Akoobil 19

Unimbɔti nín là bí nóó-u puee

1 Ti-Dindaan bí Mooyiisi 2 ń tùkù Isirayeel yab kɔkɔ yii:

«Nín̄ bímaan circir, kun puee man, ni-Dindaan, ni-Nimbɔtiu bí circir ní^a!

3 «Báà ŋma ń nīn tɔ́ u-baa nì u-na, kí nīn tɔ́ ŋwiŋŋuŋfikaa^b dal. Man di sá ni-Dindaan, ni-Nimbɔtiu.

4 «Ní taa tòotī awaa, kí taa dū tikúti kí dùntī kí mɔ́ɔ́ awaa^c. Man di sá ni-Dindaan, ni-Nimbɔtiu.

5 «Ni yaa bíi ŋáań mpèé saraau kí tīī-mee, nóómaan mara nín sá puee ní ḿ fōō. 6 Ní ŋmɔ́ saraa gbanti nanti yaadal wiiŋŋu nì kutaa yaa wúntèe. Ama tinan gbanti yaa kíǹ winta dalee, bí cáá wà ŋŋmi. 7 Ubɔ yaa ŋmɔ́ saraa gbanti nanti winta dalee, an kɔ́ tijɔkɔndi. Maa làá fōō saraa gbanti. 8 Un di yaa ŋmɔ́ tinan gbanti winta dalee, udaan ŋá ikpiti ki fōō dibɔkpil, kun puee u kpēē kun bi dūu sú-mee fám. Bí nyāntí udaan Isirayeel nibul kansikin.

9 «Ni yaa láa bíi cēē ni-kpaajintee, ní taa láa cā kí tin bà ŋkpaabuku, kí taa fàtīí lūlifì ifin in pu ni súntèe. 10 Ní taa fàtīí gítí ni-boon kí kìtī fiinyi subiliŋ ŋin pu ni jítèe, kí taa tòò ŋin gbátì ki dɔ̄ kitiŋee. Ní yàntī ŋíǹ bifalaadambi nì binicambi ń lūlifì. Man di sá ni-Dindaan ni-Nimbɔtiu^d.

11 «Ní taa yɔ̀, kí taa mɔ̄ntì, kí taa mùul̀ ni-juti. 12 Ní taa pùtī m-yindi kí bìin̄ ni-nyimɔŋyi pu^e. Ni yaa ŋá mimmee, ni kpēē man ni-Nimbɔtiu yindi fám dee. Man di sá ni-Dindaan.

13 «Ní taa mùul̀ ni-juti, kí taa yɔ̀-u. Ní taa yàntī upaadaan nimbiliŋ ń dòon̄ ni-cee kutaa ń wúntí naa pàn̄-u^f. 14 Ní taa sìì utafakpaafu, kí taa dū tiba kí làkan̄ ujɔfu saŋŋu pu^g, ama ní fàŋkì man ni-Nimbɔtiu. Man di sá ni-Dindaan.

15 «Ní taa mùul̀ ubɔ ibɔsoon poon. Ní taa kpɔ̀ usoodaan bɔti yii u nín sá usoodaanee pu, kí taa pɔ̀ unikpaan u-ŋmam pu, ama ní dū ibaamɔn kí sòoǹ ni-juti bɔti^h. 16 Ní taa cáá ni-nabiyaamu disambiil. Ní taa lēē nnyimɔn seerau ni-nabiki pu bí kpɔ̀-u. Man di sá ni-Dindaan.

17 «Ní taa nín̄ ná ni-nabiyaamu ni-pɔbilin. Ama ní sòoǹ ibaamɔn kí tùkù ni-nabiki kin yaa yīntiǹ-neeⁱ, án nín làá ŋá pu u-puee ní taa ŋá ikpitee. 18 Ní taa tɔ̀ ipɔntoon, kí taa dū ni-nabiyaamu kí ŋá ni-poon. Ní nīn néeḿmaan ni-jutiibi kii nimbi ni-bee^j. Man di sá ni-Dindaan.

19 «Nín̄ ŋúb́maan m-bɔkpaaŋi nee. Ní taa dū tiwaŋkuti tin buluku kaa pēēyee uja nì usal kí kpāfì tí jɔ̄m̀ tɔb, kí taa bɔ̄l̀ ni-kpaabun iwambool ili in kaa pēēyee, kí taa pèen̄ sata un bi dū gulfab bin bí bi-ba bi-ba ki lùn̄ee^k.

20 «Usapɔɔn yaa sá uyumbu ní ki cáá bɔɔn ní baa láá fātìi dá-u ki líì àá ki nyántì-u kuyuŋun ní uninja ubɔ dōoǹ nì uee, bí gíí udaan dipɔndi ú pà. Ama bí taa kpɔ̀-bi, di sá yii usapɔɔnee dáá gbíntìi sá uyumbu. 21 Uninjee ń cáań upìja circir kɔŋkooŋŋu punyɔkɔki nyɔkɔpu kí ŋá u-bɔkpil saraau m-nimbiin. 22 Usaraaŋal ń dū upìjee kí ŋá dikoobil nín bālifì puee dibɔkpil daan pu m-nimbiin, ikpiti in ní u ŋée pu ní ú ká u-kpitii pɔ̄tam.

23 «Ni yaa láa kɔ́ Kanaan tiŋkin ní ki yaa cóoǹ isufi in lòoǹ abil ŋin bi ŋmóòyee kɔkɔ nì i-bulukuee, asubil gbanti ń nīn sá ni-cee kii ŋin kɔ́ tijɔkɔndee abin ata, ní taa ŋmɔ́-ŋi. 24 Dibinnanaatiil poonee, ní dū isufee biliŋ kí sú man ni-Dindaan nì ifaal poon. 25 Dibiŋŋmooŋmootiil poonee, ni dāa ŋūǹ kí ŋmɔ́ isufee biliŋ. Ni yaa ŋá mimmee, ni-sufii gbanti làá dāá nīn lòoǹ ní ki kútí. Man di sá ni-Dindaan ni-Nimbɔtiu.

26 «Ní taa ŋmɔ́ kuwaŋkuluu kubɔ nanti laakin bi lāntì-kùee. Ní taa bàlifì dibalifil kí taa bɔ̄ tibɔɔl mun. 27 Ní taa kòol̀ kí cùkū ni-yil, kí taa kòol̀ ni-nyimpul kpaanceetiŋu ŋmaniŋma. 28 Ní taa cāfì ni-wunti kí dàkà yii ni ká dikpool^l, kí taa ŋmà tiba naŋku ni-wunti pu. Man di sá ni-Dindaan.

29 «Ní taa yàntī ni-bisalib ń kpántí iwaatooti laakpaamu kí fá bi-jilimau^m. An yaa ŋá mimmee, kitiŋ nee kɔkɔ nib làá dū bi-ba kí líí nì tilaakpaal ní tijɔkɔndi ń kɔ́-kì. 30 Ní nīn tɔ́ ŋwiŋŋuŋfikaa, kí nīn tɔ́ m-circir kɔŋkooŋŋu. Man di sá ni-Dindaan.

31 «Ní taa cù bibɔɔbi cee, kí taa cù bin sòoǹ nì bitaŋkpiibee ceeⁿ. Ní taa cù bi-cee, kun puee bi làá kɔ́ǹ-ni tijɔkɔndi. Man di sá ni-Dindaan ni-Nimbɔtiu.

32 «Yīkì kí tīī utikpil disíndi kí nīn tɔ́ un yikpiti pīiǹee. Ni yaa ŋá mimmee, ni lafun fàŋkí man ni-Nimbɔtiu dee. Man di sá ni-Dindaan.

33 «Unicaan yaa dɔ́miń ki kɔ́-nee, ní taa mùul̀-u. 34 Ní ŋúb́ unicaan un kɔ́-nee kii kitindambikee, kí nīn néeń-u kii nimbi ni-bee. Kun puee ni-mun kāl̀ kunicaŋu Eejipiti tiŋkin^o. Man di sá ni-Dindaan ni-Nimbɔtiu.

35 «Nín̄ bímaan deedee kí taa nín̄ mùul̄ ibɔsoon poon nì bi nín ŋmàntī tiwan fɔkɔŋŋu nì tiwan nyiŋfiŋu nì tiwan púuŋŋu puee poon. 36 Ni-saniyab nì ni-waŋŋmantikaati, an dàkà yii tiwan tin bi cáa ŋmàntī nnyiŋfee nì tin bi cáa ŋmàntī nnyimee nì ni-sambiŋmantikaaŋi kɔkɔ ń nīn sá deedee wanti^p. Man di sá ni-Dindaan, ni-Nimbɔtiu un di nyántìń-ni Eejipiti tiŋkinee.

37 «Nín̄ ŋúb́maan m-bɔkpaaŋi kɔkɔ nì m-koobiliŋ kɔkɔ kí ŋá ŋi nín lī puee. Man di sá ni-Dindaan.»