Dikàandi Gbɔŋku 2

Tinaakɔti paaŋyi dinaapaal pu

1 Ti-Dindaan bí Mooyiisi nì Aarɔn yii: 2 «Isirayeel yab báà ŋma máaǹ kí gāā u-tantiu kí kɔ́ĺ u-janjakitil falaŋkau nì u-dicaŋku falaŋkau. Bí gāā tantib kí màntīí tū circir kɔŋkooŋŋu kí nīn dátiǹ-ŋu fiii.

3 «Bin làá dāá gāā bi-tantib ŋwìiń nyalaŋki púee di sá dijanjakitil din bí Juuda falaŋkau taapuee. Juuda yab janjakpiliu di sá Amiinadaab jipɔɔn Naasɔn. 4 U-janjaliibi wíiŋŋu nyɔkɔm sá binib kutukub biluu kpá kutukub imuŋku inaa nì alaataa aluu. 5 Isakaar naakookun yab di làá nīn bí ki kɔ́ĺ-bi. Isakaar yab janjakpiliu di sá Suwaar jipɔɔn Neetaneeyeel. 6 U-janjaliibi wíiŋŋu nyɔkɔm sá binib kutukub biluu kpá imuŋku ita nì binib alaataa anaa. 7 Sabulɔn naakookun yab di làá nīn dī-bi. Sabulɔn yab janjakpiliu di sá Eelɔn jipɔɔn Eeliyaab. 8 U-janjaliibi wíiŋŋu nyɔkɔm sá binib kutukub bita kpá kutukub imuŋku ita nì binib alaataa anaa. 9 Juuda janjakitil kɔkɔ kpáfì binib kutukub dilaataal nì imuŋku inaa nì biluu nì binib alaataa anaa. Isirayeel yab yaa yíkèe, bíǹ di làá lìntī.

10 «Bin làá dāá gāā bi-tantib ŋgiil púee^a di sá dijanjakitil din bí Rubeen falaŋkau taapuee. Rubeen yab janjakpiliu di sá Seedeeyuur jipɔɔn Eelsuur. 11 U-janjaliibi wíiŋŋu nyɔkɔm sá binib kutukub imuŋku ili nì biluu nì binib alaataa aŋmoo. 12 Simeeyɔn naakookun yab di làá nīn bí ki kɔ́ĺ-bi. Simeeyɔn yab janjakpiliu di sá Suriisadaayi jipɔɔn Seelumiyeel. 13 U-janjaliibi wíiŋŋu nyɔkɔm sá binib kutukub ubɔ kpá kutukub imuŋku ita nì binib alaataa ata. 14 Gaadi naakookun yab di làá nīn dī-bi. Gaadi yab janjakpiliu di sá Duweel jipɔɔn Eelsafi. 15 U-janjaliibi wíiŋŋu nyɔkɔm sá binib kutukub imuŋku ili nì biŋmoo nì alaataa aluu nì imuŋku ili nì binib saalaa. 16 Rubeen janjakitil kɔkɔ kpáfì binib kutukub dilaataal nì imuŋku ili nì saalaa nì ubɔ nì binib alaataa anaa nì imuŋku ili nì saalaa. Isirayeel yab yaa yíkèe, bíǹ di làá páań Juuda naakooku boon.

17 «Míǹ boonee Leefii naakookun yab ń yòon̄ dikpafindi tantiu ki páań bi-boon, kí nīn bí akiti ali ŋin līntèe nì akiti ali ŋin làá páanní boonee kansikin. Bi nín pée dɔ̄ akiti akiti dinaapaal pu puee, bi yaa yíkèe bí nīn nóó tɔb akiti akiti míǹ, unil kamaa ń nīn nóó u-kitil falaŋkau.

18 «Bin làá dāá gāā bi-tantib ŋwìiń jeetilaŋki púee di sá dijanjakitil din bí Eefiraayiim falaŋkau taapuee. Eefiraayiim yab janjakpiliu di sá Amiiyuudi jipɔɔn Eeliisama. 19 U-janjaliibi wíiŋŋu nyɔkɔm sá binib kutukub imuŋku ili nì binib alaataa aŋmoo. 20 Bin làá dāá gāā bi-tantib kí kɔ́ĺ-bee di sá Manasee naakookun yab. Manasee naakookun yab janjakpiliu di sá Peedasuur jipɔɔn Gamaliyeel. 21 U-janjaliibi wíiŋŋu nyɔkɔm sá binib kutukub mmuŋku nì saalaa nì bili nì binib alaataa ali. 22 Beenjameen naakookun yab di làá nīn dī-bi. Beenjameen naakookun yab janjakpiliu di sá Giideewoonii jipɔɔn Abidan. 23 U-janjaliibi wíiŋŋu nyɔkɔm sá binib kutukub biŋmoo kpá kutukub imuŋku ili nì binib alaataa anaa. 24 Eefiraayiim janjakitil kɔkɔ kpáfì binib kutukub dilaataal nì binii nì binib dilaataal. Bíǹ janjakitil di làá nīn sá ditataatiil kí yīkì.

25 «Bin làá dāá gāā bi-tantib ŋgan púee di sá dijanjakitil din bí Daani falaŋkau taapuee. Daani yab janjakpiliu di sá Amiisadaayi jipɔɔn Ayeeseer. 26 U-janjaliibi wíiŋŋu nyɔkɔm sá binib kutukub imuŋku ita nì bili nì binib alaataa aluli. 27 Bin làá dāá gāā bi-tantib kí kɔ́ĺ-bee di sá Aseer naakookun yab. Aseer naakookun yab janjakpiliu di sá Ookiran jipɔɔn Pagiyeel. 28 U-janjaliibi wíiŋŋu nyɔkɔm sá binib kutukub imuŋku ili nì ubɔ nì binib alaataa aŋmoo. 29 Neefitalii naakookun yab di làá nīn dī-bi. Bi-janjakpiliu di sá Eenan jipɔɔn Ayiira. 30 U-janjaliibi wíiŋŋu nyɔkɔm sá binib kutukub biluli kpá kutukub imuŋku ita nì alaataa anaa. 31 Daani janjakitil kɔkɔ kpáfì binib kutukub dilaataal nì bita kpá imuŋku ita nì binib alaataa aluu.

«Bíǹ di làá lūŋkì boon nì bi-falaŋkau.»

32 Isirayeel yab bin bi nìn kàan̄ ki nóó nì bi-dicaŋŋee dee. Bin kɔkɔ bi nìn kàan̄ ki dū-bi ki kpáfì ajanjakitee nìn nyáń binib kutukub alaataa aluu nì kutukub bita nì alaataa aŋmoo nì imuŋku ili nì binib saalaa. 33 Baa nìn kàan̄ Leefii naakookun yab ki kútì Isirayeel naakɔti tin kíǹee yab pu, kii ti-Dindaan nín nìn tīī Mooyiisi mara puee.

34 Ti-Dindaan nín nìn tīī Mooyiisi mara puee, míǹ ní Isirayeel yab nìn ŋá deedee. Bi-kɔkɔ nìn gà bi-tantib ki kɔ́l̀ bi-falaŋkab, ní ki nìn yíkí ki nóó nì bi nín pēē pēē mmaal nì adican puee.