Dinyeel 18

Unimbɔti tùkū Abraam yii u làá màal̀ kibiki

1 Dalba kuwiŋkaŋu puee, Abraam nyáń ki kā u-tantiu kasarkau taapu, Mamiree sukpaaŋyi caŋin, ní ti-Dindaan nyántì u-ba ki dàkā-u niin. 2 U dāa yáatì ki kpēē nyɔkɔpuee, bininjab bita di yú kaa dátiǹ-uee. U ká-bee ní ki yíkì u-tantiu nyɔkɔpu ki sáǹ ki túŋkì-bi. U bàn̄ bi-ceeyee, ní ki gbāaǹ ki jáam̀-bi. 3 Ní ki bí bi-kansikin ubɔ yii: «M-dindaan, m-bɔti yaa fáatì-see, á taa càatī man a-tɔntɔnliu pu míǹ. 4 Ní yàntī bí cáań nnyim ní fíntí ni-taaŋi ŋkpɔŋkpɔm, ní kí kàl̄ busubu taapu yéè kí ŋùŋfì. 5 M làá cù kí nyàabìń tijin ní tíkiń ni-fam kí nín nìkī ni-saŋŋu. Ni nín dīń man ni-tɔntɔnliu cee puee, ní yàntī ḿ ŋá míǹ kí tīī-ni.» Ní bi kíí-u yii: «Ŋá a nín lī puee.» 6 Ní Abraam tóotì ki nín kóò u-tantiun u-nimpuu Saara cee, ní ki bí-u yii: «Malaa! Yáfí ŋyimmɔntiim kí búuń kí tɔ̄ kalaa!» 7 Abraam tùkū u-nimpuu mimmee, ní ki sáǹ ki cūtìi kɔ́ u-nacaŋkpuŋkun, ki cúú dinajapɔmbil din bí màlmalee ki tīī u-tɔntɔnliu ní úǹ kūū-dì ki ŋɔ́fì malaa malaa.

8 Ní Abraam dū waagaasii nì nnaabiim ki kútì tinan tin bi ŋɔ́fèe pu ki cáa yóoǹ-bi, ní ki yú u-ba bi-caŋin busubu taapu mboonni, ní bíǹ kā ki jīǹ. 9 Niinee ní bi bālifì Abraam yii: «A-nimpuu Saara bí la?» Ní u bí-bi yii: «U bí tanti poon». 10 Ní ti-Dindaan bí yii: «Án dāa tūŋkí jiil naŋkɔnampuee, man làá fàtīí gítiń doo. Ŋyunti gbantee, a-nimpuu Saara dāa màl̄-si kibininjabiki dee^a.»

Saara nìn kā tanti nyɔkɔpu bi-boon ki gbìl̄ tin bi sòon̄ee. 11 Abraam nì u-nimpuu nìn púĺ tikpil, u-nimpuu nìn jítì mmaal pu. 12 An puee Saara nìn láń u-neen, ní ki lī u-ban yii: «Man nín púĺ min uninja neeliŋu kaa ti cútí-mi nee! M-cal mun sɔ̀ ki púĺ!» 13 Ní ti-Dindaan bí Abraam yii: «Ba pu ní Saara láń ki bí yii an kaa sá tiŋman, úǹ púĺ waa ti ŋūǹ kí màal̀ kibiki? 14 Tiba bí ki pɔ̄ɔ̄ nì Unimbɔtaaa^b? Jiil, ŋyunti ŋun m yóoǹee yaa láa bāańee, m làá gítiń a-cee. Ŋyunti gbantee a-nimpuu Saara dāa màl̄-si kibininjabiki dee.» 15 Niinee Saara fāŋkì ní ki néè yii: «Maa láń». Ní u bí-u yii: «A mɔ́ntí, a láń».

16 Bininjabee yíkèe, Abraam bíi cēentí-bi ní bi túĺ Soodoom watil pú. 17 Ní ti-Dindaan bí yii: «Maa máaǹ kí báĺ Abraam tin m là kí ŋée! 18 Di sá Abraam làá dāá nīn sá ditimbuŋkpaandi din cáá mpɔnee baa ní. Úǹ pu ní m làá dāá dī kí bìin̄ atimbun ŋin kɔkɔ bí kitiŋ puee boon. 19 Kun puee m lēē-u ú dàkà u-biyaamu nì u-dicaŋku, u-kpátam boonee, bí nīn nóó m-saŋŋu kí nīn còom̄ deedee. Bi yaa ŋáań mimmee, m làá ŋá tin kɔkɔ m pōoǹ Abraamee kí tīī-bi.»

20 Ní ti-Dindaan bí Abraam yii: «Bi nín sòoǹ Soodoom nì Goomoora yab kpitii pu miŋyee wīikí tikpil, bi-kpitii nyāŋkì. 21 Man m-ba làá sìntī kí kpèè bi yaa lafun ŋáań tin bi sòon̄ m gbìl̄ee, ḿ béé, an yaa kaa tí sá mimmaaa, ḿ béé.»

22 Niinee ní bininjabee bili yíkì niin ki búntì Soodoom watil pú, ní Abraam gbíntì ki yú ti-Dindaan cee. 23 Ní Abraam sútì ki pìl̄ ti-Dindaan ní ki bí-u yii: «Mimmee, a làá kúntí binikpitib kí kpáaǹ deedeedambaaa? 24 Binib bin yú deedeeyee yaa sá kii imuŋku ili nì saalaa kitiŋ gbanti poon, a làá kúntí-kàaa? Deedeedambi imuŋku ili nì saalaa gbanti puee, aa làá dū bi-kɔkɔ kpitii kí pɔ̄-baaa? 25 Saa kíikí kí ŋá míǹ kpataaa pu, kí kúntí unikpiti kí kpáaǹ deedeedaan. Sii un sá kitiŋ kɔkɔ bɔsoonliuee, aa làá sòoǹ báà ŋma bɔti deedeeee?» 26 Ní ti-Dindaan bí yii: «M yaa ká binib imuŋku ili nì saalaa bí deedee Soodoom tiŋki poon, bi-puee maa làá ti kúntí-kì.»

27 Ní Abraam bí yii: «Kpèè, man un sá ntampukum ki sá ŋfantamee mun di pée yú ki sòoǹ nì m-Dindaan nee. 28 Deedeedambi imuŋku ili nì saalaa poonee biŋmoo yaa fɔ́tì, mimmee biŋmoo bin fɔ́tèe puee, a làá kúntí kitiŋ gbanti kɔkɔɔɔ?» Ní ti-Dindaan bí yii: «Aayee, m yaa ká deedeedambi imuŋku ili nì biŋmoo, maa làá kúntí kitiŋ gbanti.»

29 Ní Abraam nìkī ki bālifì ti-Dindaan yii: «Kin deedeedambi imuŋku ili di yaa bí fáà?» Ní ti-Dindaan bí yii: «Deedeedambi imuŋku ili yaa bí, maa làá ŋá-kì tiba.»

30 Ní Abraam fātìi tí bí yii: «M yaa gbíntìi nìkì ki sòoǹee, m-Dindaan, á taa gíí diŋuul. Mimmee, deedeedambi yaa bàn̄ mmuŋku nì saalaa fáà, a làá kúntí kitiŋ gbantaaa?» Ní ti-Dindaan kíí-u yii: «Deedeedambi mmuŋku nì saalaa yaa bí kitiŋ gbanti poon, maa làá ŋá-kì tiba.»

31 Ní Abraam gíti bí yii: «M làá tí màkan̄ kí sòoǹ nì m-Dindaan. An yaa yíì deedeedambi mmuŋku di bí niin.» Ní ti-Dindaan bí yii: «Bi yaa sá binib mmuŋku, maa làá kúntí-kì binib mmuŋkuee pu.»

32 Ní Abraam gíti tí bí yii: «M-Dindaan, taa fōō diŋuul. Min bí nee m yaa sòon̄ee an dóò, maa ti làá sòoǹ tiba. Kin deedeedambi yaa sá binib saalaa ja fáà?» Ní ti-Dindaan kíí-u yii: «Maa làá kúntí-kì binib saalaayee pu.»

33 Ti-Dindaan sòon̄ nì Abraam míǹ ki dóòyee ní ki búntì, ní Abraam mun nín fàtī u-dumpu.