Dikàandi Gbɔŋku 4

Leefii yab nín pēē pēē mmaal puee tuuŋŋi a. Keeyaati yab tundi

1 Ti-Dindaan bí Mooyiisi nì Aarɔn yii: 2 «Leefii yab kansikinee, ní kàaǹ Keeyaati yab kí nóó nì bi-dicaŋŋi nì bi nín pēē pēē mmaal puee. 3 Ní kíĺ bin cáá abin mmuŋku nì saalaa kí cáá sāā imuŋku ili nì saalaayee, an dàkà yii bin ŋūǹ kí tɔ̄ ditundi circir kɔŋkooŋŋunee. 4 Atuun ŋin Keeyaati jipɔmbi làá nīn tūǹ circir kɔŋkooŋŋunee di sá bí nīn kpèé tin kɔkɔ pée sá circir páaayee. 5 Ni yaa làá yīkì ni-naapaal puee, Aarɔn nì u-jipɔmbi ń sàkatī ŋŋaabu ŋun pītì poon diiŋŋee kí gíiǹ-ŋu kí bìin̄ dipoondi taŋkpapilinti dakaau pu. 6 Bí dū ŋgban ŋun dàfèe kí bìin̄, ní kí dū sata un máǹ gàaayee kí páań an pu. Míǹ boonee ní bí dū tikúti kpandɔi kí bɔ̄ Dipoondi dakaau kpiŋŋi bɔmbiliŋ poon. 7 Bí dū ŋŋaaman gùuu kí bìin̄ teebil un pu bi cāabìń kpɔnɔb ki pāantí Unimbɔti nimbiinee, kí dū palantab nì bikɔŋkɔnnyɔkaabi nì asambil nì bikɔŋkɔŋkpaambi bin bi cáa féeń Unimbɔti ndaamee kí páań, ní kí dū kpɔnɔb bin bi pāantí ŋwiin kamaa ti-Dindaan nimbiinee kí páań^a. 8 Boonee ní bí dū ŋŋaaman cínciŋ kí bìin̄ tíǹ kɔkɔ pu ní kí fàtīí dū ŋgban ŋun dàfèe kí páań an pu, ní kí dū tikúti kpandɔi kí bɔ̄ teebil kpiŋŋin. 9 Bí dū ŋŋaaman gàaa kí bìin̄ fitilab tɔ́kɔŋkaati^b nì ti-fitilab nì ti-babikaati nì nsambiyaamu mun poon ŋfantam kàal̀ee nì kpalbab bin poon ŋkpam kàal̀ee pu. 10 Bí dū an wantee kɔkɔ kí bóob́ kí tàkan̄ ŋgban ŋun dàfèe poon ní kí dūú páań nlún pu. 11 Bí dū ŋŋaaman gùuu kí bìin̄ sindaariya saraafaŋŋu pu, ní kí dū ŋgban ŋun dàfèe kí páań an pu, ní kí dū tikúti kpandɔi kí bɔ̄ ŋu-kpìmbiliŋin. 12 Bí dū tin kɔkɔ bi cáa tūǹ saraabi tuuŋŋi circir kɔŋkooŋŋunee kí póob́ ŋŋaaman ŋun máǹ gùuuyee poon, ní kí dū ŋgban ŋun dàfèe kí bìin̄, ní kí dūú páań nlún pu. 13 Bí fāā ŋfantam min bí nsaraafan puee ní kí dū ŋŋaaman kí bìin̄ ŋu-pu. 14 Bí dū tin kɔkɔ bi cáa tūǹ nsaraafan pu tundee kí páań an pu, an dàkà yii kisambiki kin poon ŋkpam min bi wùn̄ee fantam kàal̀ee, nì kijiii kin cáá anyinee, nì kun bi cáa mɔ́fí ŋŋmee, nì disambil din poon bi ŋáań fatiku ki yàantée. Bí dū ŋgban ŋun dàfèe kí páań an pu, ní ki dū tikúti kpandɔi kí bɔ̄ nsaraafan kpìmbiliŋin. 15 Aarɔn nì u-jipɔmbi yaa bɔ́ntì tin kɔkɔ sá circiree, ki bīiǹ ti-pu ki dóò bi làá yīkì dinaapaal puee, ní Keeyaati jipɔmbi ń dāá nín yòon̄-tì. Bí taa pée gbēē circir wanti gbanti. Bi yaa gbēē-tì bi làá kpú. Keeyaati jipɔmbi tundi di sá bí nīn tūntí circir wanti tin kɔkɔ bí dikpafindi tantiunee. 16 Aarɔn jipɔɔn Eeleeyasaar tundi di sá ú nīn kpèé ŋkpam min bi cáa ŋáań fitilabinee, nì talaalub bin bi tùutēe, nì tijimpin saraabi bin bi ŋáań kutaa kamaayee, nì ŋkpam min bi sìtī unil yil pu kí dū-u ki sú Unimbɔtee. Úǹ di làá nīn kpèé circir kɔŋkooŋŋu nì tin kɔkɔ bí ŋu-poonee, an dàkà yii circir laŋki nì tin bi cáa tūǹ u-poon ditundee.»

17 Ti-Dindaan sòon̄ nì Mooyiisi nì Aarɔn yii: 18 «Ní kpèè tiŋan Keeyaati naakookun yab ń nīn bí kí taa kpú kí kúntí Leefii yab kansikin. 19 Ni nín làá ŋá pu ní bi yaa sútìi pìl̄ circir wanti bí taa kpúee sèé. Sii Aarɔn nì a-jipɔmbi, ní cáá báà ŋma kí dàkà u-tundi din sá ú nīn tūǹee nì tiwan tin sá ú túńee. 20 Mimmee baa dāa gbōontí kí kpèè circir wanti, báà fiii gba. An yaa sá fám, see bí kpú.»

b. Geersɔn yab tundi

21 Ti-Dindaan bí Mooyiisi yii: 22 «Á kàaǹ Geersɔn yab kí nóó nì bi-dicaŋŋi nì bi nín pēē pēē mmaal puee. 23 Á kíĺ bin cáá abin mmuŋku nì saalaa kí cáá sāā imuŋku ili nì saalaayee, an dàkà yii bin ŋūǹ kí tɔ̄ ditundi circir kɔŋkooŋŋunee. 24 Atuun ŋin Geersɔn jipɔmbi làá nīn tūǹ circir kɔŋkooŋŋunee di sá 25 bí nīn tūntí circir kɔŋkooŋŋu ŋaabui nì ŋu-poon diiku ŋaabui nì igban in dàfì bi cáa bìintí an puee nì ŋŋaabu ŋun lìkī circir kɔŋkooŋŋu punyɔkɔkee, 26 nì dicindi punyɔkɔki ŋaabui nì a yaa làá kɔ́ dicindi ŋŋaabu ŋun sàkā kipunyɔkɔ kí màntīí tū tanti nì nsaraafanee, nì circir kɔŋkooŋŋu ŋmiii, nì tin kɔkɔ bi cáa tūǹ niin ditundee. Bíǹ di yì an tuuŋŋi kɔkɔ kí nīn tūǹ^c. 27 Geersɔn yab làá nīn bí Aarɔn nì u-jipɔmbi taapu ní. Aarɔn nì u-jipɔmbi di làá nīn dàkà-bi atuun ŋin sá bí nīn tūǹee nì tiwan tin sá bí nīn tūntée. 28 Atuun ŋin bi dūu ŋúbiǹ Geersɔn jipɔmbi bí nīn tūǹ dikpafindi tantiu poonee dee. Usaraaŋakpil Aarɔn jipɔɔn Itamaar di làá nīn kpèé-bi ní bi tūǹ atuun gbanti.

c. Meerarii yab tundi

29 «Á kàaǹ Meerarii yab kí nóó nì bi-dicaŋŋi nì bi nín pēē pēē mmaal puee. 30 Á kíĺ bin cáá abin mmuŋku nì saalaa kí cáá sāā imuŋku ili nì saalaayee, an dàkà yii bin ŋūǹ kí tɔ̄ ditundi circir kɔŋkooŋŋunee. 31 Atuun ŋin Meerarii jipɔmbi làá nīn tūǹ circir kɔŋkooŋŋunee di sá bí nīn tūntí tanti punyɔmmu dɔi nì ikalim nì idɔjaati nì i-taapu tílkaati, 32 nì idɔjaati in bi cōontí kí màntīí tū dicindee nì i-taapu tílkaati nì akpakpaa nì iŋmii nì tin kɔkɔ pée sá ditundi gbanti wantee. Ní dāá ŋmà báà ŋma nín máaǹ kí túń kuwaŋu kuŋyee kí tīī-u. 33 Atuun ŋin bi dūu ŋúbiǹ Meerarii jipɔmbi bí nīn tūǹ dikpafindi tantiu poonee dee. Usaraaŋakpil Aarɔn jipɔɔn Itamaar di làá nīn kpèé-bi ní bi tūǹ atuun gbanti.»

Bi kàan̄ Leefii yab bin bíi tūǹ atuunee

34 Mooyiisi nì Aarɔn nì samaa kpilib kàan̄ Keeyaati yab ki nóó nì bi-dicaŋŋi nì bi nín pēē pēē mmaal puee. 35 Bi nìn kàan̄ bin cáá abin mmuŋku nì saalaa kí cáá sāā imuŋku ili nì saalaayee, an dàkà yii bin ŋūǹ kí tɔ̄ ditundi circir kɔŋkooŋŋunee. 36 Bi nìn nyáń binib kutukub bili nì alaataa aluli nì imuŋku ili nì saalaa. 37 Binib bin nyɔkɔm bi nìn kàan̄ Keeyaati dicaŋŋin bi bí ki tūǹ ditundi circir kɔŋkooŋŋunee dee. Mooyiisi nì Aarɔn nìn kàan̄-bi kii ti-Dindaan nín nìn sòon̄ nì Mooyiisi puee.

38 Bi nìn kàan̄ Geersɔn yab ki nóó nì bi-dicaŋŋi nì bi nín pēē pēē mmaal puee. 39 Bi nìn kàan̄ bin cáá abin mmuŋku nì saalaa kí cáá sāā abin imuŋku ili nì saalaayee, an dàkà yii bin ŋūǹ kí tɔ̄ ditundi circir kɔŋkooŋŋunee. 40 Bi nìn nyáń binib kutukub bili nì alaataa aluu nì binib mmuŋku nì saalaa. 41 Binib bin nyɔkɔm bi nìn kàan̄ Geersɔn dicaŋŋin bi bí ki tūǹ ditundi circir kɔŋkooŋŋunee dee. Mooyiisi nì Aarɔn nìn kàan̄-bi kii ti-Dindaan nín nìn sòon̄ nì Mooyiisi puee.

42 Bi nìn kàan̄ Meerarii yab ki nóó nì bi-dicaŋŋi nì bi nín pēē pēē mmaal puee. 43 Bi nìn kàan̄ bin cáá abin mmuŋku nì saalaa kí cáá sāā abin imuŋku ili nì saalaayee, an dàkà yii bin ŋūǹ kí tɔ̄ ditundi circir kɔŋkooŋŋunee. 44 Bi nìn nyáń binib kutukub bita nì binib alaataa ali. 45 Binib bin nyɔkɔm bi nìn kàan̄ Meerarii dicaŋŋin bi bí ki tūǹ ditundi circir kɔŋkooŋŋunee dee. Mooyiisi nì Aarɔn nìn kàan̄-bi kii ti-Dindaan nín nìn sòon̄ nì Mooyiisi puee.

46 Leefii yab bin kɔkɔ Mooyiisi nì Aarɔn nì Isirayeel kpilib nìn kàan̄ 47 kí yòon̄ bin cáá abin mmuŋku nì saalaa kí cáá sāā abin imuŋku ili nì saalaa, an dàkà yii bin ŋūǹ kí tɔ̄ ditundi circir kɔŋkooŋŋunee 48 nìn nyáń binib kutukub binii nì alaataa aŋmoo nì binib imuŋku inaa ní. 49 Kii ti-Dindaan nín nìn bí Mooyiisi ń ŋá puee, u nìn tīī báà ŋma tundi din sá ú tɔ̄ee, ní ki nìn dàkā biwantunliibi tin sá bí túńee. Bi nìn kàan̄-bi kii ti-Dindaan nín nìn tīī Mooyiisi mara puee.