Ipoon pɔndi paati
«Ubɔ yaa pōoǹ kí dū unil kí ŋá saraa kí tīī ti-Dindaanee, udaan ŋūǹ kí dū animbil kí téeǹ unilee yil pu. 3 Kunimbiŋmiiu kun bi síiǹee sɔ̀.
«An yaa sá uninja un cáá abin mmuŋku kí cáá sāā imuŋku itee, án nīn sá jitɔmbi imuŋku ili nì saalaa, kí nóó nì circir kɔŋkooŋŋu nimbiliŋ ŋmàntitam.
4 «An yaa sá unimpuee, án nīn sá jitɔmbi mmuŋku nì saalaa.
5 «An yaa sá kibiki kin cáá abin aŋmoo kí cáá sāā abin mmuŋkuee, kibininjabiki yil pu sá jitɔmbi mmuŋku, ní kibinimpubiki yil pu sá jitɔmbi saalaa.
6 «An yaa sá kibiki kin cáá uŋmal kí cáá sāā abin aŋmooyee, kibininjabiki yil pu sá jitɔmbi biŋmoo, ní kibinimpubiki yil pu sá jitɔmbi bita.
7 «An yaa sá unil un cáá abin imuŋku ita nì ipaayee, uninja yil pu sá jitɔmbi saalku, ní unimpu yil pu sá jitɔmbi saalaa.
8 «Ama un pōoǹ ipoonee yaa kaa cáá ŋŋmam kí pà kunimbiŋmiiu kun bi síiǹee, bí cáań-u usaraaŋal cee ní úǹ ń kpèè ŋŋmam min u cááyee ní kí nóó míǹ kí gíí-u kunimbiŋmiiu.
9 «An yaa sá kuwaŋkuluu kun ŋān̄ bí dūú ŋá saraa kí tīī ti-Dindaanee ní udaan yaa pōoǹee, kúǹ kpántì ti-Dindaan wanti dee. 10 Nsan kpá bí kpántí-ku. Bí taa dū kun ŋān̄ee kí kpántí kun kaa ŋān̄ee, àá kun kaa ŋān̄ee kí kpántí kun ŋān̄ee. Ubɔ yaa dū kuwaŋkuluu kubɔ ki kpántì kun u dūu pōoǹee, ti-liitil kpántì ti-Dindaan wanti dee.
11 «An yaa sá kuwaŋkuluu kun kaa ŋān̄ bí dūú ŋá saraa kí tīī ti-Dindaanee ní udaan yaa pōoǹee, ú cáań-kù kí tīī usaraaŋal. 12 Usaraaŋal ń kpèè kuwaŋkuluuee laakin ku ŋān̄ee nì laakin kuaa ŋān̄ee ní kí tīī ku-nyampooku. 13 Un cáań kuwaŋkuluuee yaa là kí fàtīí dā-kuee, ú pà kunimbiŋmiiu nín sá puee, ní kí kūtì bi yaa yākatì kunimbiŋmiiuee miŋmoo puee diba pu.
14 «Ubɔ yaa dū u-diiku ki sú ti-Dindaanee, usaraaŋal ń kpèè laakin ku ŋān̄ee nì laakin kuaa ŋān̄ee kí tīī-u kunyampoou. 15 Udaan yaa tí là kí fàtīí dā u-diikuee, ú pà kudiiyee nimbiŋmiiku nín sá puee, ní kí kūtì bi yaa yākatì kunimbiŋmiiuee miŋmoo puee diba pu.
16 «Ubɔ yaa lēē u-kpaatanti poon bukpaa bubɔ ki sú ti-Dindaanee, kunyampoou ń nīn nóó nì bukpaayee nín ŋūǹ kí lòoǹ puee. Bu yaa lòon̄ ɔɔji biliŋ kiiloobi alaataa atee, udaan ń pà jitɔmbi imuŋku ili nì saalaa. 17 An yaa sá dibatɔl bindi poon ní u dū u-kpaabu gbanti ki súee, an nimbiŋmiiku ní bi làá nīn ŋúb́. 18 Ama dibatɔl bindi boon ní udaan yaa dū u-kpaabuee ki súee, usaraaŋal ń cɔ́tí kí kpèè abin ŋin kíǹ dibatɔl bindi dipɔndi ń bàńee, ní kí bàtī ku-nyampooku pu kí nóó nì abin gbanti.
19 «Ama un dū u-kpaabu ki súee yaa là kí fàtīí dā-buee, ú pà bukpaayee nimbiŋmiiku nín sá puee, ní kí kūtì bi yaa yākatì kunimbiŋmiiuee miŋmoo puee diba pu, ní kí nín fàtīí fōō u-kpaabu.
20 «Ama u yaa kaa fātìi dá bukpaayee ní ki dū-bu ki nyáfiǹ ubɔee, waa ti cáá nsan kí fàtīí dā-bu. 21 Dibatɔl bindi yaa bāańee, bukpaayee kpántì ti-Dindaan wanti dee, kii bi nín yaa dū bukpaa ki sú ti-Dindaan puee. Bisaraaŋaliibi di kíǹ ki yì-bu.
22 «Ubɔ yaa dū bukpaa bun u dá ubɔ cee ní an kaa sá úǹ u-ba baabi kpaatanti poon kpaabuee ki sú ti-Dindaanee, 23 usaraaŋal ń gíí kunimbiŋmiiu kí nóó nì abin ŋin kíǹ dibatɔl bindi ń bàńee, udaan ń pà ŋwiin gbanti. An nimbiliŋee, bí dūú sú ti-Dindaan. 24 Ama dibatɔl bindi yaa bāańee, un cee ní u nìn dá bukpaayee ń fàtīí fōō-bu, an dàkà yii un baabi kpaatanti poon ní bukpaayee dɔ̄ee.
25 «Ni yaa làá gíí kunimbiŋmiiu kun kamaayee, kú nóó nì bi nín ŋmàntī animbil circir kɔŋkooŋŋu poon puee, an dàkà yii graambi saalaaa.»
Saraabi bin kíǹee bɔti
26 «Ubɔ kaa cáá nsan kí dū u-waŋkuluku biseemal kí sú ti-Dindaan, kun puee ti-Dindaan di yì unaa àá uŋoobu àá upii biseemal. 27 An yaa sá kuwaŋkuluu kun kaa ŋān̄ bí dūú ŋá saraa kí tīī ti-Dindaanee, ku-dindaan ŋūǹ kí fàtīí dā-ku kí nóó nì kunimbiŋmiiu kun usaraaŋal yóoǹee, ní kí kūtì bi yaa yākatì kunimbiŋmiiuee miŋmoo puee diba pu. Kuwaŋkuluuee dindaan yaa kaa fātìi dá-kuee, usaraaŋal ń dū-ku kí nyāfiǹ ubɔ kí nóó nì ku-nyampooku.
28 «Tin kamaa ní bi dūu sú ti-Dindaanee, baa ti ŋūǹ kí nyāfì-tì, àá kí fàtīí dā-tì. An yaa sá unileeee, kuwaŋkuluueeee, tikpaataneeee, tin kamaa ní bi pée dūu sú ti-Dindaanee kpántì u-wanti deeb. 29 Báà an yaa sá unil gba, baa ŋūǹ kí fàtīí dā-u kí líí, see bí kpɔ̀-u.
30 «Ti-Dindaan di yì tisaalaatiil tin bi lēē kitiŋ nín lòon̄ tikpaajin tiŋyee nì isufi nín lòon̄ asubil ŋiŋyee poon, an sá úǹ ti-Dindaan wanti ní. 31 Ubɔ yaa tí là kí dā u-saalaatiiti jandi dibaaa, ú pà kunimbiŋmiiu kun usaraaŋal gííyee kí kūtì bi yaa yākatì kunimbiŋmiiuee miŋmoo puee diba pu. 32 An yaa sá inaa àá ipii àá iŋoobuee, bí dáań tiwaŋkuti saalaa kamaa poonee kubɔ kí dūú sú ti-Dindaanc. 33 Baa máaǹ kí kpèè yii kuwaŋkuluuee ŋān̄aaa, kuaa ŋān̄, kaa tí máaǹ kí nyàab̀ kubɔ kí kpántí-ku. Ubɔ yaa nyàab̄ kuwaŋkuluu kubɔ ki kpántì kun an sāāyee, ti-liitil kpántì ti-Dindaan wanti dee, baa ti ŋūǹ kí fàtīí dā ti-liitilee kansikin báà kubɔd.»
34 Marab bin ti-Dindaan nìn tīī Mooyiisi, Siinaayi jool pu ú dūú nàatī Isirayeel yabee dee.