Dinyeel 19

Soodoom yab tuŋkpitiŋ

1 Ituun ilee dūu bàn̄ Soodoom tiŋkin kujoou. Looti nìn nyáń ki kā Soodoom tiŋki punyɔkɔpu^a. U kēe ní ki ká bi dòoń, ní u yíkì ki túŋkì-bi. U bàn̄ bi-ceeyee ní ki gbāaǹ ki jáam̀-bi, 2 ní ki bí-bi yii: «M-dindambi, m gbāam̀-ni ní, pàatīmaan man ni-tɔntɔnliu dumpu kí fíntí ni-taaŋi kí dòon̄ m-cee, ku yaa fu wúntì kutaafaau pɔ̀lpɔlee, ní fu nìkī ni-saŋŋu.» Ní bi yíì yii bi làá dòon̄ mmɔŋki laaba ní. 3 Ní u páb́-bi tikpil ní bi dāa pāatì ki kɔ́ u-dumpu, ní u púĺ kpɔnɔ un baa ŋá ŋkpɔnɔnyɔkɔee ki ŋá-bi tican ní bi jíń.

4 Bi dáá kā kaa láá kɔ́ ki dōoǹ, ní Soodoom tiŋki yab kɔkɔ dɔ́miń ki māntìi tú bi-diiku, kí yòon̄ binaacimpɔmbi kí cáá sāā bitikpilib, bininjab kɔkɔ, ugàntil kpá. 5 Ní bi yíiń Looti ki bí-u yii: «Bininjab bin kɔ́ a-pu kunyeeu neeyee bí la? Nyāntiń-bi doo timbi ń dòon̄ nì bi.»

6 Ní Looti nyáń ki yúl̀ kipunyɔkɔpu ki gíiǹ punuu ki pīiǹ, ní ki bí-bi yii: 7 «M-nabiyaamu, m gbàam̄-ni, ní taa ŋámaan ikpiti gbanti. 8 M cáá bisapɔmbi bili, baa nyí uninja. M làá cáań-bi kí tīī-ni ní ŋá-bi ni yaa là puee. Ama an yaa sá bininjab neeyee, ní taa ŋá-bi tiba, kun puee bi kɔ́ m-pu ní.» 9 Ní bi kíí Looti yii: «Sútí niin kí wàatī timbi.» Ní ki kútì ki bí yii: «Unil nee sá unicaan ní ki kɔ́ timbi ní ki là kí nīn sá ti-bɔsoonliu. Too, ti làá ŋá-si tikpitil kí jītíǹ a-nicambi gba!» Niinee ní bi téé Looti mpɔn kí bàà cúú punuu kí wīī kí kɔ́ bininjabee pu. 10 Ní bininjabee tāntì bi-ŋalii ki cúú Looti ŋal ki dáaĺ-u ki kɔ́ǹ bi-cee, ní ki dū punuu ki pīiǹ. 11 Ní ki dū ijɔfi^b ki tɔ́ bin kɔkɔ nìn dɔ́miń ki yú kudii nyɔkɔpuee, ki yōoǹ binaacimpɔmbi ki tin cáa sāā bitikpilib, ní baa ti wāĺ ní ki nyàab̄ kipunyɔkɔ ki gīī.

12 Niinee ní bininjabee bālifì Looti yii: «A gíti cáá binib biba doooo? Nyāntí a-coobi nì a-jipɔmbi nì a bisalib nì bin kɔkɔ pée sá a-dicaŋkunee kitiŋ nee poon. 13 Di sá yii ti làá kúntí kitiŋ nee, kun puee ti-Dindaan nín gbìl̄ bi sòoǹ ki-kpitii pu miŋyee wīikí tikpil, ní u túnní-ti yii tí dāá kúntí-kì.» 14 Ní Looti nyáń ki tùkū u-coobi bin làá dāá cáá u-bisalibee yii: «Yīkìmaan kí nyā kitiŋ nee poon, kun puee ti-Dindaan làá kúntí-kì.» Ama bíǹ nìn dākafì yii an sá tinaacin ní.

15 Kutaa bíi wúntée ní ituun in bí Looti ceeyee bíi páb́-u ki lì yii: «Yīkì kí yòon̄ a-nimpuu nì a-bisalib liitil nee kí kpáàá nyā kí taa yàntī ditafadaaldi din làá jēetí kitiŋ nee puee ń kpáaǹ-si.» 16 Ama ní Looti bí ki tàantí kaa làá nyā malaa. Ní bininjab bilee cúú u nì u-nimpuu nì u-bisalib bilee ŋalii ki dáaĺ-bi ki nyántì kitiŋ kpaanceetiŋu. Di sá yii ti-Dindaan nìn là kí fīī-u ní^c.

17 Bi dáaĺ-bi ki nyántèe ní bi-kansikin ubɔ bí Looti yii: «Sāǹ kí fīī a-ba! A yaa bíi sáńee, á taa fàtī kí kpèè a-boon, kí taa yūĺ laaba. A yaa kaa là ŋkúmee, á nīn pée sáń ki cá ajoon watil pú.» 18 Ní Looti bí yii: «Óò m-Dindaan, m gbāam̀-si! 19 Tiŋman, man a-tɔntɔnliu ká diyimɔɔl a-cee. A nín fīī-mi ŋkúminee, a dàkā-mi kulaŋŋaŋfitiiu tikpil. Ama m yaa bí yii m làá nīn sáń ki cá ajoon watil púee, maa làá bà ní mbusu nee ń dāá jēetí m-pu ní ḿ kpú. 20 M gbāam̀-si, kpèè kitimbilii kiba di bí m-nyɔkɔpu nee, kaa dátì ḿ ŋmā kí sāǹ kí bà niin. Kitiŋ gbanti kaa náaǹaa! Yàntī ḿ sāǹ kí kɔ́ ki-ni kí ŋmátí.» 21 Ní u kíí Looti yii: «M làá gíti pɔ̄-si diyimɔɔl. A-puee maa làá kúntí kitimbilii kin bɔti a sòoǹ nee. 22 Malaa sāǹ kí báĺ niin, kun puee a yaa kaa láá bàn̄ kitiŋ gbantin, maa ŋūǹ kí ŋá tiba.» An pu ní bi pú kitiŋ gbanti diyindi yii Soowaar^d.

23 Ŋwìiń bíi nyēēyee ní Looti bàn̄ Soowaar timbiliikin. 24 Niinee ní ti-Dindaan yāntì farwata nyánní yilpu ki fōō ŋŋmi ki sìtī kii utaayee Soodoom nì Goomoora timmu pu. 25 U nìn nāaǹ ntimu gbanti nì ditantakal din poon mu bée kɔkɔ, ki kūū ki céetì mu-nib nì isufi nì timool kɔkɔ^e. 26 Ní Looti nimpuu fātì ki kpēē u-boon ní ki kpántì diyataŋkpal ki yúl̀^f.

27 Ku wúntì kutaafaau pɔ̀lpɔlee, Abraam péé ki cūtì laakin u fu yúl̀ ti-Dindaan cee ki sòon̄ nì uee. 28 U kpēē Soodoom nì Goomoora timmu nì ditantakal din poon mu bée watil púee, ki ká ŋŋminyiim nyēē kitiŋ ki dùkù ki jɔ́ḿ, a lì kii kipaai nyiimee.

29 Ŋyunti ŋun Unimbɔti nìn kúntì ntimu mun bí ditantakal poonee, waa nìn súntì Abraam pu ní ki fīī Looti ki nyántì kitiŋ kin poon u nìn kóòyee ki wāatì ní ki nín nāaǹ-kì.

Moowaab nì Amɔn yab nyeeŋu

30 Looti nìn fàŋkí kí nīn kóò Soowaar tiŋkin, an puee ní u kpáaǹ u-bisalib liitil ki yíkì ki tin kóòń ajoon pu itaŋkpalɔkɔn. 31 Dalbee ní ukpil bí u-naal yii: «Ti-baa púĺ, ní bininjab mun kpá doo tí mɔ̄ǹ-bi kii an nín pée sá báà ŋma mɔ́ń puee. 32 Yàntī tí nyùntī ti-baa ndaam, kí dòon̄ u-cee kí màal̀-u mbiyaamu ú ká inibool.»

33 Kujoou gbantee ní bi nyūntì bi-baa ndaam ní u gbí, ní ukpil dōoǹ u-baa cee kunyeeu gbanti. U-baa kaa nìn kpáàa béè ŋyunti ŋun u kóoń ki dōoǹee nì ŋyunti ŋun u yíkèe gba. 34 Kutaa wúntèe ní ukpil tùkū u-naal yii: «M fu dōoǹ ti-baa cee kunyeeu. Tí gíti nyùntī-u ndaam kunyeeu nee si mun ń cùú dòon̄ u-cee, tí ŋmā kí tīī ti-baa inibool.» 35 Ní bi tí nyūntì bi-baa ndaam kunyeeu gbanti, ní kiwaayee mun cūtì ki dōoǹ bi-baa cee, ní bi-baa kaa kpáàa béè ŋyunti ŋun u kóoń ki dōoǹee nì ŋyunti ŋun u yíkèe gba.

36 Niinee, Looti bisalib liitilee dūu cáá u-pool. 37 Ní ukpil màl̄ kibininjabiki ní ki pú-kì diyindi yii Moowaab. Úǹ di sá díǹ pu nee Moowaab yab naanja. 38 Ní u-naal mun màl̄ kibininjabiki ní ki pú-kì diyindi yii Been-Amii. Úǹ di sá díǹ pu nee Amɔn yab naanja.