Dikàandi Gbɔŋku 3

Leefii naakookun yab tuuŋŋi

1 Ŋyunti ŋun ti-Dindaan nìn sòon̄ nì Mooyiisi Siinaayi jool puee, Aarɔn nì Mooyiisi maaliŋun yab nyɔkɔm nín nìn sá puee sɔ̀.

2 Aarɔn jipɔmbi yiŋŋi sɔ̀. U-jipɔŋkpiliu di sá Nadaab, ní Abiyuu pá, ní Eeleeyasaar pá, ní Itamaar jóol̀^a. 3 Aarɔn jipɔmbi bin pu bi nìn sītì ŋkpam ki dū-bi ki sú disaraaŋal tundi bi kíĺ ki bíi tūǹee yiŋŋi dee. 4 Nadaab nì Abiyuu nìn kpíì Siinaayi teekun, ti-Dindaan nimbiin, di sá bi nìn mɔ́fìń ŋŋmi laaba^b ki kɔ́ǹ circir kɔŋkooŋŋun. Nadaab nì Abiyuu kaa nìn màl̄ mbiyaamu. Eeleeyasaar nì Itamaar di nìn kíǹ ki bí bi-baa Aarɔn nimbiin ki tútúǹ-u disaraaŋal tundi.

5 Ti-Dindaan bí Mooyiisi yii: 6 «Yíiń Leefii naakookun yab kí dū-bi kí ŋàl̄ Aarɔn bí nīn bí u-cee ki tūǹ disaraaŋal tundi. 7 Bí nīn bí u-taapu ki tūǹ Isirayeel yab kɔkɔ yil pu tundi circir kɔŋkooŋŋu nyɔkɔpu, nì atuun ŋin kɔkɔ pée sá circir kɔŋkooŋŋu poon tuuŋŋee. 8 Bíǹ di làá nīn kpèé tin kɔkɔ bi cáa ŋáań saraabi tuuŋŋi an yú circir kɔŋkooŋŋu poonee, ní kí nīn tūǹ Isirayeel yab yil pu tuuŋŋi circir kɔŋkooŋŋun. 9 Á dū Leefii yab kí tīī Aarɔn nì u-jipɔmbi bí dū bi-ba kɔkɔ kí sú Isirayeel yab kɔkɔ yil pu. 10 Aarɔn nì u-jipɔmbi baba ní á kàan̄ bí nīn tūǹ disaraaŋal tundi. Un kaa sá usaraaŋalee yaa sútìi pìl̄ ki túń ditundi gbantee, bí kpɔ̀-u.»

11 Ti-Dindaan bí Mooyiisi yii: 12 «Á nīn nyí yii man m-ba di lēē Leefii yab Isirayeel yab kansikin bí fōō Isirayeel yab biseebiyaamu nninjabiyaamu yil. Man di yì Leefii yab. 13 Kibiseebiki kininjabiki kamaayee, man di yì, di sá daliŋkin m nìn kūū Eejipiti tiŋkin biseebiyaamu nninjabiyaamu kɔkɔee, m nìn dū Isirayeel biseebiyaamu nninjabiyaamu nì bi-waŋkuti biseemal njamu kɔkɔ ki sú m-ba^c. Man di sá ni-Dindaan.»

Bi kàan̄ Leefii naakookun yab mpeekaam

14 Ti-Dindaan sòon̄ nì Mooyiisi Siinaayi teekun ki bí-u yii: 15 «Á kàaǹ Leefii naakookun yab kí nóó nì bi-dicaŋŋi nì bi nín pēē pēē mmaal puee. Á kàaǹ kí yòon̄ mbininjabiyaamu mun cáá uŋmal ubɔ kí nīn cée.» 16 Ní Mooyiisi kàan̄-bi kii ti-Dindaan nín nìn tīī-u mara ú ŋá puee.

17 Leefii jipɔmbi di sá Geersɔn nì Keeyaati nì Meerarii. 18 Geersɔn jipɔmbi ki nóó nì bi-dicaŋŋi yiŋŋi di sá Liibinii nì Simeeyii. 19 Keeyaati jipɔmbi ki nóó nì bi-dicaŋŋi yiŋŋi di sá Amiiraam nì Yiisaar nì Eebrɔn nì Usiyeel. 20 Meerarii jipɔmbi ki nóó nì bi-dicaŋŋi yiŋŋi di sá Maalii nì Musii. Leefii naakookun yab dicaŋŋi nín nìn sá puee dee.

21 Geersɔn yab dicaŋŋi yākatì mili pu, Liibinii yab nì Simeeyii yab. 22 Bininjab bin bi kàan̄ kí yòon̄ bin cáá uŋmal ubɔ kí nīn cáa cée nyáń binib kutukub biluli nì binib alaataa aŋmoo. 23 Geersɔn dicaŋŋi yab nìn gà bi-tantib circir kɔŋkooŋŋu boon ŋwìiń jeetilaŋki pú ní. 24 Geersɔn dicaŋŋi kpiliu di sá Layeel jipɔɔn Eeliyasaafi. 25 Circir kɔŋkooŋŋu poonee, ditundi din Geersɔn yab nìn tūǹee di sá bi nìn kpèé tanti poon nì boon nì tibiiŋkaal nì ŋŋaabu ŋun sàkā circir kɔŋkooŋŋu punyɔkɔpuee, 26 nì tanti satau nì dicindi punyɔkɔki ŋaasakaŋkaaŋu ŋun māntìi tú ŋkɔŋkoon nì nsaraafanee nì tanti ŋmiii. Bíǹ di nìn kpèé tiwan gbanti kɔkɔ.

27 Keeyaati yab dicaŋŋi yākatì minaa pu ní, Amiiraam yab nì Yiisaar yab nì Usiyeel yab nì Eebrɔn yab. Keeyaati maaliŋu nín sá puee dee. 28 Bi nín nìn kàan̄ Keeyaati yab bininjab kɔkɔ kí yòon̄ bin cáá uŋmal ubɔ kí nīn cáa cée, bi nìn nyáń bininjab kutukub binii nì binib alaataa aluu ní. Bíǹ di nìn kpèé circir laŋki. 29 Keeyaati dicaŋŋi yab nìn gà bi-tantib circir kɔŋkooŋŋu ŋgiil pú ní. 30 Keeyaati dicaŋŋi kpiliu di nìn sá Usiyeel jipɔɔn Eeliisafan. 31 Keeyaati yab tundi din bi nìn tīī-bee di nìn sá bí nīn kpèé Dipoondi dakaau nì teebil nì fitilab tɔ́kɔŋkaati nì isaraafan nì tin kɔkɔ bi cáa ŋáań saraabi tuuŋŋee nì poon ŋaasakaŋkaaŋu. Bíǹ di nìn kpèé tiwan gbanti kɔkɔ. 32 Leefii yab kpikpaaŋwu di nìn sá Aarɔn usaraaŋakpil jipɔɔn Eeleeyasaar. Úǹ di nìn kpèé bin tūǹ ditundi circir laŋkee.

33 Meerarii yab dicaŋŋi nìn yākatì mili pu ní, Maalii yab nì Musii yab. Meerarii maaliŋu nín nìn sá puee dee. 34 Bininjab bin bi nìn kàan̄ kí yòon̄ bin cáá uŋmal ubɔ kí nīn cáa cée nìn sá binib kutukub biluu nì binib alaataa ali ní. 35 Meerarii yab kpiliu di nìn sá Abiyayiil jipɔɔn Tuuriyeel. Bi nìn gà bi-tantib circir kɔŋkooŋŋu ŋgan pú ní. 36 Ditundi din bi nìn tīī Meerarii yabee di nìn sá bí nīn kpèé tanti dɔi nì tikúti nì idɔjaati nì i-taapu tílkaati nì tin kɔkɔ bi pée cáa tūǹ an tuuŋŋee. Bíǹ di nìn kpèé tiwan gbanti kɔkɔ. 37 Bíǹ di nìn gíti kpèé idɔjaati in bi cōontí kí màntīí tū dicindee, nì i-taapu tílkaati nì akpakpaa nì iŋmii. 38 Mooyiisi nì Aarɔn nì u-jipɔmbi di nìn gà bi-tantib dikpafindi tantiu nyɔkɔpu ŋwìiń nyalaŋki pú. Bíǹ di nìn tūǹ circir laŋki poon tuuŋŋi Isirayeel yab kɔkɔ yil pu. Ubɔ fám yaa nìn sútìi pìl̄-bi ní kaa sá usaraaŋalee, bi nìn kù-u ní.

39 Ti-Dindaan nín nìn yāntì Mooyiisi nì Aarɔn kàan̄ Leefii yab naakookun bininjab kí yòon̄ bin cáá uŋmal ubɔ kí nīn cáa cée, bininjab kɔkɔ wíiŋŋu nìn nyáń kutukub mmuŋku nì bili ní.

Leefii yab fōō mbiseebiyaamu yil

40 Ti-Dindaan bí Mooyiisi yii: «Á kàaǹ Isirayeel yab biseebiyaamu nninjabiyaamu kí kíĺ mun cáá uŋmal ubɔ kí nīn pée cáa cée, kí ŋmà mu-yiŋŋi. 41 Boonee á gàntī Leefii yab bí fōō Isirayeel yab bin kíǹee biseebiyaamu nninjabiyaamu yil kí nīn kíǹ kí sá man yab. Míǹ mbaantiim á tí gàntī Leefii yab waŋkuti tí kpántí man yati Isirayeel yab waŋkuti biseebiyaamu njamu yil pu. Man di sá ni-Dindaan.» 42 Mooyiisi kàan̄ Isirayeel yab biseebiyaamu nninjabiyaamu kii ti-Dindaan nín nìn tīī-u mara yii ú ŋá puee. 43 Mbiseebiyaamu nninjabiyaamu mun kɔkɔ bi nìn kàan̄ kí yòon̄ uŋmal ubɔ kí nīn cáa cée nyáń binib kutukub mmuŋku nì bili nì alaataa ali nì binib biluli kpá imuŋku inaa.

44 Ní ti-Dindaan bí Mooyiisi yii: 45 «Á dū Leefii yab kí kpántí Isirayeel yab biseebiyaamu nninjabiyaamu paaŋŋu, bíǹ ń kpántí man yab. Á tí dū Leefii yab waŋkuti kí kpántí Isirayeel yab waŋkuti biseebiyaamu njamu yil pu. Man di sá ni-Dindaan. 46 Isirayeel yab biseebiyaamu nninjabiyaamu alaataa ali nì imuŋku ita nì saalaa nì binib bita bin páaǹ Leefii yab biseebiyaamu wíiŋŋu puee^d, á yàntī bí pà bi-yil pu. 47 Á yàntī bí pà unil kamaa yil puee, jitɔmbi biŋmoo kí nóó nì circir kɔŋkooŋŋu nimbiliŋ ŋmàntitam. 48 Ní á dū an nimbiliŋee kí tīī Aarɔn nì u-jipɔmbi án nīn sá yii Isirayeel yab pàn̄ binib bin páaǹ Leefii yab biseebiyaamu puee yil pu.» 49 Ní Mooyiisi fōō Isirayeel yab cee bi-biseebiyaamu mun páaǹ Leefii yab puee nimbiliŋ. 50 Animbil ŋin u nìn fōō Isirayeel biseebiyaamu nninjabiyaamu mun páaǹee puee nìn kpáfì jitɔmbi kutuku nì alaataa ata nì imuŋku ita nì jitɔmbi biŋmoo ki nóó nì circir kɔŋkooŋŋu nimbiliŋ ŋmàntitam. 51 Ní u dū animbilee ki tīī Aarɔn nì u-jipɔmbi, kii ti-Dindaan nín tīī-u mara ú ŋá puee.