Disaŋkindi 40

Bí cóoń tanti kí dū-u kí sú Unimbɔti

1 Ti-Dindaan bí Mooyiisi yii: 2 «Uŋmapeepeekaa wimpeekaaŋu dalee, á dū tanti un poon dipoondi taŋkpapilinti kēe kí cóoń. 3 Á dū dakaa un poon Dipoondi marab kēe kí yóoń ŋŋaapìtikaa boon án nīn lìkī bí taa nín̄ wāĺ. 4 Á cáań teebil un pu bi làá nīn pāantí kpɔnɔb m-nimbiinee kpɔnɔb ń nīn pá. Á cáań fitilab tɔ́kɔŋkaati ní kí tūū fitilab. 5 Á dū sindaariya saraafaŋŋu ŋun pu bi tùutī talaalubee kí yóoń dakaa un poon Dipoondi marab kēe nyɔkɔpu, ní kí dū ŋŋaasakaŋkaa kí sàkan̄ circir kɔŋkooŋŋu punyɔkɔki pu. 6 Á dū saraawɔkaa faŋŋu kí yóoń circir kɔŋkooŋŋu punyɔkɔki nyɔkɔpu. 7 Á dū kusampeeu kí yóoń circir kɔŋkooŋŋu nì nsaraafan kansikin, ní kí lúń nnyim kí gbéeǹ. 8 Á dū iŋaabu in bi dū gulfab ki lùn̄ee kí màntīí gíb́ circir kɔŋkooŋŋu cindi, ní kí dū ŋŋaasakaŋkaa kí sàkan̄ kipunyɔkɔpu.

9 «Á dū ŋkpam min bi cáa sìtī unil yil pu kí dū-u kí sú-mee kí sìtī circir kɔŋkooŋŋu nì tin kɔkɔ bí poonee pu. Míǹ ní a làá ŋá ní kí dū ŋu nì ŋu-wanti kɔkɔ kí sú-mi ní tí kpántí circir. 10 Á dū ŋkpamee kí sìtī nsaraafan nì tin kɔkɔ bi cáa tūǹ ŋu-pu ditundee, mimmee a dū-ŋu ki sú-mi dee, ní ŋú kpántí circir. 11 Ŋkpamee ní á tí dūú sìtī kusampeeu nì kun pu ku tɔ́kɔ́ee pu ní kú kpántí circir. 12 Á cáań Aarɔn nì u-jipɔmbi kí yóoń dikpafindi tantiu punyɔkɔki nyɔkɔpu, ní kí yàntī bí fàl̀ kí kpántí circir. 13 Boonee á dū circir wampeeŋkaati kí pèen̄ Aarɔn, ní kí dū ŋkpam kí sìtī u-yil pu kí dū-u kí sú-mi ú nīn tūǹ man tundi. 14 Á yàntī u-jipɔmbi ń sútiń kí pìl̄-si, ní á dū poon bɔkutifɔkɔŋ kí pèen̄-bi. 15 Á dū ŋkpam kí sìtī bi-yiliŋ pu kii a nín ŋá bi-baa puee, kí dū-bi kí sú-mi bí nīn sá bisaraaŋaliibi ki tūǹ man saraaŋatundi. Ŋkpam min a sītì bi-yiliŋ pu ki dū-bi ki sú-mee làá yàntī bí kpántí man saraaŋaliibi kí nīn pée cáa cá jaanjaan.»

Mooyiisi yāntì bi dū circir kɔŋkooŋŋu ki cóoǹ

16 Mooyiisi túń atuun kɔkɔ an kāl̀ deedee kii ti-Dindaan nín tīī-u mara ú ŋá puee. 17 Isirayeel yab nín nyáń kuyuŋun Eejipiti tiŋkinee, an tú dibindi uŋmapeepeekaa wimpeekaaŋu dal ní bi cóoǹ circir kɔŋkooŋŋu.

18 Mooyiisi nìn dū circir kɔŋkooŋŋu ki cóoǹ. U nìn dū titílkaal ki tíĺ ní ki dū tifukuŋkaal ki fúuń ní ki dū ikalim ki cúú ní ki dū idɔjaati ki cóoǹ. 19 U nìn kpátì tanti ŋaabui ki bīiǹ, ní ki dū iŋaabiiŋkaa ki páaǹ, kii ti-Dindaan nín nìn tīī-u mara puee.

20 Mooyiisi nìn dū titaŋkpapilindi tin pu bi ŋmàn̄ marab saalaayee ki tākaǹ dakaayee poon, ní ki dū dakaa kpandɔi ki bɔ́ dakaayee bɔmbiliŋin, ní ki dū u-bìil ki púkuǹ. 21 U nìn cáá dakaayee ki kɔ́ǹ ki yóoǹ circir kɔŋkooŋŋun, ní ki dū ŋŋaasakaŋkaa ki pītì bí taa nín̄ wāĺ dakaayee, kii ti-Dindaan nín nìn tīī-u mara puee.

22 U nìn cáá teebil un pu bi pāantí kpɔnɔb ti-Dindaan nimbiinee ki kɔ́ǹ ki yóoǹ circir kɔŋkooŋŋun ŋgan pú, ŋŋaapìtikaa nyɔkɔpu pú. 23 U nìn dū kpɔnɔb bin bi pāantí ti-Dindaan nimbiinee ki páaǹ teebilee pu, kii ti-Dindaan nín nìn tīī-u mara puee.

24 U nìn cáá fitilab tɔ́kɔŋkaati ki kɔ́ǹ ki yóoǹ circir kɔŋkooŋŋun, ŋgiil pú teebil nyɔkɔpu. 25 U nìn tūū fitilab ti-Dindaan nimbiin, kii ti-Dindaan nín nìn tīī-u mara puee.

26 U nìn cáá sindaariya saraafaŋŋu ki kɔ́ǹ ki yóoǹ circir kɔŋkooŋŋun, ŋŋaapìtikaa nyɔkɔpu. 27 U nìn tūū talaalub ŋu-pu, kii ti-Dindaan nín nìn tīī-u mara puee.

28 U nìn dū ŋŋaasakaŋkaa ki sākaǹ circir kɔŋkooŋŋu punyɔkɔpu. 29 U nìn dū nsaraafan ki yóoǹ circir kɔŋkooŋŋu punyɔkɔpu, ní ki ŋá saraawɔkaa nì tijin saraau ŋu-pu, kii ti-Dindaan nín nìn tīī-u mara puee.

30 U nìn dū kusampeeu ki yóoǹ circir kɔŋkooŋŋu nì nsaraafan kansikin, ní ki lúń nnyim ki gbéeǹ bí nīn jòotī ki fíntí. 31 Nnyim gbanti ní Mooyiisi nì Aarɔn nì u-jipɔmbi nìn jòotī ki fíntí bi-ŋalii nì bi-taaŋi. 32 Ŋyunti kamaa bi yaa làá kɔ́ circir kɔŋkooŋŋun kí sútí kí pìl̄ nsaraafanee, see bí fíntí míǹ, kii ti-Dindaan nín nìn tīī Mooyiisi mara puee.

33 Mooyiisi nìn dū iŋaabu in bi lùn̄ee ki sākaǹ ki māntìi gíb́ circir kɔŋkooŋŋu cindi nì nsaraafan, ní ki dū ŋŋaasakaŋkaa ki sākaǹ circir kɔŋkooŋŋu cindi punyɔkɔpu. Míǹ ní Mooyiisi nìn túń circir kɔŋkooŋŋu tuuŋŋi kɔkɔ ki dóò.

Unimbɔti nyooti kɔ́ ki gbí circir kɔŋkooŋŋun

34 Niinee ní ditagbandi dɔ́miń ki bīiǹ circir kɔŋkooŋŋu pu, ní Unimbɔti nyooti kɔ́ ki gbí ŋu-poon^a. 35 Mooyiisi kaa nìn ŋūǹ kí kɔ́ circir kɔŋkooŋŋun, di sá yii ti-Dindaan nyooti nìn gbí ŋu-poon.

36 Kí yòon̄ ŋyunti gbantee, ditagbandee yaa nìn yíkìi dāntì circir kɔŋkooŋŋu yilpuee, ní Isirayeel yab ń yīkì dinaapaal din pu bi nìn bée kí nìkī bi-saŋkindi. 37 Ama ditagbandee yaa kaa nìn yíkìi dāntèe, bi nìn kā míǹ ní ki cí daliŋkin di làá yīkì kí dàntēe.

38 Ti-Dindaan tagbandee nìn bīī circir kɔŋkooŋŋu pu ŋwiimpu, ama ní kunyeeuee an sá ŋŋmi ní Isirayeel yab kɔkɔ wāĺ. An nìn pée bí míǹ ní bi cōom̀ bi-saŋkindi kɔkɔ.