Dinyeel 20

Abraam nì ubɔti Abimeeleeki bɔti

1 Abraam yíkì niinee ní ki nín cá Neegeeb tiŋkin, ní ki cūtìi kāl̀ Kadeesi nì Suur kansikin, ní ki dāa yíkì niin ki cūtìi kóòń Geeraar. 2 Abraam nìn lī binib cee yii u-nimpuu Saara sá u-niisal ní. An pu ní Geeraar bɔtiu Abimeeleeki tú bi cúú Saara ki cūnnì-u. 3 Kunyeeuee ní Unimbɔti dɔ́miń Abimeeleeki cee kudamintiiu poon ní ki bí-u yii: «A làá kpú unimpu un a fōō ki làá cáá nee pu, kun puee u cáá cal.» 4 Abimeeleeki kaa nìn dá láá gbēē unimpuee ní ki lī yii: «Ti-Dindaan, a làá kúntí kitimmɔŋ nib báà bi yaa kaa ŋá ikpiti ibaaa? 5 Abraam u-ba di tùkū-mi yii u-niisal dee, ní unimpu u-ba mun lī yii Abraam sá u-niija. An puee tin man ŋá nee, m ŋá nì nlandɔkɔmɔnti ní, maa yīntì.»

6 U-damintiiku kubaantiiu gbanti poonee ní Unimbɔti bí-u yii: «Man m-ba nyí yii an sá nì nlandɔkɔmɔnti ní a ŋá míǹ. Man di cúú-si á taa yìntīǹ-mi, an pu ní maa yāntì a gbēē-u. 7 Kɔŋkɔnnee, gíiǹ unimpuee kí tīī u-cal, u sá m-bɔnaatiliu ní, u làá mèè kí tīī-si á taa kpú. Ama a yaa kaa gíiǹ u-nimpuu ki tīī-u, á nīn nyí yii sii nì a-yab kɔkɔ làá kpú.»

8 Abimeeleeki fīntì kutaafaau pɔ̀lpɔlee ní ki yíiń u-tɔntɔnliibi kɔkɔ ní ki dū an bɔtee ki máafì-bi, ní tifaandi cúú-bi tikpil. 9 Ní Abimeeleeki yíiń Abraam ní ki bālifì-u yii: «Ba ŋá ní a ŋá-ti mimmee? Tilati ní m yīntiǹ-si ní a bàà làá dū man nì m-beelin yab kí kɔ́ǹ ikpitikpaan poon míǹ? A ŋá-mi digaŋgam un kaa máaǹ bí ŋá unilee.» 10 Ní ki gíti bí yii: «Ba di yāntì ní a ŋá míǹ?» 11 Ní Abraam kíí-u yii: «M dākafì yii doo nib kaa fàŋkí Unimbɔti, bi yaa ká m-nimpuu, bi ŋūǹ ki kpɔ̀-mi kí fōō-u. 12 Ama nì míǹ kɔkɔee, u baasii sá m-niisal ní. Di sá man nì u pēē baa ní kaa pēē na, an pu ní m ŋúń ki cáá-u. 13 Unimbɔti nín yāntì m yíkì m-tiŋkin m-baa cee kí bíi yìiǹee, m tùkū m-nimpuu yii: <Min ní a làá dàkà yii a néeń-mee di sá laakin kamaa ní ti yaa bàn̄ee, á nīn yíì-mi yii a-niija.>»

14 Niinee ní Abimeeleeki cúú inaa nì ipii nì iŋoobu nì iyumbu bininjab nì binimpoobi ki tīī-u, ní ki gíiǹ u-nimpuu Saara mun ki tīī-u. 15 Ní ki bí-u yii: «Kpèè, m-tiŋki di dɔ̄ a-nimbiin nee, lēē laakin ní a lèe kí nīn kóò.» 16 Ní ki bí Saara yii: «Kpèè, m tīī a-niija animbil jitɔmbi kutuku nee kí dàkà bin kɔkɔ bí a-ceeyee yii tibɔti tin jítèe, baa ká a-bɔkpil.»

17 Niinee ní Abraam mēē Unimbɔti ki tīī Abimeeleeki nì u-nimpuu nì u-tɔntɔnliibi binimpoobi ní Unimbɔti fātìi pīitì-bi mmaal! 18 Di sá yii tin nìn jítì Abraam nimpuu Saara puee yāntì ti-Dindaan pīiǹ Abimeeleeki nì u-dicaŋku yab kɔkɔ maaliŋu.