ISIRAYEEL YAB MÁAǸ KÍ NĪN BÍ CIRCIR
Fatiku pu marab
17
1 Ti-Dindaan bí Mooyiisi yii: 2 «Tùkù Aarɔn nì u-jipɔmbi nì Isirayeel yab kɔkɔ yii marab bin man ni-Dindaan yóoǹee sèé:3 «Isirayeel yab kansikin ubɔ yaa kūū unaa àá upii àá uŋoobu dinaapaal pu àá dinaapaal kpaanceetiŋu, 4 ní kaa cáań-u circir kɔŋkooŋŋu punyɔkɔki nyɔkɔpu kí ŋá saraa kí tīī u-Dindaanee, bi làá dāá bàlifì udaan fatiku gbanti pɔndi. Kii u nín kūū tiwan tin cáá kufoou ki nyántì fatiku ki fée puee, bí nyāntí-u Isirayeel nibul kansikin. 5 Mara nee taapu di sá yii Isirayeel yab ń taa ti làntì bi-waŋkuti laaba fám kí ŋá saraa, ama bí cáań tiwaŋkuti gbanti circir kɔŋkooŋŋu punyɔkɔki nyɔkɔpu ti-Dindaan nimbiin kí tīī usaraaŋal ní kí dūú ŋá mpèé saraau kí tīī ti-Dindaan. 6 Niinee ní usaraaŋal ń dū fatikuee kí yàaǹ nsaraafan ŋun bí circir kɔŋkooŋŋu nyɔkɔpuee pu, ní kí dū saraayee kpam kí wà ŋŋmi nsaraafanee pu, ní u-sɔnsɔfiŋu ń sɔ̀ŋkì ti-Dindaan pɔbil. 7 Mimmee Isirayeel yab kaa ti làá ŋá saraabi kí tīī awaa ŋin bi máń ki nántiǹ iŋɔjaayee. Bí taa nyā ti-Dindaan boon kí kɔ́ǹ bi-ba tijɔkɔndia. An sá dibɔkpaal din kaa kpántée ní ki tīī bi nì bi-biyaamu kí nīn pée cá jaanjaan.
8 «Á gíti tùkù-bi yii: Isirayeel yab ubɔ àá binicambi bin kóò bi-kansikinee ubɔ yaa là kí ŋá saraawɔkaa àá saraa un ní an yaa pée sée, 9 ní kaa cáań dikpafindi tantiu punyɔkɔki nyɔkɔpu kí ŋá saraa kí tīī ti-Dindaanee, bí nyāntí udaan Isirayeel nibul kansikin.»
10 «Isirayeel yab ubɔ àá binicambi bin kóò bi-kansikinee ubɔ yaa ŋmɔ́ fatikuee, m làá fàtī m-boon kí tīī udaan ní kí nyāntí-u Isirayeel nibul kansikin. 11 Di sá yii kun kamaa cáá kufoouee maŋfal kā fatikun ní, ní man dūu tīī án fíntí ni-kpitii nsaraafan pu. Tiŋman puee fatiku yàntī ní ká ni-kpitii pɔ̄tam, kun puee u-ni ní dimaŋfal bíb. 12 An pu ní man ni-Dindaan bí nimbi Isirayeel yab yii: <Ni-kansikin ubɔ àá binicambi bin kóò ni-kansikinee ubɔ kaa máaǹ kí ŋmɔ́ fatiku.>
13 «Isirayeel yab kansikin ubɔ àá binicambi bin kóò bi-kansikinee ubɔ yaa cūtì kukpɔŋu ní ki kūū upeel un baa kòóyee àá kinɔmbiki kin baa kòóyee, ú yàntī upeelee àá kinɔmbikee fatikuu ń nyā kí fá kitiŋ ní ú dū ntam kí bìin̄ fatikuee pu. 14 Di sá yii kun pée cáá kufoouee maŋfal kā ku-fatikuun ní. An pu ní m bí nimbi Isirayeel yab yii: <Ní taa ŋmɔ́ báà kuwaŋkuluu kubɔ fatikuu, di sá yii ku-fatikuu di sá ku-maŋfalc.> Un yaa ŋmɔ́ fatikuee, bí nyāntí-u Isirayeel nibul kansikin.
15 «Kitindambiki àá unicaan yaa ŋmɔ́ dipeekpil àá upeel un an cúúyee, u máaǹ kí fíntí u-wampeeŋkaati, kí fàl̀, ní ki làá nīn bí tijɔkɔndin kí cáá sāā kujoou. Míǹ boonee ní ú nín nyā tijɔkɔndin. 16 Ama udaan yaa kaa fíntì u-wampeeŋkaati, kaa fùl̄ muee, udaan ŋá ikpiti ki fōō dibɔkpil.»