Akoobil 15

Uninja jɔkɔnti pu marab

1 Ti-Dindaan bí Mooyiisi nì Aarɔn yii 2 bí tùkù Isirayeel yab yii:

«Batiku yaa cúú uninjee, tináti tin nyēē-uee kɔ́ǹ-u tijɔkɔndi. 3 Tinátee yaa bíi nyēēyaaa, tì yaa tīkiǹaaa, udaan kɔ́ tijɔkɔndi. 4 Ndoo ŋun kamaa pu udaan yaa dōoǹee kɔ́ tijɔkɔndi, ní tin kamaa pu ní u yaa kāl̀ee mun kɔ́ tijɔkɔndi. 5 Un di yaa pée gbēē u-dooŋuee máaǹ kí fíntí u-wampeeŋkaati, kí fàl̀, ní ki làá nīn bí tijɔkɔndin kí cáá sāā kujoou. 6 Un di yaa pée kāl̀ kun pu ní ubatikudaan kāl̀ee máaǹ kí fíntí u-wampeeŋkaati, kí fàl̀, ní ki làá nīn bí tijɔkɔndin kí cáá sāā kujoou. 7 Un di yaa gbēē ubatikudaanee máaǹ kí fíntí u-wampeeŋkaati, kí fàl̀, ní ki làá nīn bí tijɔkɔndin kí cáá sāā kujoou. 8 Ubatikudaan yaa tíil̀ ki pɔ̀l̄ unil un kaa kɔ́ tijɔkɔndee puee, udaan máaǹ kí fíntí u-wampeeŋkaati, kí fàl̀, ní ki làá nīn bí tijɔkɔndin kí cáá sāā kujoou. 9 Dijal din kamaa pu ní ubatikudaan yaa kāl̀ ki cūtì nsanee kɔ́ tijɔkɔndi. 10 Un di yaa pée gbēē tin kamaa dɔ̄ ubatikudaan taapuee kɔ́ tijɔkɔndi kí cáá sāā kujoou. Un di yaa tí yōoǹ tiwan gbanti ki túǹee máaǹ kí fíntí u-wampeeŋkaati, kí fàl̀, ní ki làá nīn bí tijɔkɔndin kí cáá sāā kujoou. 11 Unil un kamaa ní ubatikudaan yaa kaa fíntì u-ŋal ki gbēēyee máaǹ kí fíntí u-wampeeŋkaati, kí fàl̀, ní ki làá nīn bí tijɔkɔndin kí cáá sāā kujoou. 12 Ditansambil din kamaa ní ubatikudaan yaa gbēēyee, bí gbá kí wīī-dì. An yaa sá ndɔ sambilee, bí dū nnyim tikpil kí fíntí-dì.

13 «Tináti tin nìn nyēē ubatikudaan ki kɔ́ǹ-u tijɔkɔndee yaa gúń u pɔ́ɔkèe, ú gíti kàl̄ iwiin iluli ní kí nín nyā u-jɔkɔntin. Ú fíntí u-wampeeŋkaati, kí dū nnyimbul nyim kí fàl̀ ní kí nín nyā tijɔkɔndin. 14 Iwiin inii dalee, ú nyàab̀ ananjil ali àá abeenanjil ali kí cáá cùnnì ti-Dindaan nimbiin, circir kɔŋkooŋŋu punyɔkɔki nyɔkɔpu, kí dūú tīī usaraaŋal. 15 Usaraaŋal ń dū diba kí ŋá ikpiti pɔ̄tam saraau ní kí dū din kíǹee kí ŋá saraawɔkaa. Ú ŋá dikoobil nín bālifì puee ti-Dindaan nimbiin kí fíntí udaan batikuu jɔkɔnti.

16 «Uninja yaa nyéem̀ tijatee, u máaǹ kí fàl̀, ní ki làá nīn bí tijɔkɔndin kí cáá sāā kujoou. 17 Tijatee yaa táká tiwampeeŋkaal tiba àá ŋgban wanti tibee, bí dū nnyim kí fíntí-tì. Tì làá nīn bí tijɔkɔndin kí cáá sāā kujoou.

18 «Uninja yaa dōoǹ nì unimpuee, bi-liitil máaǹ kí fàl̀, ní ki làá nīn bí tijɔkɔndin kí cáá sāā kujoou.»

Unimpu jɔkɔnti pu marab

19 «Unimpu yaa bíi fùul̀ ŋkpinee, u kɔ́ tijɔkɔndi kí cáá sāā iwiin iluli. Un mun di yaa gbēē-uee kɔ́ tijɔkɔndi kí cáá sāā kujoou. 20 Ndoo ŋun kamaa pu ní unimpuee yaa dōoǹ ŋyunti gbanti kɔkɔee kɔ́ tijɔkɔndi, ní tiwan tin kamaa pu ní u yaa pée kāl̀ee mun kɔ́ tijɔkɔndi. 21 Un di yaa pée gbēē u-dooŋuee mun kɔ́ tijɔkɔndi. Udaan máaǹ kí fíntí u-wampeeŋkaati, kí fàl̀, ní ki làá nīn bí tijɔkɔndin kí cáá sāā kujoou. 22 Un di yaa pée gbēē kun pu ní unimpu gbanti kāl̀ee ń fíntí u-wampeeŋkaati, kí fàl̀, ní ki làá nīn bí tijɔkɔndin kí cáá sāā kujoou. 23 Tiba yaa pá ndoo ŋun pu unimpu gbanti dɔ̄ee, àá dijal din pu u kēe ní ubɔ dɔ́miń ki gbēē tiwan gbantee, udaan kɔ́ tijɔkɔndi kí cáá sāā kujoou. 24 Uninja yaa dōoǹ nì u ŋyunti gbanti poon ní u-fatikuu nyáń ki gbēē-uee, uninjee mun kɔ́ tijɔkɔndi kí cáá sāā iwiin iluli. Uninja gbanti mun yaa dōoǹ ndoo ŋun puee kɔ́ tijɔkɔndi.

25 «Unimpu yaa fùl̄ ŋkpin iwiin kupaau ní an kaa sá u-kpiŋŋu yuntiŋu, àá u-kpiŋŋu yaa jítì iwiin in an bàà sá an gúńee, u bí tijɔkɔndin ŋyunti gbanti kɔkɔ poon kii u nín pée kpààa kāntí u-ba iyunti in máaǹee puee. 26 Ndoo ŋun pu ní u yaa pée dōoǹee, àá dijal din pu ní u yaa kāl̀ ŋyunti gbanti poonee kɔ́ tijɔkɔndi kii u nín pée kpààa fùul̀ ŋkpin iyunti in máaǹee puee. 27 Un di yaa gbēē ndoo àá dijal gbantee máaǹ kí fíntí u-wampeeŋkaati, kí fàl̀, ní ki làá nīn bí tijɔkɔndin kí cáá sāā kujoou.

28 «Ŋwiin ŋun u-kpiŋŋu gúńee, ú gíti kàl̄ iwiin iluli ní kí nín nyā tijɔkɔndin. 29 Iwiin inii dalee, ú nyàab̀ ananjil ali àá abeenanjil ali kí cáań kí tīī usaraaŋal, circir kɔŋkooŋŋu punyɔkɔki nyɔkɔpu. 30 Usaraaŋal ń dū nnɔmbiyaamuee kiba kí ŋá ikpiti pɔ̄tam saraau, kí dū kin kíǹee kí ŋá saraawɔkaa. Míǹ boonee usaraaŋal ń ŋá dikoobil nín bālifì puee unimpuee pu ti-Dindaan nimbiin kí fíntí u nín fùl̄ ŋkpin puee jɔkɔnti.»

31 Ti-Dindaan nìn gíti bí Mooyiisi nì Aarɔn yii: «Ní kpāafì Isirayeel yab bí taa sútí kí pìl̄ m-kɔŋkooŋŋu ŋyunti ŋun bi yaa bí tijɔkɔndinee. Di sá yii bi yaa kɔ́ǹ m-kɔŋkooŋŋu ŋun bí bi-kansikinee tijɔkɔndee, see bí kpú.»

32 Marab bin bi síiǹ ubatikudaan àá un di yaa nyéem̀ tijati ki kɔ́ tijɔkɔndinee dee. 33 Marab gbanti sá ki tīī unimpu un fùl̄ ŋkpinee àá uninja àá unimpu un fatiku nyēē-uee àá uninja un di yaa dōoǹ nì unimpu un bí tijɔkɔndinee mun.