mmuŋku kí nīn cáa cée yiŋŋi, ki nóó nì bi nín pēē pēē mmaal nì adican puee. 19 Mooyiisi nìn kàan̄ Isirayeel yab Siinaayi teekun kii ti-Dindaan nín nìn tīī-u mara puee.

20 Bi nìn kàan̄ Jaakɔb jipɔŋkpiliu Rubeen naakookun yab ki nóó nì bi nín pēē pēē mmaal nì adican puee. Bi nìn ŋmàn̄ bininjab bin kɔkɔ cáá abin mmuŋku kí nīn cáa cá, ki bàn̄ kí cù kujaauee yiŋŋi. 21 Bi nìn nyáń binib kutukub imuŋku ili nì biluu nì binib alaataa aŋmoo.

22 Bi nìn kàan̄ Simeeyɔn naakookun yab ki nóó nì bi nín pēē pēē mmaal nì adican puee. Bi nìn ŋmàn̄ bininjab bin kɔkɔ cáá abin mmuŋku kí nīn cáa cá, ki bàn̄ kí cù kujaauee yiŋŋi. 23 Bi nìn nyáń binib kutuku ubɔ kpá kutukub imuŋku ita nì binib alaataa ata.

24 Bi nìn kàan̄ Gaadi naakookun yab ki nóó nì bi nín pēē pēē mmaal nì adican puee. Bi nìn ŋmàn̄ bininjab bin kɔkɔ cáá abin mmuŋku kí nīn cáa cá, ki bàn̄ kí cù kujaauee yiŋŋi. 25 Bi nìn nyáń binib kutukub imuŋku ili nì biŋmoo nì alaataa aluu nì imuŋku ili nì binib saalaa.

26 Bi nìn kàan̄ Juuda naakookun yab ki nóó nì bi nín pēē pēē mmaal nì adican puee. Bi nìn ŋmàn̄ bininjab bin kɔkɔ cáá abin mmuŋku kí nīn cáa cá, ki bàn̄ kí cù kujaauee yiŋŋi. 27 Bi nìn nyáń binib kutukub biluu kpá kutukub imuŋku inaa nì binib alaataa aluu.

28 Bi nìn kàan̄ Isakaar naakookun yab ki nóó nì bi nín pēē pēē mmaal nì adican puee. Bi nìn ŋmàn̄ bininjab bin kɔkɔ cáá abin mmuŋku kí nīn cáa cá, ki bàn̄ kí cù kujaauee yiŋŋi. 29 Bi nìn nyáń binib kutukub biluu kpá kutukub imuŋku ita nì binib alaataa anaa.

30 Bi nìn kàan̄ Sabulɔn naakookun yab ki nóó nì bi nín pēē pēē mmaal nì adican puee. Bi nìn ŋmàn̄ bininjab bin kɔkɔ cáá abin mmuŋku kí nīn cáa cá, ki bàn̄ kí cù kujaauee yiŋŋi. 31 Bi nìn nyáń binib kutukub bita kpá kutukub imuŋku ita nì binib alaataa anaa.

32 Bi nìn kàan̄ Jooseefi jipɔɔn Eefiraayiim naakookun yab ki nóó nì bi nín pēē pēē mmaal nì adican puee. Bi nìn ŋmàn̄ bininjab bin kɔkɔ cáá abin mmuŋku kí nīn cáa cá, ki bàn̄ kí cù kujaauee yiŋŋi. 33 Bi nìn nyáń binib kutukub imuŋku ili nì alaataa aŋmoo.

34 Bi nìn kàan̄ Manasee naakookun yab ki nóó nì bi nín pēē pēē mmaal nì adican puee. Bi nìn ŋmàn̄ bininjab bin kɔkɔ cáá abin mmuŋku kí nīn cáa cá, ki bàn̄ kí cù kujaauee yiŋŋi. 35 Bi nìn nyáń binib kutukub mmuŋku nì saalaa nì bili nì binib alaataa ali.

36 Bi nìn kàan̄ Beenjameen naakookun yab ki nóó nì bi nín pēē pēē mmaal nì adican puee. Bi nìn ŋmàn̄ bininjab bin kɔkɔ cáá abin mmuŋku kí nīn cáa cá, ki bàn̄ kí cù kujaauee yiŋŋi. 37 Bi nìn nyáń binib kutukub biŋmoo kpá kutukub imuŋku ili nì binib alaataa anaa.

38 Bi nìn kàan̄ Daani naakookun yab ki nóó nì bi nín pēē pēē mmaal nì adican puee. Bi nìn ŋmàn̄ bininjab bin kɔkɔ cáá abin mmuŋku kí nīn cáa cá, ki bàn̄ kí cù kujaauee yiŋŋi. 39 Bi nìn nyáń binib kutukub imuŋku ita nì bili nì binib alaataa aluli.

40 Bi nìn kàan̄ Aseer naakookun yab ki nóó nì bi nín pēē pēē mmaal nì adican puee. Bi nìn ŋmàn̄ bininjab bin kɔkɔ cáá abin mmuŋku kí nīn cáa cá, ki bàn̄ kí cù kujaauee yiŋŋi. 41 Bi nìn nyáń binib kutukub imuŋku ili nì ubɔ nì binib alaataa aŋmoo.

42 Bi nìn kàan̄ Neefitalii naakookun yab ki nóó nì bi nín pēē pēē mmaal nì adican puee. Bi nìn ŋmàn̄ bininjab bin kɔkɔ cáá abin mmuŋku kí nīn cáa cá, ki bàn̄ kí cù kujaauee yiŋŋi. 43 Bi nìn nyáń binib kutukub imuŋku ili nì saalaa nì bita nì binib alaataa anaa.

44 Mooyiisi nì Aarɔn nì Isirayeel yab naakɔti kpilib saalaa nì bili bin bi nìn lēēyee nín nìn kàan̄ binib biŋyee nyɔkɔm dee. 45 Isirayeel yab bininjab bin bi nìn kàan̄ ki nóó nì bi-dicaŋŋi, ki cáá abin mmuŋku kí nīn cáa cá, ki bàn̄ kí cù kujaauee 46 nìn nyáń binib kutukub alaataa aluu nì bita nì alaataa aŋmoo nì imuŋku ili nì binib saalaa.

Bi gāntì Leefii naakookun yab ki tīī-bi ditundi

47 Baa nìn kàan̄ Leefii naakookun yab ki kútì Isirayeel naakɔti tin kíǹee yab pu.

48 Di sá yii ti-Dindaan nìn bí Mooyiisi yii: 49 «A yaa làá kàaǹ Isirayeel yabee, á yàntī Leefii naakookun yab kí taa kàaǹ-bi. 50 Á dū circir kɔŋkooŋŋu tundi nì ŋu-sambiliŋ nì tin kɔkɔ pée sá ŋu-wantee kí ŋúbíǹ-bi. Bíǹ di làá nīn tūntí circir kɔŋkooŋŋu nì ŋu-wanti kɔkɔ, ní kí nīn tūǹ ŋu-poon tuuŋŋi kɔkɔ. Bíǹ di làá gāā bi-tantib kí màntīí tū-ŋu. 51 Ni yaa làá yīkì dinaapaal din puee, bíǹ di làá cóotí circir kɔŋkooŋŋu. Ni yaa tí bàn̄ laakin ki làá kàl̄ee, bíǹ di làá dū circir kɔŋkooŋŋu kí cóoń. Unifantanti ubɔ di yaa sútìi pìl̄ circir kɔŋkooŋŋu gbantee, bí kpɔ̀ udaan. 52 Ni yaa bàn̄ laakin ki làá kàl̄ee, Isirayeel yab báà ŋma ń gāā u-tantiu u-janjakitil paaŋŋu pu, kí nīn kɔ́ĺ di-falaŋkau. 53 See Leefii naakookun yab baba di làá gāā bi-tantib kí kɔ́ĺ circir kɔŋkooŋŋu, ní kí nīn tūǹ bi-tundi nín sá puee. Mimmee maa làá dāá fōō Isirayeel yab pu diŋuul.» 54 Ti-Dindaan nín nìn tīī Mooyiisi mara Isirayeel yab ń ŋá puee, míǹ ní bi nìn ŋá deedee.