Akoobil 16

Ikpiti pɔ̄tam wiŋkpaaŋŋu bɔti

1 Aarɔn jipɔmbi bili nín nìn sútì ki pìl̄ ti-Dindaan ki kpíìyee boonee, ti-Dindaan nìn sòon̄ nì Mooyiisi. 2 U nìn bí-u yii: «Tùkù a-maan Aarɔn yii ú taa nín̄ kóò ŋyunti ŋun ní u yaa lèe circir páaa laŋki^a, ŋŋaapìtikaa boon, laakin dipoondi dakaau nì u-bìil sée. Mimmee ŋyunti ŋun ditagbandi din poon m bée yaa nyáń ki dāntì dipoondi dakaau bìil puee, waa kúù.

3 «Kí wàatī Aarɔn ń nín kɔ́ circir páaa laŋki gbantee, u máaǹ kí cáań dinajapɔmbil kí ŋá ikpiti pɔ̄tam saraau nì upìja kí ŋá saraawɔkaa^b. 4 Ú dū ŋŋaapiin saraaŋabɔkutil din fɔ̀kɔ̀ee kí pèen̄, kí dū ŋŋaapiin cukutigiŋki kí lòon̄, kí dū ŋŋaapiin dambalau kí cúú u-caŋ ní kí dū ŋŋaapiin kí fìn̄ u-yil. Tiwan gbanti sá circir wanti ní, an puee u máaǹ kí fàl̀ ní kí nín pèen̄-tì. 5 Míǹ boonee ní Isirayeel yab ń tīī-u iŋɔjaa ili ú dūú ŋá ikpiti pɔ̄tam saraau ní kí tīī-u upìja ubɔ ú dūú ŋá saraawɔkaa.

6 «Aarɔn ń dū dinabil din u làá dūú ŋá úǹ u-ba kpitii pɔ̄tam saraauee kí ŋá saraa ní kí ŋá dikoobil nín bālifì puee kí fíntí u-kpitii nì u-dicaŋku yai. 7 U yaa ŋá míǹ ki dóòyee ní ú cáań iŋɔjaa ilee ti-Dindaan nimbiin circir kɔŋkooŋŋu punyɔkɔki nyɔkɔpu. 8 Ú tɔ̄ kasi iŋoobuee liitil pu kí béé un làá nīn sá ti-Dindaan yɔuee nì un làá nīn sá Asaseel^c yɔuee. 9 Ní Aarɔn ń dū uŋoobu un bi tɔ́ kasi ki lēē yii u sá ti-Dindaan yɔuee kí ŋá ikpiti pɔ̄tam saraau. 10 Ama Asaseel ŋoobuuee, úǹ ń nīn wāĺ ní bí cáań-u ti-Dindaan nimbiin kí ŋá dikoobil nín bālifì puee kí fíntí samaa kpitii, ní kí jà-u kí tɔ̄ kuteeun kí tīī Asaseel.

11 «Niinee ní Aarɔn ń yòon̄ dinabil din u làá dūú ŋá u-kpitii pɔ̄tam saraauee, ní kí ŋá dikoobil nín bālifì puee kí fíntí u-kpitii nì u-dicaŋku yai. Ú làntì dinabilee kí ŋá úǹ u-ba kpitii pɔ̄tam saraau. 12 Ú mɔ́fí amɔsiŋkoon ŋin bí nsaraafan pu circir kɔŋkooŋŋunee kí ŋá kisambiki kin poon bi tùutī talaaluee. Ú yáfí talaalu yim aŋaŋkul ali ní kí cáá kɔkɔ kí kɔ́ǹ circir páaa laŋki, ŋŋaapìtikaa boon. 13 Ti-Dindaan nimbiin niinee ní Aarɔn ń dū talaaluee kí páká amɔsiŋkoonee pu ní talaaluee nyiim ń yīkì kí bìin̄ dipoondi taŋkpapilinti dakaau nì u-bìil pu, án nín làá ŋá pu ú taa kpúee. 14 U yaa ŋá míǹ ki dóòyee ní ú dū u-ŋambiki kí sēē dinabilee fatikuu kí dūú yàaǹ Dipoondi dakaau bìil pu, ŋwìiń nyalaŋki pú, ŋfunyɔm miluli, ní kí yàaǹ dakaayee nyɔkɔpu ŋfunyɔm miluli. 15 Míǹ boonee ní ú làntì uŋɔja un u làá dūú ŋá samaa kɔkɔ kpitii pɔ̄tam saraauee. Ú yòon̄ u-fatikuu kí cáá kɔ́ǹ circir páaa laŋki, ŋŋaapìtikaa boon. Ú dū fatiku gbanti kí ŋá kii u nín bàà pée dū dinabilee fatikuu ki ŋá pu ki dūu yāaǹ Dipoondi dakaau bìil pu nì dakaayee nyɔkɔpu puee^d. 16 Aarɔn nín máaǹ kí ŋá pu kí fíntí circir páaa laŋki kí nyāntí Isirayeel yab yìntitam nì bi-kpitii nín kɔ́ǹ circir páaa laŋki gbanti tijɔkɔndi tin poonee dee. Ú ŋá dikpafindi tantiu un bí bi-cee bi-jɔkɔnti kansikinee míǹ mbaantiim. 17 Báà unil kaa máaǹ kí nīn bí circir kɔŋkooŋŋu poon kí yòon̄ ŋyunti ŋun Aarɔn kɔ́ circir páaa laŋki ki bíi ŋáań saraabee kí cáá sāā ŋyunti ŋun u làá dāá fàtīí nyānnée. U ŋáań saraabi gbanti u-kpitii pu nì u-dicaŋku nì Isirayeel yab kɔkɔ yai pu ní. 18 Míǹ boonee ní ú nyānní circir kɔŋkooŋŋun kí dāan̄ nsaraafan ŋun bí circir kɔŋkooŋŋu nyɔkɔpuee cee, ní kí ŋá dikoobil nín bālifì puee kí nyāntí-ŋu tijɔkɔndin, ní kí jōō dinabilee fatikuu nì uŋɔjee fatikuu kí dūú ŋmìtī nsaraafan yiŋyi kɔkɔ pu kí màntīí tū. 19 U yaa ŋá míǹ ki dóòyee ní ú dū u-ŋambiki kí sēē fatikuee kí yàaǹ nsaraafan pu ŋfunyɔm miluli, kí fíntí-ŋu kí nyāntí Isirayeel yab jɔkɔntin, kí ŋá-ŋu circir.

20 «Aarɔn yaa ŋá saraabi ki nyántì circir páaa laŋki nì dikpafindi tantiu jaŋŋi ŋin kíǹee nì nsaraafan kɔkɔ tijɔkɔndin ki dóòyee ní ú dàtī Asaseel ŋɔjauee nì u-nimbiliŋ kí cáań ti-Dindaan nimbiin. 21 Niinee ní Aarɔn ń dū u-ŋalii liitil kí páań uŋɔjee yil pu ní kí bìitī Isirayeel yab tuŋkpitiŋ nì bi-yìntitam nì bi-kpitii pu kí dūú túń uŋɔjee pu, ní kí lēē unil ubɔ ń péetí-u kí tɔ̄ kupɔɔun. 22 Mimmee, uŋɔjee kpáaǹ bi-kpitii kɔkɔ ki cáa búntì laakin ubɔ kaa kóòyee dee.

«Bi nín péetì uŋɔjee ki tɔ́ kupɔɔun míǹ ki dóòyee, 23 ní Aarɔn ń fàtīí kɔ́ dikpafindi tantiun ní kí pèetī tiwan tin u bàà pēē ki kɔ́ circir páaa laŋkee kí síiń niin^e. 24 Ú yūĺ mpaan ŋun bí circiree pu kí fàl̀ ní kí fàtīí gíiǹ u-wampeeŋkaati kí pèen̄. Míǹ boonee ní ú nyānní kí ŋá u-saraawɔkaau nì samaa kɔkɔ yɔu, ní kí ŋá dikoobil nín bālifì puee kí fíntí úǹ u-ba kpitii nì samaa kpitii. 25 Míǹ boonee ní ú dū tiwaŋkuti tin bi dūu ŋá ikpiti pɔ̄tam saraauee kpam kí wà ŋŋmi nsaraafan pu.

26 «Unil un péetì Asaseel ŋɔjau ki tɔ́ kupɔɔunee máaǹ kí fíntí u-wampeeŋkaati, kí fàl̀, ní kí nín kɔ́ dinaapaalin. 27 Unaja nì uŋɔja in bi dūu ŋá ikpiti pɔ̄tam saraau, ki dū i-fatikuu ki kɔ́ǹ circir páaa laŋki ki fíntì tijɔkɔndee, bí cáá i-gbaŋyi nì i-nanti nì i-nai kí nyāntí dinaapaal kpaanceetiŋu kí wà ŋŋmi^f. 28 Unil un dū an wantee ki wùn̄ ŋŋmee ń fíntí u-wampeeŋkaati, kí fàl̀, ní kí nín kɔ́ dinaapaalin.

29 «Tin bí nee ń nīn sá-ni dibɔkpaal din làá nīn bí ki cá jaanjaanee: uŋmaluluúti, iwiin saalaa dalee, an yaa sá kitindambikeeee, unicaan un dɔ́miń ki kóò ni-pueeyeeee, ni-kɔkɔ ń bóob́ kinyɔkɔ kí taa tɔ̄ ditundi báà diba. 30 Di sá yii ŋwiin gbanti ní bi ŋáań saraabi kí fíntí-ni kí nyāntí ni-jɔkɔntin ní kpántí circirdambi ti-Dindaan nimbiin. 31 Ní dū ŋwiin gbanti kí ŋá diŋuŋfil nì dinyɔɔboobil wiiŋŋu. Án nīn sá dibɔkpaal din làá nīn bí ki cá jaanjaanee.

32 «Usaraaŋal un bi bātì ŋkpam ki sītì u-yil pu ki dū-u ki sú ti-Dindaan u fōō u-baa yil ki kpántì usaraaŋakpilee di dāa ŋáań ikpiti pɔ̄tam saraau nee. U dāa pèentí ŋŋaapiin saraaŋabɔkutiŋ 33 ní kí ŋá saraabi kí fíntí circir páaa laŋki nì dikpafindi tantiu jaŋŋi ŋin kíǹee nì nsaraafan nì bisaraaŋaliibi nì samaa kɔkɔ kí nyāntí tijɔkɔndin.

34 «Án nīn sá-ni dibɔkpaal din làá nīn bí ki cá jaanjaanee. Ní nīn ŋáań saraabi dibindi poonee diba ki fíntí Isirayeel yab kpitii kɔkɔ^g.»

Ní Aarɔn ŋá kii ti-Dindaan nín tīī Mooyiisi mara puee.