Akoobil 18

Uninja nì unimpu kpāfitam min kòóyee

1 Ti-Dindaan bí Mooyiisi yii: 2 «Tùkù Isirayeel yab yii man di sá ni-Dindaan, ni-Nimbɔtiu. 3 Naa máaǹ kí nīn ŋáań kii Eejipiti tiŋki kin poon ni nìn kóòyee yab nín nìn ŋáań puee, kaa tí máaǹ kí nīn ŋáań kii Kanaan tiŋki kin poon m cáǹ-ni nee yab nín ŋáań puee. Naa máaǹ kí fōō bi-bimbim. 4 Nín̄ tɔ́maan m-koobiliŋ kí nīn ŋúb́ m-bɔkpaaŋi. Man di sá ni-Dindaan, ni-Nimbɔtiu.

5 «Nín̄ ŋúb́maan m-bɔkpaaŋi nì m-koobiliŋ. Un yaa ŋáań min marab gbanti lēe di ŋmátí^a. Man di sá ni-Dindaan.

6 «Ni-kansikin ubɔ ń taa dòon̄ nì unimpu u nì un pēē mmaalee. Man di sá ni-Dindaan.

7 «Aa máaǹ kí dòon̄ nì a-na kí kɔ́ǹ a-baa icoo. Di sá yii a-na dee ní aa máaǹ kí kɔ́ǹ u mun icoo.

8 «Aa máaǹ kí dòon̄ nì a-baa nimpoobi kansikin báà ubɔ^b. A yaa ŋá mimmee a kɔ́ǹ a-baa icoo dee.

9 «Aa máaǹ kí dòon̄ nì a-niisal, pēē na nì baa, àá pēē na kaa pēē baa, àá pēē baa kaa pēē na, báà bi yaa màl̄-u kudicaŋun àá laaba ní bi màlīń-u^c.

10 «Aa máaǹ kí dòon̄ nì a-naantiiu, an dàkà yii a-jipɔɔn bisal àá a-bisal bisal. A yaa ŋá mimmee, a kɔ́ǹ a-ba icoo dee.

11 «Aa máaǹ kí dòon̄ nì a-na yɔnti bisal un a-baa màl̄ee. A-baa nín màl̄-uee puee, a-niisal dee.

12 «Aa máaǹ kí dòon̄ nì a-pool, kun puee u nì a-baa pēē ní.

13 «Aa máaǹ kí dòon̄ nì a-na naal àá u-maan, kun puee u nì a-na pēē ní.

14 «Aa máaǹ kí kɔ́ǹ a-baa naal àá u-maan icoo kí dòon̄ nì u-nimpuu, kun puee a-na dee.

15 «Aa máaǹ kí dòon̄ nì a-coopu, a-jipɔɔn nimpuu, kun puee a-jipɔɔn nimpuu dee ní aa máaǹ kí kɔ́ǹ-u icoo^d.

16 «Aa máaǹ kí kɔ́ǹ a-maan àá a-naal icoo kí dòon̄ nì u-nimpuu^e.

17 «Aa máaǹ kí dòon̄ nì unimpu nì u-bisal àá u-jipɔɔn bisal àá u-bisal bisal, kun puee an sá u-maaliŋu poon biyaamu ní ki sá ajɔkɔntuun^f.

18 «Aa máaǹ kí cáá a-nimpuu maan àá u-naal kí kūtì u-pu ŋyunti ŋun ní u dáá bí dimaŋfalinee. A yaa ŋá mimmee, a náań ipoompoon ki bíl̀ bi-kansikin dee.

19 «Aa máaǹ kí dòon̄ nì unimpu ŋyunti ŋun ní u ká u-ba ki bí tijɔkɔndinee^g.

20 «Aa máaǹ kí dòon̄ nì a-juti nimpuu, di sá yii án làá kɔ́ǹ-si tijɔkɔndi^h.

21 «Aa máaǹ kí dū a-biyaamu kansikin kiba kí wà ŋŋmi kí ŋá saraa kí tīī diwaal Mooleekiⁱ kí kpèè man ni-Nimbɔtiu yindi fám. Man di sá ni-Dindaan.

22 «Aa máaǹ kí dòon̄ nì a-ninjajuti kii bi nín dɔ̀ nì unimpu puee. An sá ntimbiil ní^j.

23 «Aa máaǹ kí kɔ́ǹ a-ba tijɔkɔndi kí dòon̄ nì kuwaŋkuluu. Unimpu mun kaa máaǹ kí yàntī kuwaŋkuluu ń jɔ̄m̀-u. An sá ditiŋwiil ní^k.

24 «Ní taa yàntī atuŋkpiti nee kansikin báà diba ń kɔ́ǹ-ni tijɔkɔndi. Di sá yii atuŋkpiti gbanti di kɔ́ǹ atimbun ŋin nib m làá jà ni-nyɔkɔpu kí fōō bi-timmu kí tīī-ni nee tijɔkɔndi. 25 Kitiŋ kɔkɔ kɔ́ tijɔkɔndi ní m làá dáaĺ ki-tafal binib bin kóò ki-puee kpitii pu, ní kitiŋee ń wùliŋkì ki-nib kí fá.

26 «Ama nimbi Isirayeel yab àá binicambi bin kóò ni-kansikinee máaǹ kí nīn ŋúb́ m-bɔkpaaŋi nì m-koobiliŋ, kí yíí kí taa ŋá ntimbiil tuuŋŋi gbanti. 27 Di sá yii ntimbiil tuuŋŋi gbanti ní binib bin péé péé ki kāl̀ kitiŋ gbantin ní nimbi dāa nín bāańee ŋá ní ki yāntì kì kɔ́ tijɔkɔndi. 28 Ní taa ti kɔ́ǹ-kì tijɔkɔndi, án nín làá ŋá pu kí taa wùliŋkì-ni kí fá kii kì nín nìn wūliŋkì bin līntiǹ-nee ki fá puee. 29 Ama un di yaa ŋá ntimbiil tuuŋŋi nee kansikin dibee, bí nyāntí-u Isirayeel nibul kansikin.

30 «Nín̄ ŋúb́maan tibɔti tin m kpáafì-ni nee kí taa ŋá ntimbiil tuuŋŋi ŋin bi nìn ŋáań ki wāatì ní nimbi nín bāańee, kí taa yàntī an tuuŋŋee ń kɔ́ǹ-ni tijɔkɔndi. Man di sá ni-Dindaan, ni-Nimbɔtiu.»