Dinyeel 16

Isimaayeel màaltam

1 Abram nimpuu Saarayi kaa nìn màl̄ kibiki. U nìn cáá uyumbusapɔɔn ubɔ, u sá Eejipiti tiŋkin bi yíì-u yii Agaar. 2-3 Ŋyunti ŋun Abram nìn ŋá Kanaan tiŋkin abin saalaayee, ní u-nimpuu Saarayi bí-u yii: «Kpèè, ti-Dindaan kaa pú-mi mmaal. An puee, dū m-yumbusapɔɔŋwu nee kí kpántí a-nimpuu, an yaa yíì úǹ puee m làá ká jipɔɔn». Ní Abram fōō u-nimpuu nín lī puee. Saarayi nìn dū u-yumbusapɔɔŋwu Agaar un sá Eejipiti tiŋkinee ki tīī u-cal. 4 Ní Abram nì Agaar kpáfì, ní u cáá dipool. Agaar nín ká yii u cáá dipoolee ní waa ti dū u-na Saarayi ki yíiń tiba. 5 Ní Saarayi bí Abram yii: «Sii di yì-tì ní bi sìí-mi nee. Man di dū m-yumbusapɔɔŋwu ki tīī-si, ama u nín ká yii u kpántì upɔdaanee ní man kaa ti sá tiba u-cee. Ti-Dindaan di làá sòoǹ man nì sii bɔti!» 6 Ní Abram bí-u yii: «A-yumbuu dee, a cáá u-pu mpɔn. Ŋá-u min di fáatì-see.»

Niinee ní Saarayi kíĺ ki bíi sàantí Agaar ní úǹ dāa sáǹ ki wāatì-u. 7 Ní ti-Dindaan tuuŋŋu tin ká-u u kā nnyimbul ŋubɔ caŋin kuteeun. Nnyimbulee nìn pìlīǹ Suur dandi ní. 8 Ní ntuunee bí-u yii: «Agaar, Saarayi yumbusapɔɔŋwu, a nyánní la ní ki kùǹ la»? Ní u kíí-ŋu yii: «M sáń m-na Saarayi ní». 9 Ní ti-Dindaan tuuŋŋuee bí-u yii: «Gítí a-na gbanti cee. A yaa bàn̄ee, á sìntī a-ba taapu kí tīī-u». 10 Ní ki kútì ki lī-u yii: «M làá dāá bùtī a-maaliŋu tikpil, áli gba baa dāa ŋūǹ kí kàaǹ a-naantiibi.» 11 Ní ki gíti tí bí-u yii: «Kpèè, dipool din a cáá nee, a làá dāá màal̀ kibininjabiki ní. Á dāá pɔ̄-kì diyindi yii Isimaayeel, kun puee ti-Dindaan ká a-falaau, ki gbìl̄ a-timinsii. 12 A-biki gbanti làá dāá nīn pɔ̄ɔ̄ kii kumooun maŋkee ní. U làá dāá nīn jáà nì báà ŋma, ní báà ŋma mun làá dāá nīn jáà nì u. U làá dāá nīn bí u-baba, kaa làá nīn bí u-nabiyaamu kansikin.»

13 Ní Agaar yíiń ti-Dindaan un sòon̄ nì uee yii: «Ata Eel-Rooyi», taapu di sá yii <A sá Unimbɔti un wāĺ-mee.> Di sá u lī u-ban yii: «Unimbɔti un wāĺ-mee ní m lafun ká nee.» 14 An pu ní bi yíì lɔkɔee yii: «Beer Lakayi Rooyi», taapu di sá yii <Un bí dimaŋfalin ki wāĺ-mee lɔkɔu.> Lɔkɔ gbanti dɔ̄ Kadeesi nì Beereedi timmu kansikin. 15 Boonee ní Agaar màl̄ Abram kibininjabiki, ní Abram pú-kì diyindi yii Isimaayeel^a. 16 Abram nìn cáá abin imuŋku inaa nì abin aluu ní Agaar nín màl̄-u Isimaayeel.