Disaŋkindi 39

Bisaraaŋakpilib wampeeŋkaati

1 Bi nìn dū gulfab bin máǹ gùŋgumee nì bin máǹ cínciŋee nì bin máǹ wèeeeyee ki ŋáĺ circir wampeeŋkaati bí nīn cáa tūǹ circir kɔŋkooŋŋun ditundi. Bi nìn ŋáĺ Aarɔn circir wampeeŋkaati kii ti-Dindaan nín nìn tīī Mooyiisi mara puee.

2 Bi nìn dū sindaariya ŋmiii nì gulfab bin máǹ gùŋgumee nì bin máǹ cínciŋee nì bin máǹ wèeeeyee nì bigulifapimbi bin dàfèe ki lùn̄ eefoodi. 3 Bi nìn gbáń ki kpátì sindaariya ní ki gífì ncalimu ncalimu, ní biwanluliibi cáa ŋmàlintí nì gulfab bin máǹ gùŋgum nì bin máǹ cínciŋee nì bin máǹ wèeeeyee nì gulfab bin pīiǹ ki dàfèe ki lùn̄. 4 Bi nìn ŋáĺ ŋŋaacalimu muli ki bá ajan liitil nyɔɔgbaŋŋi bí nīn cáa cútí. 5 Eefoodi ŋaacalimmu nìn sá tiwambaantiil ní. Bi nìn dū sindaariya ŋmiii nì gulfab bin máǹ gùŋgumee nì bin máǹ cínciŋee nì bin máǹ wèeeeyee nì bigulifapimbi bin dàfèe ní ki ŋáĺ ŋŋaacalimu gbanti, kii ti-Dindaan nín nìn tīī Mooyiisi mara puee. 6 Bi nìn dū ataŋkpanyaan ŋin bi yíì soowamee ali ki fúuń sindaariya sɔntin, ki dū kigaai ki ŋmàn̄ Jaakɔb jipɔmbi yiŋŋi ataŋkpeeyee pu, kii bi nín cákà kijalii pu puee. 7 Bi nìn dū ataŋkpeeyee ki bá ŋŋaacalimu mun bi ŋáĺ ki tábiǹ eefoodee. Ŋíǹ di nìn sá kii kudaaŋŋu ki téetí Jaakɔb jipɔmbi pu, kii ti-Dindaan nín nìn tīī Mooyiisi mara puee.

Kilɔbiki ŋáltam

8 Míǹ boonee ní u yāntì bitɔntɔnliibi dū sindaariya ŋmiii nì gulfab bin máǹ gùŋgumee nì bin máǹ cínciŋee nì bin máǹ wèeeeyee nì bigulifapimbi bin dàfèe ki ŋáĺ kilɔbiki^a. 9 Kilɔbiki gbanti jaŋŋi naatil nìn ŋmà ní dijandi kamaa nìn cáá santimeetab mmuŋku nì biŋmoo. 10 Bi nìn dū ataŋkpanyaan ki nákáǹ ikuul inaa ki-pu ki nyáantì-kì. Ŋkuupeepeekaa nìn sá ataŋkpanyaan ŋin bi yíì oodeemeeyee, nì ŋin bi yíì piitidaayee nì ŋin bi yíì bareekeetee. 11 Ŋkuuliliiti nìn sá ataŋkpanyaan ŋin bi yíì noofeekee, nì ŋin bi yíì safiiree nì ŋin bi yíì yaaliimee. 12 Ŋkuutataatee nìn sá ataŋkpanyaan ŋin bi yíì leeseemee nì ŋin bi yíì seebooyee nì ŋin bi yíì alamaayee. 13 Bi nìn dū ataŋkpanyaan ŋin bi yíì taarsiisee nì ŋin bi yíì soowamee, nì ŋin bi yíì yaasipee ki nákáǹ ŋkuunanaati pu. Bi nìn dū sindaariya ki mɔ́ɔ́ tin poon bi làá dū ataŋkpanyaanee kí fúuńee. 14 Bi nìn dū kigaai ki cáká Jaakɔb jipɔmbi saalaa nì bilee yiŋŋi ataŋkpanyaanee pu, kii bi nín cákà kijalii pu puee. Ditaŋkpanyaandi kamaa puee, bi nìn ŋmàn̄ kunaakoou kubɔ yindi, di sá tinaakɔti sá saalaa nì tili ní.

15 Bi nìn dū sindaariyamɔnti ki mɔ́ɔ́ ikusaka ili mpalimu yam ki dūu cúú kilɔbikee. 16 Bi nìn dū sindaariya ki mɔ́ɔ́ mbɔmbiyaamu muli ki túuń kilɔbikee nyɔɔgbaŋŋi ali. 17 Bi nìn dū sindaariya kusakayee ki bɔ́ mbɔmbiyaamu muli mun túuń kilɔbikee nyɔɔgbaŋŋi buŋyin. 18 Bi nìn dū anyɔɔgbán ali ŋin kíǹee ki bá sindaariya wanti tili tin poon ní ataŋkpanyaan fúuń eefoodi ŋaacalimmu pu, ní an bí kilɔbiki nyɔkɔpuee. 19 Bi nìn dū sindaariya ki gíti mɔ́ɔ́ mbɔmbiyaamu muli ki dūu bá kilɔbikee nyɔɔgbaŋŋi taapu jandi an nákáǹ eefoodi. 20 Bi nìn dū sindaariya ki mɔ́ɔ́ mbɔmbiyaamu muli mubɔ mun ki dūu bá iŋmii in bí eefoodi ŋaacalimmu puee taapu nnimbiin pú, laakin bi ŋáĺ ki táb́ee caŋin. Mbɔmbiyaamu gbanti nìn bí eefoodi dambalau yilpu pu ní. 21 Bi nìn dū gulfab bin máǹ gùŋgumee ŋmiiŋu ki bɔ́ kilɔbiki bɔmbiliŋin nì eefoodi bɔmbiliŋin ki kúĺ, ní kilɔbikee pá eefoodi dambalau pu ki pɔ̄ɔ̄ kaa cìŋkī, kii ti-Dindaan nín nìn tīī Mooyiisi mara puee

Usaraaŋakpil wampeeŋkaati tiba mun ŋáltam

22 Boonee ní bi dū gulfab bin máǹ gùŋgumee ki lùn̄ dibɔkutifɔkɔl din pu eefoodi làá nīn pée. 23 Bi nìn lēē di-kansikin kinyɔkɔ, bi yaa làá pèen̄ee bí dū diyil kí bɔ̄ niin. Bi nìn lùn̄ kinyɔkɔee nyɔɔgbaŋŋi gbìfì ki dàfì kí taa ŋmā kí cátí. 24 Bi nìn dū gulfab bin máǹ gùŋgumee nì bin máǹ wèeeeyee nì bin máǹ cínciŋee ki lùn̄ asubil ŋin bi yíì greenaadee ki lúntì dibɔkutilee júti taapu ki māntìi tú, 25 ní ki dū sindaariya waŋkilimmu mun ki lúntì dibɔkutilee júti taapu greenaadi biliŋee kansikin ki māntìi tú. 26 Bi nìn dū sindaariya waŋkilimmu nì greenaadi subiliŋ ŋin bi lùn̄ee ki lúntì disaraaŋabɔkutil júti taapu ki sákaǹ sákaǹ ki māntìi tú, kii ti-Dindaan nín nìn tīī Mooyiisi mara puee.

27 Bi nìn dū iŋaapiin in bí fálfalee ki ŋáĺ Aarɔn nì u-jipɔmbi poon bɔkutiŋ, 28 nì iŋaabu in bi cáa fìǹ diyilee, nì bisaraaŋaliibi fuulimmu nì ncukutigimpimu mun ŋaabui dàfèe. 29 Ní bi dū gulfapiin un dàfèe nì un máǹ gùŋgumee nì un máǹ wèeeeyee nì un máǹ cínciŋee ki ŋáĺ dambala ki gbáń-u, kii ti-Dindaan nín nìn tīī Mooyiisi mara puee.

30 Míǹ boonee ní bi dū sindaariyamɔnti ki mɔ́ɔ́ ki nántiǹ mpumpukum ní ki dū kigaai ki ŋmàn̄ ti-pu yii: <Bi dū-u ki sú ti-Dindaan.> 31 Ní bi dū gulfa un máǹ gùŋgumee ki lùn̄ kiŋaacaliŋ ki cúú sindaariya pumpukumee ki nákáǹ ŋŋaabu ŋun bi cáa fìǹ diyilee yilpu pu, kii ti-Dindaan nín nìn tīī Mooyiisi mara puee.

Bi dóò circir kɔŋkooŋŋu tuuŋŋi kɔkɔ

32 Míǹ ní Isirayeel yab nìn túń circir kɔŋkooŋŋu tuuŋŋi ki dóò. Ti-Dindaan nín nìn dàkā Mooyiisi yii bí ŋá puee, míǹ deedee ní bi nìn ŋá.

33 Isirayeel yab nìn yōoǹní tin kɔkɔ bi làá dūú cóoń circir kɔŋkooŋŋuee ki cáań Mooyiisi cee:

- tanti nì u-wanti kɔkɔ an dàkà yii, titábikaal nì tifukuŋkaal nì ikalim nì idɔjaati nì titílkaal,

34 - nì tipigban tin bi mántèe nì igban in bi cáa bìintée nì ŋŋaasakaŋkaa ŋun pìtī circir laŋki nì circir páaa laŋki kansikinee,

35 - nì Dipoondi taŋkpapilinti dakaau nì u-kpandɔi nì u-bìil,

36 - nì teebil nì tin kɔkɔ bi cáa tūǹ ditundi u-puee nì kpɔnɔb bin bi cāabìń ki pāantí ti-Dindaan nimbiinee,

37 - nì sindaariyamɔnti fitilab tɔ́kɔŋkaati nì ti-wanti kɔkɔ nì fitilab nì bi-kpam,

38 - nì sindaariya saraafaŋŋu nì ŋkpam min bi sìtī unil yil pu kí dū-u kí sú Unimbɔtee nì talaalutuukaa,

- nì circir kɔŋkooŋŋu punyɔkɔki ŋaasakaŋkaaŋu,

39 - nì tasa kúti saraafaŋŋu nì ŋu-làaŋ́ki kin sá tasa kútee nì ŋu-kpandɔi nì ŋu-wanti,

- nì kusampeeu nì kun pu ku tɔ́kɔ́ee,

40 - nì iŋaabu in bi làá dūú màntīí gíb́ dikpafindi tantiu cindee nì i-dɔjaatii nì i-tílkaati nì dicindi punyɔkɔki ŋaasakaŋkaaŋu, nì ŋu-ŋmiii nì ŋu-kpakpaaŋi,

- nì tiwan tin kɔkɔ bi làá nīn cáa tūǹ circir kɔŋkooŋŋu poon tuuŋŋee,

41 - nì tiwampeeŋkaal tin bi làá nīn pèentí ki tūǹ atuun circir kɔŋkooŋŋunee nì usaraaŋakpil Aarɔn wampeeŋkaati nì u-jipɔmbi yati tin bi làá nīn pèentí ki tūǹ disaraatundee.

42 Isirayeel yab nìn túń atuun gbanti kɔkɔ, kii ti-Dindaan nín nìn tīī Mooyiisi mara yii ú ŋá puee ní deedee. 43 Mooyiisi nín ká yii bi túń atuun gbanti kɔkɔ kii ti-Dindaan nín bí bí ŋá pueeyee, ní u mēē ki bīiǹ bi-pu.