Dinyeel 17

Unimbɔti líì Abram u-poondi

1 Ŋyunti ŋun Abram nìn cáá abin diba kpá dilaataalee, ti-Dindaan nìn nyántì u-ba ki dàkā-u ní ki bí-u yii: «Man di sá Unimbɔti Mpɔŋkɔdaan. Á nīn ŋáań min fáatì-mee kí nīn bí deedee. 2 M làá lafun ŋá tin m pōoǹ yii m làá ŋá kí tīī-see, kí bùtī a-maaliŋu tikpil tikpil.» 3 Ní Abram tātìi dōoǹ dicincibil, ní Unimbɔti bí-u yii: 4 «Kpèè, dipoondi din man pōoǹ-see sɔ̀. A làá dāá kpántí anibul kupaau baa ní. 5 Baa làá nīn gíti yíì-si Abram^a. A-yindi di làá nīn kíǹ ki sá Abraam, kun puee m dū-si ki kpántì atimbun kupaau baa. 6 M làá bùtī a-maaliŋu tikpil tikpil. A-maaliŋu gbanti poon ní m làá yàntī atimbun nì bibɔtiibi ń nyā. 7 Dipoondi din m pōoǹ-si nee, dì sá ki tīī sii nì a-maaliŋu kɔkɔ ní kí nīn cáa cá jaanjaan, dì kpá kí gbíntí. Di-pu ní m làá nīn sá a-Nimbɔtiu nì a-naantitɔntɔkɔŋ Nimbɔtiu^b. 8 M làá dū Kanaan tiŋki kin poon a bí kunicaŋu nee kɔkɔ kí tīī sii nì a-naantiibi bin làá páanní a-boonee, kí nīn cá jaanjaan. Ní man di làá nīn pée sá bi-Nimbɔtiu^c.»

9 Ní Unimbɔti nìkī ki bí Abraam yii: «Siiyee, á nīn ŋúb́ m-poondi, kí nīn ŋáań min m lèe, sii nì a-naantiibi bin dáá bíń boon ki dòońee kɔkɔ. 10 Ni nín máaǹ kí nīn ŋúb́ dipoondi din m pōoǹ sii nì a-naantiibi bin dáá bíń boon ki dòońee puee di sá bin kɔkɔ pée sá bininjab ni-kansikinee ń gíí dikpancandi^d. 11 Digiil gbanti di sá dipoondi din m pōoǹ-nee daaŋku man nì ni kansikin. 12 A-maaliŋu poon kí nīn pée cáa cá a-naantiibee, bi yaa màl̄ kibininjabikee, bí gíí-kì dikpancandi iwiin inii dal. Ki kpáaǹ iyumbu nín màl̄ bin ni-ciŋŋinee, nì bin ni dáal̀ binicambi ceeyee, báà udaan yaa pée nyánní laakin kaa sá a-maaliŋunee, á gíí-u. 13 Uyumbu nín màl̄ un a-cindinee, nì un a dū a-nimbiliŋ ki dée, bi máaǹ kí gíí-bi, m-poondi daaŋku gbanti ń nīn bí ni-wunti pu míǹ kí nīn cá jaanjaan. 14 Uninja un kaa gíí dikpancandee, ní nyāntí-u ni-nibul kansikin, kun puee udaan kpītì m-poondi.»

15 Ní Unimbɔti gíti bí Abraam yii: «Á taa ti yíiń a-nimpuu yii Saarayi, á nīn kíǹ ki yíì-u yii Saara^e. 16 M làá bìin̄ u-boon kí yàntī ú màal̀-si kibininjabiki, kí bìin̄ u-boon ú kpántí anibul kupaau na. U-maaliŋu poon ní atimbun tikpil bɔtiibi làá nyā.» 17 Niinee ní Abraam tātìi dōoǹ dicincibil ki bíi lāā ní ki lī u-neen yii: «Unil un cáá abin dilaataalee gíti ŋūǹ kí màal̀ kibikaaa? Àá Saarayi un ŋá abin imuŋku inaa nì saalaayee di gíti ŋūǹ kí màal̀ kibiki ní?» 18 Ní Abraam bí Unimbɔti yii: «Too, á pɔ̄ Isimaayeel mmaŋfafɔkɔn!» 19 Ní Unimbɔti bí-u yii: «M gbìl̄, ama an kaa sá Isimaayeel bɔti ní m bíi sòoǹ, an sá a-nimpuu Saara di làá màal̀-si kibininjabiki. Á dāá pɔ̄-kì diyindi yii Isaaki^f. Úǹ nì u-naantiibi bin làá páanní boonee di làá fōō dipoondi din m pōoǹ dí nīn bí kí nīn cá jaanjaanee. 20 A nín mēē-mi Isimaayeel pu miŋyee, m gbìl̄. M làá bìin̄ u-boon kí yàntī ú màal̀ ki bùtī tikpil tikpil. U làá dāá màal̀ bibɔtiibi saalaa nì bili, ní u-maaliŋu ń dāá nīn sá ditimbuŋkpaandi. 21 Ama an yaa kíǹ m-poondee, dì sá ki tīī Isaaki un Saara làá dāá màal̀ jiil naŋkɔnampuee ní.»

22 Unimbɔti sòon̄ nì Abraam ki dóòyee, ní ki yíkì u-cee ki nín jɔ́ḿ. 23 Daliŋkin Unimbɔti sòon̄ nì Abraamee, yaadal gbanti ní u yíiń u-jipɔɔn Isimaayeel nì iyumbu nín màl̄ bininjab bin u-cindinee nì bin u dáal̀ee, nì bin pée sá bininjab ki bí u-cindinee kɔkɔ, ní ki gífì-bi akpancan kii Unimbɔti nín bí yii u ŋá puee. 24 Abraam nìn cáá dibindi diba kpá dilaataal ní ki gíí dikpancandi. 25 U-jipɔɔn Isimaayeel nìn cáá abin saalaa nì ata ní ki gíí dikpancandi. 26 Ŋwimbaanti ní Abraam nì u-jipɔɔn Isimaayeel kpáfì ki gíí dikpancandi. 27 Ŋwimbaanti gbanti ní u gíí ki kpáaǹ bin kɔkɔ pée sá bininjab ki bí u-cindinee, iyumbu nín màl̄ biŋyee nì bin u dáal̀ binicambi ceeyee.