Disaŋkindi 1

Disaŋkindi

gbɔŋku

UNIMBƆTI NYÁNTÌ ISIRAYEEL YAB EEJIPITI TIŊKIN 1–15

Isirayeel yab kpántì iyumbu Eejipiti tiŋkin

1 Isirayeel^a jipɔmbi bin nìn nóoń-u ki dɔ́miń Eejipiti nì bi-dicaŋŋee yiŋŋi sèé: 2 Rubeen nì Simeeyɔn nì Leefii nì Juuda 3 nì Isakaar nì Sabulɔn nì Beenjameen 4 nì Daani nì Neefitalii nì Gaadi nì Aseer. 5 Jaakɔb nib kɔkɔ nìn kpáfì binib imuŋku ita nì saalaa ní. U-jipɔɔn Jooseefi úǹ nìn pée bí Eejipiti. 6 Boonee ní Jooseefi nì u-nabiyaamu nì u-yuntiŋu nib kɔkɔ dāa kpíì. 7 Míǹ boonee Isirayeel yab màl̄ ki būtì tikpil ki gbí kitiŋee ní ki ká mpɔn tiŋan pu^b.

8 Ubɔtipɔɔn ubɔ nìn kāl̀ dibeel Eejipiti tiŋki pu, kaa pée nyí Jooseefi pu tiba. 9 Ubɔtee nìn bí u-samaau yii: «Kpèèmaan, Isirayeel yab kpántì dinibul dikpaandi ki cáá mpɔn tiŋan pu ki jítiǹ-ti. 10 Tí nyàab̀maan nsan kí bàtī bi-wíiŋŋu pu, án nín làá ŋá pu ní kujaau yaa láa nyánnée, bí taa cùú kūtì ti-nannanliibi pu bí jáǹ-ti ní kí sāǹ kí nyā ti-tiŋkinee.» 11 Niinee ní bi lēē bikàliŋkpilib ki tɔ́ bi-pu bí tīī-bi atuun ŋin pɔ̄ɔ̄yee bí nīn tūǹ. Bi nìn yāntì bi máń Piitoom nì Ramseesi timmu mun poon bi làá nīn kpáafí Faaroo^c jintee. 12 Ama bi yaa bíi sàantí Isirayeel yabee, ŋyunti gbanti ní bíǹ mɔ̀tīi bùtī ki jīǹ mpaan. An pu ní Eejipiti yab nìn kíǹ ki fàŋkí-bi. 13 Niinee Eejipiti yab mɔ̄tìi bíi sàantí Isirayeel yab tikpil kii iyumbuee. 14 Bi nìn yāntì Isirayeel yab wunti túŋkì nì atuun ŋin pɔ̄ɔ̄yee tɔ̄tam, an dàkà yii bi nìn búù titan ki māā brikisib ki tūǹ asaatuun. Eejipiti yab nìn cáá atuun ŋin kɔkɔ pɔ̄ɔ̄yee ki cáa nyìitī-bi mpɔn.

Faaroo wɔ́b́ Isirayeel yab

15 Eebru yab nìn cáá bimatimmaanliibi bili bi nìn yíì ubɔ yii Siifira nì ki yíì un kíǹee Puya. Eejipiti bɔtiu nìn bí bi-kansikin ubɔ yii: 16 «Ni yaa bíi màantí Eebru yab nimpoobi ubɔ ní ki yaa ká yii an sá kibininjabiki ní u bíi màal̀ee, ní fáá-kì kí kpɔ̀, ama an yaa sá kibinimpubikee, ní yàntī-kì.» 17 Ama bimatimmaanliibee nìn fàŋkí Unimbɔti. An puee baa nìn pílifiǹ Eejipiti yab bɔtiu ní ki nìn yàntī bi màal̀ mbininjabiyaamu kaa kù-mu. 18 Ní ubɔti yíiń bimatimmaanliibee ní ki bí-bi yii: «Ba pu ní ni ŋá míǹ, ki yàntī Eebru nimpoobi màal̀ naa fátí ki kù mbininjabiyaamu ní?» 19 Bimatimmaanliibee nìn kíí Faaroo yii: «Eebru nimpoobi kaa sá kii Eejipiti nimpoobee. Bíǹ màal̀ bi-biyaamu sɔkɔmii kí dóó kí wàatī ní umatimmaanli ń nín bà.»

20 Unimbɔti nìn bīiǹ bimatimmaanliibi boon, ní Isirayeel yab mɔ̀tīi bùtī ki cáá mpɔn tikpil.

21 Kii bimatimmaanliibee nín nìn fāŋkì Unimbɔti puee, u nìn bīiǹ bi-boon bi-dicaŋŋi būtì. 22 Niinee Faaroo yóoǹ u-yab kɔkɔ mara yii: «Ni yaa ká Eebru nimpoobi ubɔ màl̄ kibininjabikee, ní fōō-kì kí cáá tɔ̄ Niil mɔɔlin. An yaa sá kibinimpubikee, ní taa kpɔ̀-kì^d.»